八月半^^^4歲半

 

9月30日(星期日)

八月半，係中秋節既俗稱。。。。。今年既八月半，適逢係皓皓4歲半既生日！
呢日反正都會去婆婆屋企做節，所以媽咪就訂咗個大少少既蛋糕，同表哥表姐佢哋一齊慶祝～～



其實都唔算係咩慶祝既，只係俾皓皓吹吓蠟燭開心吓～～



個蛋糕係皓皓自己揀架。。。。。。



話咁快。。。。皓皓就4歲半喇～～





同軒軒表哥越黎越啱咀型，咁就由表哥仔領唱生日歌啦！

4歲半生日快樂，皓皓豬仔！

呢晚食完飯我哋會出去賞月，可能會玩到幾夜，為免皓皓扭眼瞓，所以切完蛋糕，就俾佢瞓陣晏晝覺；點知瞓醒覺之後，皓皓咳得好犀利(其實呢兩個月皓皓都'枕'住有啲咳，清極都清唔到)。。。。。。
後尾爸爸仲話皓皓咳得有啲唔尋常，好似有啲促。。。。呢日公眾假期，都唔知去邊度搵診所，唯有即刻飛車去法國醫院睇。。。。

醫生話，皓皓條氣管有啲收窄，要即刻聞氣。。。。唔怪之得佢突然間咳得咁緊要啦！
醫生又講，如果我哋番到屋企唔識俾皓皓聞氣，就不如住院。。。吓！爸爸媽咪真係唔想喎。。。。
最後決定，响醫院姑娘幫助下聞一次氣，跟手學埋點樣响屋企自己做呢樣嘢～～
見到皓皓瘦瘦既面龐箍住個大罩，神色有啲彷徨，媽咪覺得好心痛。。。。。
不過吸完氣之後，皓皓條氣管真係順番晒，仲冇嘜點咳添。。。。
好彩即刻嚟睇醫生，如果唔係，皓皓咳得辛苦之餘，條氣管再收窄就真係麻煩喇！



睇完醫生，啱啱趕得切番婆婆屋企開飯～～～
每逢做節，婆婆都會整蝦蟹俾我哋食。。。。。呢兜蟹，認真夠晒大堆頭！

 

 

食完飯，諗住帶皓皓番屋企休息吓，因為驚佢食咗藥會攰，又費事俾佢出去吹風～～～
不過皓皓一早已經知道約咗表哥表姐佢哋出去玩，係都話要一齊去～～

爸爸媽咪見皓皓好咗好多，佢又咁想去，咁就去玩一陣啦！

今年我哋又係去西九長廊，不過今年冇晒啲綵燈，搞到氣氛都好似差咗咁。。。。。

當然對皓皓佢哋黎講係冇分別既～～
佢哋都係志在一齊玩吓燈籠熒光棒啫。。。。

皓皓至愛～～喜羊羊！

睇吓佢哋！淨係砌熒光棒都好鬼興奮！



自創遊戲：睇吓邊個可以將個波碌入個圈裏面。。。。
軒軒表哥玩到趴晒地，haha～～



呢晚好大風，連點著個燈籠都有啲難度呀！
玩到差唔多11點，我哋就走lu！



簡單既4個字，相信係唔少人心裏面默許既願望，媽咪都係～～
响度都祝願大願：人月團圓！

同場加映～～



中秋前夕(29號)，屋苑搞咗個中秋晚會～～





食完飯，帶皓皓落去逛吓，玩吓攤位咁。。。。
雖然規模唔大，禮物冇睇頭，不過皓皓都玩得幾開心～～～
相信係因為佢靠一己之力嬴到啲遊戲，覺得好滿足啩～～～

BBQ gathering @大潭

9月28日(星期五)

好耐冇BBQ喇，所以爸爸趁連續有幾日既假期，就約齊人入大潭燒嘢食，順便同一位由美國番嚟既朋友敘舊。。。。。不過大家都實在太忙，夾嚟夾去都就唔到時間，卒之揀咗星期五，大家放工之後先至趕入去大潭。。。。。



仲有兩日就中秋節，當然要買個燈籠俾皓皓玩吓啦～～

哈哈哥哥同Kenny弟弟一人一個，唔駛爭。。。。

Kenny由美國番嚟，唔係好識講中文，打破佢哋之間既語言隔膜既。。。。。。

就係呢幾個angry bird 紙燈籠～～～

皓皓對紙燈籠超有興趣，無他。。。。。。因為有蠟燭嘛！

 

始終都係同哈哈哥哥孰絡啲，話晒溝通到，hehe～～

 

呢度仲有籃球場。。。。。而家皓皓好鍾意打籃球，見到有籃球打，勁開心！
呢個籃球架好似特別高，Bear Bear契爺抱起皓皓射籃，但係都射唔入～～

小朋友全晚既焦點所在。。。。。。
就係呢張巨型彈床喇～～

皓皓跳到癲咗咁滯。。。。。

呢張相媽咪低抄，影到天上圓圓既月亮～～

媽咪呢日唔記得帶相機，佢哋跳到咁用iphone真係影極都影唔到，矇查查。。。。。
幾經辛苦先至叫停到佢哋坐低影相。。。。

張彈床以前冇圍網圍住，彈床後面就係海，個感覺真係好牙煙。。。。
而家圍晒網，安全好多，玩都玩得放心啲。。。。。

呢度供應一般燒烤食物，所以我哋例牌自己加料～～買啲海鮮入嚟燒，勁正！


9月29日(星期六)

呢日先去陪公公婆婆飲茶，然後同同表哥表姐去咗黃埔既冒險樂園玩，而家去冒險樂園（九龍嗰邊），多數都係去黃埔，因為奧海城嗰間執咗，尖沙咀嗰間又勁細，相比起，黃埔呢間真係算最多嘢玩喇！

去到佐敦間稻香門口，見到有架印住hello kitty圖案既巴士，即刻叫媽咪幫佢同kitty影相～～

黃埔冒險樂園既波波池擴充之後，多咗好多車車玩。。。。。
呢架可以自己踩既車仔皓皓好鍾意，呢日好好彩，竟然霸到呢架車仔坐～～



呢架鏟泥車仲多人爭，坐咗上去既小朋友都唔願起身，唯有趁呢一節完場，職員驅散人群既時候，
咋咋淋俾皓皓坐上去，雖然坐得十秒，不過總算過吓癮。。。。。

除咗渣車，其餘大部分時間就係同軒軒表哥玩呢個～～～

等啲海綿波波由上面條管噴出嚟，佢哋就搶住去接。。。。。。

有人陪佢玩真係特別開心～～

雖然對砌積木已經冇咗咁大興趣，不過見表哥走過嚟玩，佢又一於死跟～～



蜜蜂咖啡杯～～轉到你暈陀陀。。。。。好彩有表姐陪，唔駛媽咪一齊坐～～

下一篇先寫到中秋節，又脫晒期喇，加快步速至得～～