從第一次去旅行開始，媽咪就有寫後記，希望記低旅程中特別難忘或攪笑既情景，第日攞番出黎睇吓、回味吓．．．．所以大家要有準備，呢啲後記可能會越寫越長，hahaha！
回味.....
5 July ~ 9 July, 2010
我們在東京的日子....
不一樣的辛苦～
今次旅行，爸爸話比之前兩次辛苦，其實媽咪覺得除咗第一日之外，其他日子都係同以前差唔多啫！爸爸媽咪去旅行都係啲衝鋒陷陣、分秒必爭型，再加上帶住皓皓bb，攰就預咗，點攰，都係五日啫！更何況。。。呢啲係快樂既辛苦，呢種辛苦，一年多幾次都唔拘呀！
不過講番第一日就真係攞命啲，因為凌晨機，而成個機程皓皓只係肯瞓咗個零鐘，到埗之後就開始行程，然後踩到夜晚，攰到對腳好似唔係屬於自己咁．．．．最慘係落勁大雨，仲係突然之間，爸爸媽咪根本黎唔切走避，又要護住皓皓bb，大家都淋到衫褲可以扭出一盤水，真係超狼狽！不過都係一個難忘既經歷黎既．．．
Mother Farm的遺憾～
Mother Farm其實係媽咪plan行程時既不二之選，點知最後臨門脫腳，媽咪真係覺得好可惜，因為相信呢度可以俾到皓皓一個好好既體驗．．．．媽咪覺得完全冇plan過就好地地，plan好晒最後去唔到就難免有啲失望．．．．唯有寄望下次啦！正如Blog友話齋：啲牛牛會等皓皓嚟揸牛奶！
充滿歡笑聲的旅程～
今次一行五人去旅行，可以話每一日都充滿歡笑聲，其一係因為Bear Bear契爺本身就係一個攪笑能手；其二。。。。當然係源自我哋既皓皓bb啦 ！
媽咪唔止一次咁講，皓皓對住陌生人，真係可以粒聲唔出，勁怕醜！唔知點解今次旅程，佢突然之間唔怕生保，就算對住完全唔識既人都肯講吓嘢．．．．响五日旅程當中，皓皓不乏一啲爆笑既言行，等我紀錄吓先～～
爸爸媽咪發現，皓皓係特別鍾意一啲白白滑滑既靚姐姐架，有次搭火車時見有個美少女上咗車，就打雀咁眼望住人，一面望一面同媽咪講：有個姐姐入咗黎！然後就一直望住，望咗好耐、好耐．．．．咁細個就識望女仔，點攪？
又有一次，有個靚姐姐坐佢隔離，佢直情出埋手去摸人哋大髀，又好怕醜咁嗌：姐姐！姐姐！嚇到爸爸要全程捉住佢雙手。。。
至於不得不提，就係响Disneyland睇 parade～～媽咪見到皓皓全情投入，又學人哋咁又拍手又嗌到聲嘶力竭，嗰種感覺唔知點形容，嗰一刻媽咪心裏面諗：我個bb真係長大啦。。。
當然亦唔能夠唔提，皓皓見到姐姐跳舞比見到任何一個迪士尼人物都要來得興奮，佢好似個小粉絲咁，用傾慕既眼神望住啲姐姐講：真係好靚！姐姐搖搖吓．．．．媽咪O晒咀滴晒汗之餘，真係笑到趴街。。。。
而去Puroland嗰日皓皓都好攪笑，因為佢隻腳既腳眼位置俾蚊咬咗啖，著鞋就會頂住而唔舒服，於是佢成日除咗隻鞋，面露痛苦之情咁同我哋講：真係有骨！而家每次媽咪諗起佢既表情同講呢句說話時候既語氣，都會情不自禁咁笑出黎！
皓皓要自己伸隻手入鞋仔度摷番啲'骨'出黎．．．
仲有就係响壽司大，因為皓皓食壽司飯時爆一句：好好味呀！逗得全場人哈哈大笑，然後佢又意識到自己做咗主角而怕醜咁挨住媽咪．．．．
呢啲一切一切情景，媽咪都一定會好好記住，等皓皓你大個仔之後話番俾你聽！
～戰利品篇～
今次去旅行啲yen既匯率勁高呀，兌8.9幾，貴到想喊，所以今次啲yen好唔見洗，加上今次响食嘢方面都洗咗好多，所以最後當然係～～超晒budget啦！不過冇所謂啦，學爸爸話齋：搵得黎，就洗得去。。。
皓皓既戰利品～～有Hysteric啦，Marc Jacobs啦，
Bape啦，Beams啦，Garcons啦，
其中媽咪勁鍾意件Stussy x Hello Kitty。。。。
仲有呢啲～～
同埋其他好多濕碎嘢。
（媽咪懶得執出黎影
另外一部分既戰利品，
爸爸嗰啲，冇影！
最後，俾大家睇吓皓皓親身示範既其中一件戰利品～
就係。。。
包包超人泳衣～～
拍埋包包超人不倒翁，好似兩兄弟呀
戴埋泳帽仲攪笑～～
皓皓研究緊响褲腳嗰個包包超人。。。
五日既東京吃喝玩樂之旅圓滿結束，
下次旅行，九成都係日本架喇，
(爸爸媽咪都係日本狂迷，無計！)
不過希望能夠說服爸爸，
跳出東京＆大阪啦！
