北海道聖誕飄雪の旅七日遊記寫完，終於可以鬆一口氣，亦可以快啲追番一二月份既blog，希望唔好嚴重脫期啦！
北海道の初體驗
2013年12月22日~12月28日
今次旅行，認真要多謝同行既朋友，冇佢哋提議舉辦'柴娃娃旅行團'，都唔駛旨意拉郁爸爸向北海道出發，咁媽咪踏足北海道以及賞雪既心願就真係遙不可及喇！其次，媽咪未試過咁多人一齊去旅行，總係覺得要互相遷就，又要滿足各人既期望，好難！但原來，一大棚人去旅行自有另一番樂趣，今次確實係一個好好既體驗！至於行程方面，亦要感謝朋友們事事都無嘜所謂，令媽咪可以隨心所欲，揀一啲自己鍾意既地方去，thx～～北海道の初體驗
2013年12月22日~12月28日
北海道の最
最正～～每次去旅行，可以完全唔理工作既嘢，日日食玩瞓，已經係超級享受；今次仲要係媽咪第一次响外國過聖誕，第一次睇住漫天雪花過聖誕，呢種感覺真係好難忘！
最滿足～～應該係食既方面，尤其係魚生同蟹，媽咪超愛，真係無得彈！至於買既嘢，真係唔算多，始終我哋只係去咗三井outlet，無嘜點去其他shopping mall，不過都ok啦，買到自己鍾意既牌子，價錢又平好多，已經好滿意喇！
最失望～～今次既住宿整體都好好，係對石水亭有啲失望，可能係一直以為有貨切私人風呂浸而最後落空既關係啦，anyway，整體都算係咁喇！
最辛苦~~皓皓今次旅行超扭計，一有少少唔鍾意就發脾氣，或者係之前幾次旅行爸爸媽咪都太遷就佢既關係啦！又或者係哈哈哥哥响度，佢嘜都要同人爭一餐，好煩！又又或者係真係太凍，令佢有啲唔舒服啦！皓皓，下次真係唔得咁架！知道冇？
最抵死~~旅行前啲yen去到九點七八，返嚟即勁跌！可惡！早知所有嘢都碌卡啦！
總括嚟講，爸爸覺得北海道始終唔係佢既至愛，去一次已足夠咁話喎。。。。。媽咪就覺得，今次旅行同以往帶住皓皓嗰幾次好唔同，之前幾次旅行都好有衝鋒陷陣既感覺，我哋分秒必爭，chur得好盡；今次既感覺比較hea，買既嘢少咗，玩既嘢少咗，但就反而得到真正既relax，亦畀時間媽咪去欣賞吓北海道既美景，體會到去旅行既悠閒之趣。所以，可以既話，媽咪都想再去一次北海道，最好係春夏之季，咁就可以欣賞同冬季截然不同既花田美景。。。。。不過，諗下好喇！爸爸肯再去至算啦！haha！
北海道の戰利品
衣物篇～～全部購自同一間舖，買得唔多！
藥物篇～～隻龍角散好有效，又容易入口，下次要入多啲貨！
零食篇～～啲嘢食原來好快過期，爸爸媽咪一買嘢就有少少失控，下次要睇清楚啲先買！
玩具篇～～睇皓皓既戰利品，就明白點解佢越嚟越鍾意去旅行！
其他精品＆手信～～
音樂盒好靚，不過包好晒，費事拆開喇！
媽咪至愛之一～～
响小樽嘆tea附送既杯碟～～
媽咪至愛之二～～
購自洞爺湖既木製時鐘，好cute～～
媽咪至愛之三～～
响小樽買咗十幾粒用浮波吊住既海洋生物，加多隻潛水艇，佈置成一個好靚既魚缸～～
好有紀念價值既兩張相，拍攝自白之戀人館＆登別忍者村！
仲有，响千歲機場空運抵港既皇帝蟹一大隻。。。。。
同埋有媽咪手掌咁長既牡丹蝦，超yummy！
番到香港，朋友們好似意猶未盡咁，已經講定下次大旅行既日期同地點，haha！
朋友提議既地點，又係爸爸抗拒去既地方～～韓國。
媽咪本身都對韓國都冇嘜好感，去過一次，覺得唔好玩，但身邊起碼有六七個朋友，同媽咪講韓國已經同以前有好大分別，玩既食既買既，都好ok咁話，搞到媽咪都有啲心動，只係一開口同爸爸講，佢就斷然拒絕。。。如果真係一大班朋友去，爸爸肯定唔會say no！所以。。。。。希望到時能夠成團啦！
