放完大假已經大半個月，但係媽咪都仲未出晒放大假既blog，所以。。。。媽咪決定一次過寫晒佢～～～
8月18日(星期四)
呢日媽咪想同皓皓出街玩，但又唔知去邊，於是俾咗幾達地方皓皓揀，結果皓皓揀再去Cyberport 既Wise kids playroom玩。睇黎皓皓真係幾掛住呢個地方喎～～～
皓皓一入到去就先兜一個圈，然後問媽咪：有無得串珠鍊呀？
上次黎既時候有個特備節目，就係教小朋友串珠鍊．．．．
吓！原來皓皓咁記掛住呢度就係呢個原因～～
有少少O咀添
不過媽咪話俾佢聽呢日無得串珠鍊之後，佢又若無其事咁走咗去玩～
媽咪知道皓皓鍾意串珠鍊之後，就買咗啲珠仔同線俾佢响屋企串，
佢串得好入神、好投入，居然可以坐定定成半粒鐘．．．
實不相瞞，媽咪愛上咗俾佢玩呢樣嘢，
咁樣媽咪就可以安安樂樂咁做自己嘢，哈哈！
又做小手工～～媽咪教皓皓整咗個小蛋糕．．．．
如果無時段限制，相信皓皓可以玩煮飯仔玩兩粒鐘～～
專登縮入去唔俾媽咪影相，衰豬仔！
拖地掃地又鍾意玩，真係好女仔wor，皓皓！
我呢個騎馬look型唔型呀？？
呢一區係俾三歲以下既小朋友玩，不過我哋照入去～～
呢一區又有個廚房，皓皓例牌又玩一大餐～～
玩完wisekids playroom，見時間尚早，就同皓皓去婆婆屋企，
皓皓超興奮，因為可以同表哥表姐玩～～
幾老表排排坐嘆雪糕，爽！
8月19日(星期五)
爸爸呢日都有假放，所以想去遠少少既地方．．．．上網睇話大棠荔枝園有得騎馬馬，好，就去呢度啦！順便可以行吓元朗～～
先搭巴士出油麻地，點解出油麻地？因為．．．．
爸爸媽咪想食呢間茶餐廳囉！間茶餐廳响廟街，好耐歷史架喇！
媽咪鍾意食佢哋既湯麵；爸爸就鍾意佢哋既焗飯同奶茶，
至於我皓皓呢，邊間茶餐廳都無所謂，最緊要有奶醬包！
咪睇間茶餐廳up up dup dup，一個焗飯都要成$50，
仲要無set唔包嘢飲，茶餐廳黎講都算貴～～
食完嘢搭西鐵入元朗再轉的士，唔駛一個鐘就到～～
天氣好好，不過都幾曬～～
楊桃樹～～
周圍都係香蕉同大樹菠蘿樹～～
仲以為有bb馬仔騎，原來只係得大馬，
太高太危險喇，唔敢俾皓皓騎，皓皓自己都話驚呢！
皓皓最鍾意既環節～～餵魚魚！
皓皓魚糧一灑．．．．
成群成簇既錦鯉湧過黎～～
睇到啲魚魚咁，皓皓好開心．．．．
餵完成包糧都未夠，仲想再餵～～
跟住爸爸話買紅蘿蔔餵馬馬話喎～～
啲馬原來好有人性架，知道爸爸拎住紅蘿蔔，就向住佢鳴叫，
前面呢隻仲攪嘢，識得左右左右咁行碎步，好似跳舞咁引爸爸注意。
不過始終隻馬體型咁大，媽咪同皓皓都唔敢行近去餵，
所以爸爸自己餵晒～～
嘆個凍啫喱先～～
坐牛牛車～～
呢度都有士多啤梨園，可惜唔係當造季節．．．．
坐完牛牛車，見皓皓眼瞓，所以就走喇～～
搭番的士出元朗嘆勝利牛丸，超正！
皓皓搭車既時候瞓咗一陣，又精力充沛咁玩冒險樂園喇！
玩到六點左右，我哋就搭車入三聖邨～～
入三聖邨有咩好做？之唔係嘆海鮮囉！
油鹽水浸大花甲，好鮮甜～～
花竹蝦刺身，超好味呀！真係貴得有道理！
蒜蓉粉絲大聖子王～～
椒鹽蝦頭～～
唯一一樣稍為遜色：奄仔蟹！
都係鯉魚門嗰間整得香啲好食啲～～
玩得開心食得盡情既一日，爸爸如果可以多啲一齊放假就好lu！
