人哋話，歲幾至三歲係bb最得意既時期，依家兩歲多既皓皓，經常講一啲可愛話、做一啲可愛事，令爸媽啼笑皆非。。。。媽咪希望盡自己所能，將你講過既一話一語，做過既一舉一動紀錄落黎，等我們三口子將來可以一齊重溫一吓、回味一吓～～
唔好睇皓皓平時斯斯文文，其實佢把口'朗'過油，氹人有番幾度板斧架！仲識得對人講人話添！好似對住媽咪，就會話：我真係好鍾意媽咪！對住嫲嫲，又會話：我最鍾意嫲嫲。。。。真係一條牆頭草黎架！有朝早，佢想氹瞓緊覺唔願起身既爸爸陪佢玩，就講：爸爸我真係好鍾意你！等我除咗個奶咀，啜啖先～～
結果？當然係令爸爸乖乖就範，即刻彈起身陪佢出廳玩。。。
而家又越黎越古惑，當爸爸問：你最鍾意邊個呀？佢會先瞄一瞄媽咪，見媽咪無望住，就會大聲答：我最鍾意爸爸！見媽咪望住，就會好細聲答：我最鍾意爸爸！跟住即刻補飛，走過黎捧住媽咪塊面：甜到漏咁講：我最鍾意媽mi～～
隻衰豬，真係嬲佢唔落囉！上個禮拜，媽咪同佢講：mami就黎生日，你唱唔唱歌俾mami聽呀？佢即刻唱晒首happy birthday出黎，唱完又補一句：媽mi生日快樂！嘩！媽咪真係開心又感動，因為之前未聽佢唱過，媽咪完全唔知道佢識唱晒全首。
不過仲估唔到既係，原來皓皓識唱好多歌，包括天天天晴、義海豪情、晏晝重播既真情既主題曲（當然只識唱幾句），仲有Eason既衝上雲霄主題曲，竟然成段副歌識唱晒咁滯。。。。
俾段唱錯歌詞既版本大家睇睇先～～
真係唱得好投入架佢！
除咗氹人同唱歌，皓皓又有好多抵死開心語錄～～
（一）
某朝早媽咪問皓皓：你响度做緊咩？
皓皓：我踩緊波車呀……
皓皓，你係踢緊波，唔係踩緊波車呀！
（二）
九月既某一日，爸爸同皓皓去中環飲茶，搭van仔返家途中皓皓已經瞓著，點知當爸爸嗌「1座有落」既時候，佢成個人彈起。。。。
然後大喊：我唔番屋企呀！我要去超級市場呀！
結果爸爸要改口「商場有落」，連個van仔司機都笑晒～～
（三）
有一日，媽咪扮跌落梳化，叫皓皓救我，皓皓話：等我落去執番媽咪先！
吓？？？執？？？皓皓當媽咪係件死物！
（四）
有次皓皓拎住包糖，姨媽問佢攞一粒，佢竟然唔肯俾，仲將媽咪平時唔俾佢食糖既理由拋晒出黎，包括：你個口會咳架....啲糖好硬架....啲糖好熱架....啲糖好辣架....
笑死咗！有時媽咪俾一粒糖佢，佢又會壓低把聲扮媽咪既語氣口吻講：食一粒好喇吓！
皓皓，你唔好成日引媽咪笑啦！
（五）
有日又走過媽咪度話要搵薯薯，媽咪話：女孩子冇薯薯架，男孩子至有！佢非常十分堅持地講：媽咪有少少薯薯！媽咪問：咁你呢？佢答：我都有少少薯薯。。。。
媽咪唔知點樣應佢，只係大笑～～
（六）
皓皓好鍾意玩麻雀，鍾意玩砌牌、疊牌，有時仲識學大人咁，反幾隻出黎大嗌：碰！又或者嗌：食糊！
更誇張既係，佢竟然認得紅中、發財、白板。。。。無辦法啦，佢生於一個麻雀世家，都唔知係咪有遺傳基因？？
皓皓，影底你啲罪証先～～
呢副牌係皓皓自己砌出黎架！
有時皓皓啲曳嘢真係會激到人彈起，但係無端端又會爆啲攪笑說話出黎，令到你又好嬲，又好笑。。。。好似佢有時打爸爸，爸爸鬧佢，佢就會話：都唔係好痛啫！唔好嬲啦！
有日爸爸鬧完佢叫佢講對唔住，皓皓即刻扯住媽咪話：媽咪，你講啦！
吓？咁都得？自己做錯事要媽咪say sorry？正一曳豬。。。。
有次媽咪坐响地下，皓皓企上梳化，突然從後箍住媽咪住頸，頭向前俯衝，然後成個人翻身跌落媽咪大髀度，嚇到媽咪死死吓，鬧佢啦，佢竟然傻呼呼咁問媽咪：我勁唔勁呀？
媽咪喪嗌：勁你個頭呀！一啲都唔勁！（但係心裏面真係好想笑！）
近排皓皓開始好鍾意玩車，而家差唔多所有車都認得：的士、巴士、van仔、私家車、電單車、單車、田螺車（自創既詞語，即係咩車？我都唔知！只知後面嗰舊嘢會轉動既）、消防車、警察車、救護車、壽司電單車（板長嗰架）、pizza hut電單車、百佳車。。。。有一日搭的去跑馬地，出咗香港仔隧道上橋之後有少少塞車，皓皓把口bi li ba la未停過，一時就田螺車呀，一時又電單車呀，跟住又話：叫啲車車小心啲，呢度好高呀！本來都係嘈啲啫，唔緊要，弊就弊在佢係都要媽咪去提醒啲車車：媽咪你叫啦，你叫啦，叫啲車車小心啲啦。。。隻手就不斷用力推我塊面。。。。媽咪唔想同佢拉扯，唯有好似個傻婆咁，响架的士上講：車車小心啲呀！呢度好高呀！ 講完，皓皓非常滿意，不過唔駛一分鐘，佢又要媽咪提醒啲車車。。。。OH MY GOD！如是者，直到有另一架車轉移咗皓皓既視線，就係百佳車喇！皓皓見到百佳車好興奮，又問我可唔可以坐百佳車，又問點解個司機坐响裏面。。。。好難答啲問題，不過點都好過要媽咪提醒啲車車小心啲 突然，皓皓好似發現新大陸咁大叫：點解有個消防員坐咗上百佳車既？吓？點會呀？阿仔！不過基於好奇心，媽咪都要擰轉頭望一望，望完，即笑，原來。。。。 司機隔離個位擺咗件有熒光黃條既背心响度，皓皓以為嗰套係消防員制服。。。
～～
其實所有著住有熒光條衫既人，皓皓都話係消防員，
包括左下角呢位地盤工人。。。
嗰日响街邊見到呢位工人開緊工，
皓皓係都要話佢係消防員，
仲要媽咪同佢企响街邊駐足欣賞添！笑爆咀！
其實爆笑語錄仲有好多，媽咪記得幾多就記幾多～～
某日皓皓瞓醒晏晝覺，媽咪話：去婆婆屋企喇！
皓皓眼都未睜大就講：搭的士！唔搭大巴士！
某日睇天氣報告，皓皓突然好驚大嗌：嘩！狂風暴雨呀！(驚嘜？驚冇得出街卦！)
皓皓睇到Tempo廣告，自言自語講：呢個廣告好核突～
又會學爸爸既口吻：你真係衰到冇朋友！我接受唔到囉！頂你唔順！
我哋吱佢，佢會話我哋：咸濕！
Mami射籃射唔入，佢會話：失敗！冇鬼用！
今年暑假約同事食飯，席間其中一位同事做咗個小魔術俾皓皓睇（其實唔係咩魔術，只係用黎氹皓皓），點知皓皓睇完勁想學，番到屋企耐唔耐都會見佢整，不過細路仔手指唔靈活，整黎整去都學唔到。。。。直至最近，皓皓竟然如有神助，手指郁得好快，就係下面段片喇～～
整完，爸爸媽咪＆嫲嫲大笑兼勁讚佢，
皓皓見有人賞識，就越做越興奮，
仲一定要我哋响梳化排排坐睇佢表演，
兼且要我哋拍手掌吶喊助威添！
片中嗌得最浮誇嗰個就係爸爸喇！
真係笑到肚痛！
