北海道聖誕飄雪の旅2012~~序

12月21日(星期五)

I'm dreaming of a white Christmas！

今個聖誕，媽咪呢個願望應該成真喇！皆因仲有七個鐘，我哋一家就會飛北海道，睇天氣預報，嗰邊嚟緊幾日都應該會落雪，真係好期待呀！不過。。。。。
又有少少擔心。。。。千祈，千祈唔好落暴風雪呀！




响呢度，皓皓提前同大家講聲：Merry Christmas！
祝大家都有個甜蜜開心既聖誕～～




每年聖誕，媽咪都會响婆婆屋企搞聖誕大食會，今年要飛，所以媽咪都提前送咗聖誕禮物畀表哥表姐佢哋～～

講番呢次旅行，其實都係响意料之外既～～
事關8月先去九州，根本冇諗過咁快又去日本。點知响8月同一班朋友飯局既時候，有人撩起話一大班人一齊去旅行，於是一個二個都踴躍和應，最初諗係台灣，星加坡同泰國。。。。但係Fion姨姨唔like台灣，覺得唔好玩；Bear Bear契媽就唔鍾意星加坡，話悶；而泰國。。。。媽咪就好唔想囉，因為某年爸爸媽咪同朋友去泰國，點知有人周圍放炸彈，而家諗番都猶有餘悸，所以媽咪即刻say no～～

之後，又有諗過韓國，但係韓國價錢都唔平，加上爸爸媽咪都去過，覺得唔係太啱玩。。。。。去到呢一刻，大家都好似開咗個頭而欲罷不能咁，點都要搵到個大家都鍾意既地方。。。。卒之，就係北海道～～

以前媽咪成日叫爸爸去北海道，但係爸爸都唔肯，今次呢。。。。爸爸話唔同喎。。。。因為有人渣車，再加上聽人講聖誕既北海道真係好靚咁話。。。。

點都好啦，咁就造就咗我哋呢次北海道聖誕飄雪の旅喇！

心情興奮，但係都係時候要瞓喇，各位，旅行完番嚟再見！

幼稚園聖誕祝會

12月15日(星期六)

幼稚園每年都會舉辦聖誕慶祝會，畀小朋友分級分班上台表演。。。。。上年皓皓嗰班唱快樂笑笑；今年就唱聖誕老人，雖然小朋友平時响屋企都會日唱夜唱，不過慶祝會呢日佢哋會著埋戲服，企上台做埋動作，所以呢，家長一樣會睇到滿心歡喜。。。。。媽咪當然都唔例外啦～～

上年小朋友要九點九去到會場，但係家長就要十點九至入得，足足要等一個鐘，今年又係一樣。。。。。最慘係，嗰一個鐘，如果你行開既話，番轉頭條人龍就好鬼長，會坐到好後，咁就望唔到皓皓架喇。。。。。冇辦法啦，爸爸媽咪唯有响門口排足一個鐘～～



雖然都唔係坐得好前，不過都算勉強睇到啦～～





今年皓皓都係企後排，所以做既動作唔夠前排既同學仔多，只係擺吓手扭吓腰。。。。。。



仲有舉吓綵帶。。。。。皓皓攤盡手咁舉，好似同人鬥高咁～～



好快唱完，加上位置唔太近，影唔到好多相，同埋影得唔清楚，唯有等學校隻光碟啦～～



慶祝會响12點幾完，跟住我哋就行落去銅鑼灣食lunch～～



銅鑼灣街頭有人派氣球～～





＠千兩～～

又會咁啱，撞到同學仔，大家坐一前一後，玩到喪咗～～

食完lunch就去買蛋糕同買打邊爐既嘢，事關呢日夜晚我哋會同芬姨慶祝生日。。。。。

本來想去三聖村食海鮮，不過咁遠，大家都唔係好想郁。。。。

冇所謂啦，買料番屋企打邊爐一樣咁正。。。。。
爸爸仲買咗媽咪最鍾意食既象拔蚌刺身添。。。。。
不過媽咪有勁敵喇，因為心心表姐都好鍾意食～～



大家都食到好飽，抖咗個幾鐘，然後切蛋糕～～
呢個聖誕蛋糕好可愛，所以媽咪買嚟權充芬姨既生日蛋糕。。。。



有隻豬仔忍唔住偷'lam'忌廉～～

偷食完仲笑？



Happy birthday to 芬姨～～



等我皓皓幫你吹蠟燭啦，haha。。。。

 

皓皓呢排一見到Santa Claus 就忍唔住唱佢首飲歌－－聖誕老人。。。。


同場加映～～其他生活照

呢期唔知點解愛上玩森林家族，仲要成set咁買，話係一家人喎。。。。。



有時要帶埋'一家人'出街。。。。。
呢日芬姨買咗架購物車畀佢，佢將架車當bb車。。。。。



將佢心愛既'一家人'放晒落去，笑死～～

最近响學校借咗本圖書，內容係講顏色既～～
仲有講點樣溝顏色，例如紅+白變粉紅，藍+紅變紫。。。。。
見皓皓非常好奇咁，就買咗副水彩畀佢試吓，
佢見到真係好似本書所講咁溝到啲色，興奮到不得了～～

 

 

 

Mammy's b-day + 聖誕聯歡會

12月4日(星期二)


今年媽咪生日，一如以往，都係食餐飯切吓蛋糕慶祝，冇嘜特別，不過就好開心，因為皓皓唱咗首超好聽既生日歌畀媽咪聽，同埋一向冇嘜心思既爸爸，今年精心挑選咗一個靚靚蛋糕送畀媽咪，算係咁啦。。。。。媽咪既要求唔係好高架咋！haha！



畀咗個靚蛋糕大家睇先～～
巨型macaron，上面有代表'一家人'既公仔，好趣緻可愛～～
好喇，睇完蛋糕，講番個b-day dinner先～～

早前yahoo團購有Hana既二人前套餐，原價二千幾，團購價平一半～～
媽咪見影出黎既和牛好鬼吸引，所以就買咗。。。。。
然後book咗生日呢晚嚟食～～



等食前，同皓皓影合照，不過佢張張都唔係正正經經咁影，唔係眯眼就伸脷，唔係伸脷就擘大口。。。。。

有得食喇。。。。。清酒一壺加頭盤。。。。
唔錯。。。。。全部都好好味！

肥美既牡丹蝦刺身＆鯛魚削身～～

主角出場～～佐賀和牛+澳洲和牛+安格斯牛。。。。
好正！尤其是佐賀和牛～～

影番幅全家福先～～

 

甜品。。。。除咗黑色芝蔴嗰舊味道太濃之外，其餘兩舊都ok～～
整體黎講，媽咪都幾滿意呢餐birthday dinner，不過如果用原價幫襯既話，就比較貴同唔值喇！

食完飯原本想過時代嗰邊影吓相，不過落雨呀。。。。。。

所以行咗一陣，就早啲番屋企切蛋糕喇～～

皓皓少有既正經。。。。。

見我哋掛住影相，遲遲都唔點蠟燭畀佢吹，開始扭計～～



怕咗呢隻寶貝仔，即刻點蠟燭，當堂開心番～～

爸爸話特登叫人整呢三個公仔～～中間係皓皓，左右係爸鈀媽咪～～

雖然唔捨得，不過都要切嚟食既～～

賣相吸引，味道又如何呢？
媽咪覺得還可以啦。。。。。。

咁樣又過咗一個生日喇，平平淡淡，但有最親最愛既人陪伴，除咗講滿足。。。。感恩。。。。都唔知講咩好～～
雖然媽咪成日話人越大就越唔重視自己生日，不過見到爸爸肯花吓心思，製造吓驚喜，嗰種感覺都幾良好架，wakaka！
希望我哋一家人都好似蛋糕上面既公仔咁～～永遠整整齊齊，開開心心！



12月8日(星期六)


呢日學校同香港浸信教會合辦咗一個聖誕聯歡會，除咗有攤位遊戲玩，有小手工製作，仲有一啲綜合表演。。。。。
上年媽咪都有帶皓皓參加，知道綜合表演完結之後，學校會叫學生分級上台表演唱歌。。。所以媽咪好期待呀！

拼圖～～皓皓既弱項。。。。
要爸爸媽咪提示先可以完成～～

 

其他拋圈拋波既遊戲，對皓皓嚟講就較easy。。。。佢射慣籃嘛，眼界都幾準～～

仲有得戴住鹿角影即影即有相添～～

有人玩嘢，近嗰啲唔釣，係要挑戰難度釣遠嗰啲～～

玩完攤位，綜合表演就開始喇～～
先祈禱。。。。。不過成日打開眼偷望。。。。

又古靈精怪～～

終於到媽咪期待既一刻～～低班上台表演。。。。

唱聖誕老人。。。。。其實媽咪呢排都成日聽到皓皓响屋企唱架喇，
不過上台一邊唱一邊做動作，當然得意好多啦！

 

怕怕醜醜既樣，真係好可愛。。。＠＠＠

 

呢日有得玩之餘，仲嬴咗好多禮物，皓皓勁開心呀！