Ho Ho in Osaka 2011~~ 後記

四日三夜既大阪之旅結束咗3個幾禮拜，媽咪因為又要忙公司既嘢(趕住响8月再放大假)，所以拖到今日先出後記．．．．

今次去旅行其實都幾倉卒，事關爸爸媽咪之前決定今年唔去日本，點知後尾又心思思，敵唔過日本七月大減價既誘惑．．．．當然，決定之前都有問過朋友既意見，朋友個妹住响千葉縣，佢話東京一切如常，唔需要驚；再見到周邊既人，個個都係咁去。媽咪知道東京仲耐唔耐有餘震，帶住皓皓始終有啲擔心，不過大阪就冇問題啦！(雖然之前真係冇諗過咁快再去大阪)

結果我哋６月先至扑槌話去，嘩！唔好講話機票貴番晒，機位仲係得waiting添．．．．好彩最後都去得成！

番到香港之後，姨媽問皓皓去旅行好唔好玩？

皓皓答：唔好玩！再問佢去旅行開唔開心

皓皓答：超級開心！

Haha，皓皓，嘜你講嘢咁冇邏輯架？

不過咁，你玩得開唔開心，媽咪有眼睇既！

每次旅行，梗有啲難忘既回憶，記錄低先～～

最慘～～

媽咪諗今次旅行最慘嗰個一定係爸爸，因為由日本番黎之後，爸爸開始唔舒服，最初以為食大咗，所以飽飽滯滯又痾又嘔，點知情況延續，睇醫生醫生話係腸胃炎，後來又話啲菌走咗去肝，變成肝炎．．．．．甲型肝炎由食物感染，睇番今次旅行，爸爸食嘜媽咪就食嘜，唯一一樣爸爸有食而媽咪無食既，就係河豚刺身，睇怕都係呢樣嘢出事喇！

唉！爸爸次次去日本都話想試河豚刺身，但係媽咪驚中毒，一早表明一啲都唔會食，爸爸去唔到啲大既鋪頭試河豚，唯有响supermarket買一盒劏咗既黎試，咁就～～～唉！早知媽咪就陪爸爸入鋪頭食，或者鋪頭嗰啲新鮮啲，咁就無事啦！爸爸番黎之後兩個幾禮拜都完全無胃口，成日攰到攤响床度，又要去醫院驗呢樣驗嗰樣，攪到媽咪幾鬼驚，好彩唔係好嚴重咋！

爸爸話，河豚又貴又唔好食，仲要食到肝炎，真係賠了夫人又折兵！

最煩～～

媽咪以為皓皓又大咗一歲，照計去旅行應該輕鬆咗，點知．．．．大個仔咗既皓皓，開始要求都越黎越多～～

皓：媽咪，可唔可以食三粒糖呀？

媽：食啦！

皓：媽咪，我想飲提子汁呀！

媽：呢部汽水機無提子汁喎！飲cc lemon好唔好？

皓：唔得，我一定要提子汁．．．．

媽：咁睇吓前面架機有無啦！

皓：媽咪，有未呀？有未呀？媽咪，媽咪．．．．（一直'媽'到買咗為止）

皓：媽咪，可唔可以拆呀？（玩具）

媽：响街街度唔可以玩架，會跌晒落地．．．今晚番酒店先玩啦！

皓：媽咪，番酒店未呀？媽咪呀，媽咪，我想番酒店．．．．

唔係講笑，成個trip裏面，皓皓真係'媽'到你暈；有時火到黎，忍唔住都要鬧到佢收口！皓皓，媽咪都唔想架，但係你啲絕世煩音，真係好難頂！

不過，皓皓都有抵讚既地方，就係全程無lur爸爸媽咪抱，有嘢玩有嘢食就落地行，攰或者想瞓嗰陣就坐bb車，都不枉爸爸媽咪專登為咗旅行走去買架新既bb車！

之前架bb車陪我哋去咗三次旅行，終於抵受唔住光榮引退．．．

爸爸媽咪不斷物色一架又唔貴又可以完全拉低俾皓皓瞓覺既車，

最後買咗呢架！皓皓話呢架係佢既黑色戰車！

最開心～～

對媽咪黎講，可以日日一家人一齊又食又玩，日日望住皓皓既笑臉，完全唔駛理工作既嘢，已經超開心架喇！仲要去我哋至愛既日本喎．．．．．

不過今次旅行冇disneyland，冇hello kitty land，冇包包超人博物館，冇USJ。。。。媽咪就好擔心皓皓會悶。好彩最後响outlets有嘢玩，動物園又有小型遊樂場，即食麵發明館皓皓又玩得好開心。。。皓皓玩得開心，媽咪剩係望住佢，自己都已經覺得好滿足呀！

三歲幾既皓皓識既嘢越黎越多，有時講嘢會攪到爸爸媽咪笑到肚痛．．．．好似有一日咁，有個日本小朋友同皓皓講嘢，皓皓走過黎同媽咪講：佢gu lu gu lu gu lu，都唔知佢講嘜？皓皓，人哋何嘗唔係覺得你講廣東話係gu lu gu lu gu lu呢？

媽咪諗番皓皓由第一次去旅行，行都未識行，到而家跑跑跳跳，又識要求呢樣要求嗰樣，個感覺真係幾得意。下年，皓皓再大一歲，唔知到時又會係點呢？好期待！

唔知出年，皓皓你仲會唔會咁鍾意包包超人同戰士呢？

最驚嚇～～

話說第一晚住酒店，皓皓瞓到三更半夜，突然摷醒爸爸，問：

爸爸！點解嗰度有個人既？

吓！！！！！！唔係呀化！！！！咁恐怖！！！！

爸爸都有啲慄，指住塊鏡同皓皓講：嗰塊係鏡黎架！你係咪見到皓皓你自己呀？

皓皓一臉惘然咁答：係喎！然後瞓番低．．．．

究竟皓皓見到嘜呢？冇人知！

不過响呢件事上面，真係要俾十個讚爸爸呀！因為當晚媽咪瞓到成隻死豬咁，嘜都聽唔到．．．．．而爸爸知媽咪細膽，預計到講俾媽咪聽之後，媽咪黎緊嗰兩晚肯定會驚到瞓唔著，所以就忍到番HK嗰日至同我講．．．．

真係估唔到，爸爸竟然會咁細心呀！

最出血～～

唔駛問一定係食嘢買嘢啦！尤其是yen價去到10咁滯，真係堅出血架．．．．唯一一樣慳啲既就係交通！因為大阪地方集中，我哋今次又唔住梅田住心齋橋，搭車都搭少啲．．．．

不過食方面～～真係慳唔得囉！爸爸媽咪咁鍾意食，加上去旅行都係想享受吓啫，冇理由慳住慳住架嘛！

至於買嘢～～更加冇得慳啦！爸爸媽咪都咁鍾意日本brand，又要買好多手信，所以．．．又係嗰句：超晒budget！

好啦！循例都要影吓啲戰利品喇～～

部份手信～～

影既時候，皓皓係都要攪亂檔，話佢又要影喎！

平時叫極佢都唔企定定影，而家就係要話影阻住晒，吹脹！

今次買得好少衫俾皓皓咋，因為好多brand都冇kid size，

始終都係東京買得多嘢啲～～

每次去旅行都橫掃千軍既爸爸都買少咗好多呀～～

媽咪平時放晒啲彈藥買皓皓既嘢，今次皓皓既嘢少咗，

反而媽咪既嘢就多咗～～

後記寫畢，多謝收看！

出年，好想去番東京呀！爸爸都係咁話！

朋友話我哋兩公婆好啱key，剩係鍾意去日本，

嗜好又相同．．．．都係架！

不過，今次皓皓坐飛機全程冇扭計，

出年，係咪可以考慮吓遠少少既地方呢？

 

Ho Ho in Osaka 2011~~ Day 4^^The Instant Ramen Museum

7月2日(星期六)

Day 4

Hotel→The Instant Ramen Museum→梅田 →Hotel→關西空港 

今日係我哋大阪之旅既last day，例牌搭６點機，４點前要到機場，可以玩既時間唔係好多。。。。話說今次原來係爸爸媽咪第一次要自己搭車去關西空港搭飛機(因為有兩次係由大阪入，東京走；一次係自駕遊），所以要預番鬆少少時間，免得唔熟路要趕頭趕命。。。

好記得有一次响日本番黎，飛機最後召集，但我哋同朋友幾條友仲排緊隊過關，最後機場既工作人員協助我哋打尖，過完關我哋仲要奪命狂奔咗一段好長既路程，上到機俾全機既人望住。。。所以呢～～而家真係唔敢預時間預得咁盡！計埋計埋，今日只有４個幾鐘玩，去邊好呢？？

就去上次黎大阪去唔成既～～即食麵發明記念館啦！

皓皓朝早唔願起身，加上要check out，結果me me麼麼，攪到９點至起程～

去呢個記念館要响梅田轉車再到池田，所以我哋索性去到梅田先食早餐。

大概半個鐘車程就到喇！後面就係發明即食麵既安藤先生像～～

安藤先生既發明實在太偉大喇，有咗佢，夜晚肚餓唔駛愁～

尤其是爸爸媽咪呢啲'無飯夫婦'。。。

黎到第一件事，就係即刻衝去最受歡迎既My Cup Noodle Factory，

製作一個自己設計，獨一無二既杯麵。。。。

禁咗個杯出黎之後，首先要消毒雙手～～

跟住揀個位坐低，準備就緒～～

個位已經擺好晒顏色筆，仲擺咗日清隻雞仔logo圖响度，

等我哋可以跟住黎畫。。

皓皓好似好期待好興奮咁。。。

本來諗住只係整１個杯麵，但係咁樣，皓皓一定搶住畫，

咁媽mi咪無得玩？都係買兩個杯穏陣。。。

果然如媽咪所料，皓皓拎住個杯畫呀畫，唔俾媽咪插手～～

皓皓好專心好聚精會神咁，究竟畫咗啲咩呢？

搞掂喇！

皓皓好大聲咁嗌：媽咪，你睇吓！hahaha。。。

(好似好滿意自己既傑作喎！)

媽咪叫佢再畫多啲嘢上去，於是佢又攞第二枝顏色筆繼續畫～

yeah！終於畫好喇！

皓皓搶埋媽咪畫嗰個杯，手舞足蹈～～

好喇，係時候欣賞吓我哋既傑作。。。

媽咪創作～～包包超人＋皓皓豬仔樣 ^.^

皓皓創作～～五顏六色鬼畫符 ^.^

媽咪叫爸爸幫皓皓畫隻日清雞仔，呢！右手邊黑色嗰隻～

嘩！簡直係大師級傑作。。。一睇就睇得出嗰隻係家禽

設計完畢，就要去排隊入麵餅、揀配料、密封。。。

皓皓見媽咪畫嗰個杯麵有佢個樣，就夾硬要媽咪同佢交換。。。

就快輪到我喇，緊張～～

自己轉動個機器，令個麵餅壓入個杯度～～

然後揀４樣配料。。。

姐姐係咁叫媽咪影相留念，咁就影埋佢個樣啦！

最後一個步驟～～密封。

望到眼定定～～

咦？點解咁耐都未跌落黎既？？

有喇！有喇！仲有一個。。。。

齊晒！兩個都封好喇！

一個獨一無二既杯麵就此誕生。。。

(請再欣賞一次大師級既作品～～)

最後，仲可以包靚個杯麵：

入袋 & 泵氣～～

靚唔靚呀？

巨型杯麵～～

我哋整完既時候，人潮多咗好多～～

呢條拉麵長廊介紹即食麵既歷史。。。

嘩！好多杯麵個樣都未見過。。

因為我哋仲想响梅田行一陣，

所以我哋整完杯麵，係咁咦行個圈就走喇！

去到梅田，得番唔係好多時間，剩係行Yodobashi算喇！

不過真係唔願走，超大超多玩具。。。

就係呢度，見到之前買俾皓皓既包包超人積木，

平1000幾 yen呀，陰公！

皓皓當然大有斬獲，食嘢嗰陣就要拆黎玩。。。

日本已經做完炎神戰隊，而家興緊海賊戰隊，

我哋幾經艱辛，先至搵到呢隻戰神合體，

全間玩具店唯一既一副炎神玩具，當然即買啦！

雖然香港都有，不過見皓皓開心，無計啦！

得半個鐘多啲既時間食嘢，好彩都搵到間正嘢！

啲料極正，食到我哋 lam lam脷！

食完個超正魚生飯就趕返酒店攞行李出發去機場。。。

呢度既機場巴士得三班，一班十點幾開，早得滯；

一班三點開，又覺得趕得滯。。。

最後我哋選擇搭的士去南海難波搭南海電鐵rapit(上圖)～～

的士起錶660yen，司機响酒店門口排咁耐，見我哋車程咁近都冇詐型，

仲好有禮貌好熱心幫我哋搬行李，所以我哋俾咗1000yen佢，

Haha，第一次搭的士俾咁多'貼士'。。。

今次預鬆咗時間，所以黎到機場仲可以食吓嘢買吓嘢。。。

每次去旅行，爸爸媽咪都好想將用剩既散紙駛晒去

上機喇，我哋又要再別日本喇～～

返到香港lu～～

皓皓b第四次日本之旅結束～～