Ho Ho in Osaka 2011~~ Day 2(part 2)^^嘆和牛+暢遊道頓堀川

6月30日(星期四)

Day 2(part 2)

Hotel→黑門市場→天王寺動物園 →難波/心齋橋→Hotel 

上回講到我哋忍受唔到超猛既太陽，加上皓皓眼瞓，結果我哋比預期早咗離開天王寺動物園～～

原本諗住响動物園同埋新世界附近逛到五點左右，跟住番難波行吓＆食晚飯，而家早咗幾粒鐘，又唔想曬，點算？唯有～～行有冷氣既商場啦！

＠大丸。。。。皓皓話想玩撈公仔，210yen撈1次，是旦拉！

不過個網一撈就穿，我哋只係撈到3隻。。。。

撈到5隻以下，就送3隻公仔，皓皓自己揀咗呢3隻～～

玩砌積木既時候，俾1個小弟弟蝦，皓皓攞嘜玩佢就搶嘜，

一向嗲到暈既皓皓一邊向媽咪投訴一邊喊到劏豬咁。。。

爸爸出馬，扮怪獸陪皓皓用積木玩對打，皓皓先至破涕為笑～～

玩完包包超人積木，即刻話要買一副，爸爸好豪氣咁話：買啦！

皓皓老實不客氣，揀咗全場最貴既一盒。。。

媽咪見係咪都要破財，就乘機同皓皓講吓數，

話買完玩具即刻要坐bb車瞓覺。

（事關佢為咗玩死撐咗好耐，眼瞓都唔肯瞓。。。）

最後皓皓應承媽咪，好！咁就買啦！不過。。。。

後尾响一間玩具店見到，呢盒積木竟然平千幾yen，好唔開心！

皓皓好講口齒，買完副玩具即刻上bb車，唔駛5分鐘就瞓著。。。

爸爸媽咪諗住聽日７.１大減價先至全力出擊shopping買嘢，

所以今日真係hea住咁行(好似未試過去旅行hea得咁交關)～～

我哋買完嘢仲番酒店擺低，咁就唔駛拎，再hea啲。。。

順便又攪枝奶俾皓皓飲。。。。

我哋朝早响黑門市場食到好飽，所以等埋皓皓瞓醒，

先食呢餐遲來的lunch～～勁正既和牛！

侍應問我哋食sukiyaki定係shabushabu，話坐唔同既層數喎。。。。

吓？媽咪兩樣都想食，原本仲諗住每樣1 set添～～

結果我哋嗌兩set sukiyaki。。。。

好香！好正！雖然比唔上上年响淺草食嗰餐，不過我哋已經好滿足！

啱啱瞓醒既皓皓勁扭計，要出動ipad俾佢聽歌打機先平靜落黎！

最後都好乖，食咗成碗飯，叻叻！

坐低食完嘢，攤抖完，加上收咗太陽，

我哋又有energy shopping喇。。。

黎到高島屋門口，見有個男人拖住隻好似葵鼠既寵物出街。。

我見隻鼠好似好想掙脫條繩咁。。。。

咁細隻，條街咁多人，容嘜易俾人踩死架！好噁心呀！

又抽獎喇！黎親日本都一定會駛啲錢玩抽獎至安樂！

行到七點幾，我哋決定趁人少少，

黎咗食好出名既'夫婦善哉'先～～

响鋪頭門口已經話好鍾意個燈籠，所以買咗個迷你既俾佢。。。

睇佢幾開心！

我諗好多人都知，呢度獨沽一味，得紅豆沙食。。。

一份紅豆沙分兩碗上，據說兩公婆黎食，可以令婚姻美滿咁話喎！

當然呢啲只係噱頭，一份既價錢都唔平，

不過都幾得意，試一次無妨！

糖水甜到漏，媽咪爸爸都鍾意食甜，但係都受唔到甜成咁。。。

响媽咪既督促下，爸爸勉強食晒自己嗰份～～

皓皓就好鍾意食嗰兩粒湯圓，食完仲想食。。。

夫婦善哉隔離就係法善寺既不動明王像，

我哋都認為影佛像唔係咁好，

不過都有學人哋咁入錢向佛像澆水祈福。。。

哈哈，爸爸媽咪叫皓皓學固力果嗰標誌咁金雞獨立，

皓皓整極都整唔到，最後索性响度耍功夫。。。

我哋又食嘢喇。。。。

媽咪話早午兩餐食得豪，夜晚要慳儉啲，食金龍拉麵～～

當然慳儉係講笑啫，事實上係我哋一家三口都好鍾意食拉麵。

金龍既拉麵落咗啲胡椒，諗住皓皓唔會食得出，

點知佢都嗌辣！不過佢好攪笑，一面嗌辣一面cher住食～～

呢日最後一個節目，就係坐遊覽船暢遊道頓堀川喇！

一面享受晚風吹送，一面欣賞道頓堀兩旁既夜景。。。。

都係一個幾寫意既節目，點解之前黎過幾次大阪都冇諗過坐既呢？

美中不足係聽唔明導賞者講嘜，介紹緊嘜。。。。

不過好攪笑，沿路既人都同我哋揮手。。

落船一刻。。。。

上船前我哋將架bb車泊咗响岸邊，

皓皓好掛住佢呀，一上岸就話去搵車～～

同隻遊覽船影張相先～～

道頓堀橋上留影～～

今日節目豐富，大家都攰喇，所以早啲番酒店抖抖～～

最重要既，係皓皓好掛住佢副包包超人積木呀，佢話好想番酒店玩喎！

 

～～Day 2完～～