12月25日(星期日)
平安夜玩到好夜,不過第二朝都唔可以瞓到好晏,因為。。。。。我哋要去婆婆屋企開party呀~~聖誕節响婆婆度開大食會,已經攪咗幾年架喇,因為公公婆婆鍾意熱鬧,最鍾意啲仔仔孫孫聚首一堂,所以媽咪每年都會趁聖誕節開大食會,大家開心吓咁囉~~
例牌舅母負責整沙律,雞軟骨,墨丸龍蝦丸等等,真係好好味架~~
唔識整嘢食既媽咪就例牌負責買外賣,pizza hut啦,壽司啦,太興燒味啦。。。。
未開始前,表姐係咁捉住皓皓玩自拍~~
心心表姐,詩詩表姐&軒軒表哥。。。。。
媽咪每次見到佢哋四個一齊玩就覺得好開心~~
皓皓隻碟白雪雪。。。。因為皓皓淨係食壽司飯,所以隻碟好乾浄囉~~
送聖誕禮物時間~~~~
媽咪準備咗四份禮物俾四個小朋友~~
其實皓皓已經有好多聖誕禮物,所以本來淨係買咗三份,
不過後來又諗到,皓皓如果見到表哥表姐有禮物而自己冇,唔知會唔會好唔開心。。。。
越諗越唔對路。。。。。結果爸爸即刻去反斗城補飛,買多份俾皓皓。。。。
軒軒表哥仔既聖誕禮物係一隻遙控比卡超~~
皓皓最近愛上睇喜羊羊既故事書,所以爸爸買咗架喜羊羊車車俾皓皓~~
皓皓睇到份禮物之後勁開心。。。。。haha~~好彩補飛買番份俾皓皓咋,
如果唔係,佢見人人有份得佢冇,肯定會好失望。。。。
開完大食會我哋就要急急腳走喇,因為我哋仲要趕去下一場。。。。。
就係小白鷺喇~~~
呢日响小白鷺會有啲攤位遊戲玩,夜晚就食buffet,上網睇見啲攤位都好似幾ok咁,
所以爸爸就託個friend買咗五張套票for我哋一家再加埋芬姨同心心表姐。。。。。
一黎到,第一個目標就係衝去充氣彈床。。。。心心表姐鍾意玩嘛~~
皓皓有表姐陪玩就特別開心~~
玩完彈床,就洗乾淨手。。。。。開始自製曲奇~~
搓搓搓。。。。搓完又禁,禁完又搓,媽咪覺得啲麵粉俾佢哋搓到好核突呀。。。。
整完就落啲朱古力碎。。。。。
haha~~~皓皓既傑作:一棵聖誕樹^0^
跟住就交俾嗰度啲職員,幫我哋拎去焗15分鐘就得架喇~~
等焗曲奇期間,我哋爭取時間,又走去玩第二個攤位,就係整沙畫喇~~
皓皓當然唔係太識,所以爸爸媽咪要從旁協助~~
完工喇。。。。係間屋黎架,靚唔靚呀?
皓皓自己都覺得好滿意喎。。。。。俾個five爸爸先~~
心心表姐嗰幅都攪掂喇。。。。。
整完沙畫,時間啱啱好,皓皓同心心表姐既曲奇焗好喇~~
攞番曲奇之後,又去咗個做小手工既攤位玩~~
整完小手工,我哋就轉移陣地,出去室外玩喇~~
著晒救生衣做嘜???
咪係去划船囉。。。。爸爸第一次划船架咋~~
媽咪有啲擔心反艇,不過爸爸好似好有信心咁,堅持唔坐水上電單車,係要划船喎。。。。
結果。。。。我哋隻艇响岸邊漂咗一段時間,終於漂到去湖中央。。。。
OK啦。。。。出到湖中央,爸爸開始慢慢掌握到撐艇既竅門,最後又可以撐番埋岸,
第一次撐艇,算係咁喇~~
撐完艇去餵羊羊~~
皓皓最鍾意餵呢隻羊BB,可能佢最細隻最得意啦~~
就快要食buffet喇。。。。最後衝刺,整沙樽~~
好認真呀皓皓~~
呢個係皓皓既完成作,七彩繽紛,都幾靚架。。。。
不過可能啲沙塞得唔夠實啦,第二日啲沙已經撈埋一堆,唔知似嘜lu~~
haha,不過都係志在玩既過程啫,無所謂啦~~
呢度就係食buffet既場喇~~
佈置得好有聖誕氣氛~~~~
陣間仲會有玩遊戲同抽獎環節添~~~
聖誕老人派禮物~~
雖然只係啲好平既小禮物,不過小朋友已經好開心,個氣氛都唔錯~~
自助餐中段開始玩遊戲:首先玩bingo~~
我哋都有中獎呀~~~
跟住邀請小朋友上台玩遊戲,媽咪第一時間拖皓皓出去玩,初初諗住皓皓唔肯上去,
點知行到出去,佢又肯喎~~
究竟玩嘜?就係輪流扮聖誕老人既笑聲:hohohoho~~~~
皓皓呢個怕醜仔,講到蚊滋咁細聲,相信全場人都聽唔到,haha~~~
仲要超緊張,係咁扯衫袖同埋搣手指。。。。。
不過媽咪已經覺得皓皓好叻架喇,起碼佢克服咗恐懼,夠膽企上台面對咁多人。。。。
事實上,台上有咁多個小朋友,皓皓係最細既一個,
所以媽咪真係好開心見到皓皓呢晚既表現~~~
本來食完buffet仲有一個環節,就係出去湖嗰度放船仔,
不過職員話呢日潮水高漲,所以臨時取消咗呢個環節,攪到心心表姐有啲失望添。。。。
總括黎講,呢晚buffet既質素麻麻,梗係啦,聖誕buffet閒閒地都成千蚊一位,呢度平一半,食物當然唔會太好,不過呢度真係幾有聖誕feel,皓皓同心心表姐又玩得好,好,好開心,所以都算物超所值既~~~