BBQ night～～平安夜

12月24日(星期六)
今年既平安夜，我哋一早就安排咗節目～～就係BBQ喇！早一個禮拜已經聽天文台話，今年既聖誕會好凍．．．．．．果然，平安夜既氣溫低過10度！！雖然寒風凜凜，不過依然無損一大班人一齊玩既心情～～～～

夜晚7點左右黎到西貢，已經人山人海喇～～

呢度計人頭收費，提供既嘢食當然係普通貨色，不過平安夜，度度都咁多人，有位燒已經算係咁喇～～

 

同埋我哋都係志在一齊聚吓玩吓吹吓水～～～



再加上我哋自己買咗一大堆海鮮去燒，又蝦又扇貝又鱔．．．．．實在太正喇！



皓皓成晚都不愁寂寞，一係燒吓腸仔，一係走出去裝蘋果汁．．．．．

再唔係同哈哈哥哥玩吓IPAD，都不知幾爽～～



哈哈哥哥同皓皓相差七個月，年齡相若，所以特別啱key～～
哈哈哥哥真係好cute，係典型既百厭仔，仲好識講嘢，氹得人好開心架～～
皓皓對住陌生人就好怕醜好文靜，媽咪都好想皓皓可以多啲同哈哈哥哥玩，感染吓哈哈哥哥既開朗～～



緊張時刻．．．．．抽no.交換禮物～～

其實媽咪同哈哈媽一早約定咗，兩個小朋友互換禮物．．．．
不過我哋就照俾佢哋兩個抽no.黎營造吓緊張氣氛～～

果然，皓皓以為係自己叻叻，抽到份大禮物．．．．

 

睇吓佢幾興奮～～～



交換完禮物，影番張大合照先～～

Bear Bear契爺話要同兩個契仔影番張相．．．．．計媽咪話，不如契爺你快快趣趣生番個，
咁就可以三兄弟成日約埋一齊玩啦！

呢晚玩完番到屋企已經成一點，皓皓唔知係咪興奮得滯，竟然瞓唔著，
仲要攞份禮物出黎玩咗成半粒鐘，先至肯入房瞓覺，正一爛玩豬！
不過一晚半晚，算啦！