關西食玩買之旅2013~~Day 2(part 2)^^ Universal Wonderland＠USJ(下)

5月16日(星期四)

Day 2：酒店→USJ→梅田→難波→酒店


Universal Wonderland＠USJ(下集)～～繼續．．．．．．

上次講到皓皓玩完Hello Kitty轉轉糖果杯，就急不及待跑過去芝蔴街園區～～
因為呢度，有皓皓期待已久既玩意～～Elmo Little Drive



Elmo 小兜風係畀3-5歲小朋友玩既渣車遊戲～

芝蔴街卡通造型車，超級可愛！

可以渣車扭呔盤掟彎．．．．係皓皓既超級至愛～～



渣完一轉，即刻跑去再玩～～
職員姐姐同佢傾咗幾句，只見皓皓怕怕醜醜咁．．．．．
唔知講嘜呢？

第二轉好少人玩，連埋皓皓，只有兩個小朋友，
所以皓皓呢轉渣得最快最爽．．．．．．



last 1 round．．．．皓皓話要坐埋黃色呢架喎．．．．．．．
呢轉最多人，有啲小朋友唔係好識控制架車，所以呢轉皓皓要行吓停下，
不過佢有得玩已經好開心～～

渣完車玩旋轉木馬，又玩咗三次～～

呢日天氣好熱，又曬，爸爸媽咪開始頂唔順，要入室內有冷氣既地方抖一抖～～

芝蔴街園區有個indoors既遊樂場，裏面有個大波波池同其他遊樂設施～～

 

 包括呢個．．．．Elmo泡泡遨遊～～

其實同普通坐船仔冇嘜分別，不過臨尾有一小斜坡畀船仔俯衝，跟住水花四濺～～
名副其實係小兒科既玩意，但對皓皓嚟講，已經好刺激好好玩架喇～～



爬繩網～～

裏面既餐廳，當然唔少得芝蔴街造型既嘢食啦～

呢杯汔水正呀，又大杯又冰凍，爽！
飲完個樽仲可以當水壺添呀！
玩完室內回吓氣，我哋又出番室外～～

頭先講話皓皓勁愛渣車．其實呢度除咗有Elmo小兜風外，仲有個芝蔴街大兜風～～
大兜風啲車大架啲，快啲，應該難控制啲；但呢度既車場大好多，
行車線多，十字路口呀彎位又多，睇個樣好玩好多～
不過呢，芝蔴街大兜風係畀6-12歲小朋友玩既．．．．．



皓皓未夠六歲，但媽咪見皓皓好想玩，所以都照畀佢排．．．．．
排緊既全部都係啲大哥哥～～
對比太大，職員其實都懷疑皓皓未夠秤～～

雖然皓皓得五歲，不過媽咪有信心佢舞得掂架車．．．．．



果然．．．．．控制自如．．．．係踩腳踏辛苦少少囉！



呢個場大好多，可以渣得快啲～～

 玩咗兩次，夠皮未呀，皓皓？

 

沖涼鴨？即刻諗起尖咀隻巨鴨～～



跟住又入室內抖抖～～

呢條滑梯正面睇無甚特別～～

但側面睇呢？原來係隻高踭鞋嚟架！

其實入呢度主要目的係搵kitty影相～～

 

皓皓真係幾冧hello kitty架，睇佢笑得幾甜．．．．．

最後去埋Snoopy Studios～～



又有呢類抽獎，走唔甩啦．．．．皓皓抽咗兩次！

 

竟然．．．竟然抽到大獎～～
Snoopy脂肪計算器＋電子磅．．．．
嘩！真係大整蠱，個磅重到嘔！



Snoopy園區有得坐水泡'sir'長滑梯同埋坐過山車，不過皓皓好似有啲驚．．．．
所以齋玩呢個飛天史努比算喇！(最初坐上去佢都有啲緊張)
可以自己控制隻史努比高飛低飛，飛完之後皓皓話好好玩～～

同呢個公仔影相最慘情呀．．．．
因為隻公仔睇唔到皓皓，隻手拍咗落皓皓左眼度．．．．

 

皓皓即喊，嚇到公仔即刻要氹番佢～～
(不過皓皓一路喊，一路又話要同公仔影埋張相．．．．)
媽咪雖然知道只係意外，但見到皓皓隻眼紅晒，都幾心痛！
好在隔咗一陣啲紅腫就散咗咋！

估唔到USJ都有呢啲攤位遊戲，皓皓又lur住要玩～～


皓皓拋入咗但係個波彈番出嚟，最後空手而退，皓皓勁失望～～
媽咪唯有應承皓皓臨走買隻公仔畀佢～～

玩完wonderland，其他嘢我哋都冇玩喇！皆因皓皓細膽嘛，我哋又唔想淨係自己玩～～
算啦！皓皓，等你個膽大啲，先陪我哋玩Spiderman,Jaws,Back to the future．．．．啦！
爸爸媽咪等你呀！


或者有啲blog友都知，爸爸媽咪都有條畫畫癮，所以呢．．．．．
我哋又走咗去畫全家福～～
上次嚟都想畫架喇，不過皓皓扭計，同埋唔夠時間，最終畫唔成囉～～

 呢幅畫用咗3000幾yen，畫得唔係太靚，
不過都幾得意既，當留個紀念啦！
(爸爸話畫到佢成個顧修全咁款喎．．．．．wakaka！笑死咗！)

Hello Kitty show~~

畫完畫，又再抽吓獎，最後去行埋啲shop買手信禮物，跟住就離開喇～～

Bye！USJ！等皓皓再大個仔啲，我哋至再見面啦！



離開USJ,即刻'貢'入一間迴轉壽司，成家人搏晒命咁狠吞虎嚥！
梗係啦！我哋玩到三點幾四點，都仲未食lunch呀！


Day 2～～待續<

關西食玩買之旅2013~~Day 2(part 1)^^ Universal Wonderland＠USJ(上)

5月16日(星期四)

Day 2：酒店→USJ→梅田→難波→酒店

好耐冇見喇，Universal Studios Japan，別來無恙吧？
記得第一次嚟，爸爸媽咪仲係拍緊拖，唔駛照顧小朋友，當然係可以玩得好放；鍾意既就玩，人龍長？冇所謂。。。。照排！對我哋嚟講，USJ內所有嘢都好新鮮，好好玩。。。。嗰一次，都幾難忘！
到第二次嚟，皓皓未夠兩歲，佢所有嘢都未識玩，加上天氣凍，皓皓好扭計～～見到皓皓扭計，爸爸媽咪嘜嘢MOOD都冇晒！好記得，爸爸只可以自己一個去玩spiderman，媽咪要湊住皓皓，咁樣又點會好玩呢？所以玩咗一次，爸爸都冇再玩第二樣嘢喇！呢次係皓皓第一次踏足USJ，但感覺唔係太好。。。。
爸爸媽咪都話，要等皓皓到六歲七歲，夠膽玩裏面既遊戲先會再嚟USJ。不過上年三月開幕既Universal Wonderland，令爸爸媽咪等唔切喇。。。。。

媽咪一睇到啲介紹，立即雙眼發亮：嘩！好靚！啲設施好啱皓皓玩，皓皓一定鍾意呀！


Universal Wonderland共分為三個以不同卡通人物做主題既園區，包括：
Hello Kitty Fashion Avenue～

Sesame Street Fun World～～


同埋Snoopy Studios～～
三個園區設計到好色彩繽紛，好吸引～～
就係咁，為咗呢個Universal Wonderland，爸爸媽咪選擇再遊大阪！

上網check過，USJ呢日開9:30，我哋諗住入到去先食早餐～～
由難波去USJ，唔駛由地鐵轉JR咁麻煩，直接行過去JR難波站，
搭車到西九条站，再轉ゆめ咲線到ユニバーサルシティ站即達，
方便快捷，價錢亦最平～～

全個車程唔駛半個鐘～～

皓皓好鍾意架USJ列車，我哋專登等度門閂埋然後影相，靚啲。。。。。

到站後，大大個 Universal Wonderland既廣告～～



先去食早餐，幫襯麥當當係因為皓皓睇中咗開心樂園餐件玩具：由布院列車！
見到架玩具車，好懷念九州之旅～～

响呢個'到此一遊'影相點，循例都要影吓相啦～～

 

門口位，又影～～




雖然係平日，但都好多人。。。。
趁爸爸排隊買飛，媽咪同皓皓入啲shop度睇吓嘢涼吓冷氣～～



一早同皓皓講掂數：要臨走至可以買紀念品。。。。
而家齋睇唔買～～～

睇咗一陣，終於排到我哋喇～～
媽咪因為入咗USJ MEMBER，所以生日月份買入場券有九折，
雖然折扣唔多，但慳得一蚊得一蚊嘛～～





一入到去已經見到好多卡通人物～～
隻公仔玩得好投入，反而皓皓好似冇嘜反應咁。。。。。



儍豹呀！皓皓當然唔知佢係嘜水啦！



開始唔耐煩，話媽咪影相影咁耐，仲唔同佢去玩喎。。。。。



行到嚟喇！皓皓好興奮！

 

見到主角之一：Snoopy～～

 

 

仲有Sesame Street中皓皓至愛既Elmo～～

唔知係咪復活節先有得玩既egg hunt～～

只要搵齊幾隻復蛋既所在地，就有獎品。。。。
獎品有幾款，但包實晒，冇得自己揀。
皓皓好想抽到elmo～～


拆喇拆喇。。。。超緊張～～
有冇咁好彩真係抽到elmo呢？


嘩！好lucky！真係抽中呀！
睇吓皓皓個樣。。。。。幾滿足！





先玩Hello Kitty糖果轉轉杯。。。。。
(個名係媽咪自己作既，因已忘記名稱)



呢啲level咁低既遊戲，實在太啱細膽豬皓皓，haha～～


响USJ實在影得比較多相，所以呢。。。。。
下回再講皓皓呢日响Wonderland既wonderful經歷～～



Day 2～～待續