皓皓5歲生日前奏篇～未生日，先興奮！

3月30號係寶貝仔皓皓既5歲生日，前年媽咪已經想話幫皓皓開生日會，但係當時皓皓未讀幼稚園，朋友仔唔多，所以最終打消咗個念頭；上年諗住可以請同學仔嚟生日會熱鬧吓，點知怕醜仔皓皓一聽到話要同同學仔一齊玩遊戲，即刻耍手兼擰頭，所以爸爸媽咪都唔勉強佢。。。。。今年，再問皓皓想唔想請埋同學仔嚟開生日會，心裏面都係諗住一切跟皓皓意願，佢話想咪開囉，等佢開心吓嘛；如果佢仍然抗拒既，咁就同屋企人慶祝就算喇～～

結果？都有少少意外，皓皓竟然肯開喎。。。。原因？應該係受同學仔影響卦！話說有次皓皓出席同學仔生日會，見到人哋收到好多禮物，雙眼發晒光咁滯，仲流露出好羡慕既神色。。。。當媽咪問皓皓既時候，佢只係聽見要一大棚人一齊玩遊戲嗰刻有一絲絲既猶疑，之後就好堅定咁話自己唔驚，一定要開咁話喎～～



於是，爸爸媽咪就去麥當當落訂。。。。。
當媽咪寫邀請卡既時候，皓皓表現得好興奮，除咗幫手唱名畀媽咪寫卡之外，
仲好積極咁幫手遞信封啦，痴貼紙啦。。。。
見到佢咁，媽咪都開心埋一份呀！


除咗送個生日會畀皓皓之外，爸爸媽咪仲精心挑選咗份生日禮物畀佢。。。。。。

就係波衫喇。。。。。。

勁開心～～

事關呢隊係佢既愛隊之一：曼聯！

除咗曼聯，皓皓既愛隊仲有皇馬同巴塞。。。。。
話說有次爸爸踢winning叫皓皓揀一隊球隊，皓皓爆笑地答：
我隊隊都鍾意喎！皇馬有c朗，巴塞有美斯，曼聯有雲佩斯，我全部都鍾意，你叫我點揀喎？

所以呢，爸爸就幫皓皓套波衫印埋字。。。。。
佢既三大偶像之一～～雲佩斯！

爸爸送曼聯，媽咪就送皇馬。。。。。

皓皓持續亢奮中。。。。。

買皇馬，當然就印C朗啦！
皓皓問：點解冇個C字既？
HAHAHA。。。。。又係喎！點解呢？

最爆笑係，有一日，皓皓同芬姨暗示，佢有雲佩斯同C朗，爭件巴塞美斯喎。。。。。
搞到芬姨即刻想仆去買件畀佢～～～
可惜冇晒皓皓既SIZE，亦冇晒美斯既字，冇得買～～～

另外，爸爸媽咪亦提早送咗呢兩份玩具畀皓皓～～
將donut & hamburger全部疊起，跌咗就輸架喇～～
成功疊起，開心到振臂歡呼！

除咗爸爸媽咪，仲有芬姨提早送禮物。。。。
離晒譜，竟然送咗成堆戰隊玩具畀佢～～

海賊戰隊啱啱開始播，皓皓又已經迷上喇～～
除咗左手面枝槍係爸爸媽咪早前買既之外，其餘全部都係芬姨送。。。。
皓皓今次真係發達咯！

生日第一cake～～
好可愛既足球蛋糕。。。。。

皓皓勁LIKE～～

 

呢個蛋糕係畀皓皓帶番幼稚園開生日會既～～
因為放復活節假既緣故，三月份既生日會提早响22號舉行，
皓皓知道自己係生日會主角，心情好好好好。。。。好靚囉！


今年皓皓未到30號正日生日，已經收到連連驚喜；
至於生日會實況同正日慶祝活動，下篇再講喇～～

三月份雜記

3月2號，爸爸既表弟個b滿月酒，皓皓同較少見面既表叔＆表妹合照～～

又約咗哈哈哥哥一家打羽毛球，兩個小朋友打到碌晒地，好似浮誇咗啲喎，兩位！

下學期觀課日，媽咪請唔到假，得爸爸同嫲嫲去～～
爸爸話，好難先影到一張相喎。。。。。辛苦晒！
番嚟叫爸爸報告吓啦，點知佢話：上堂講故事囉，然後出去玩囉，跟住食茶點囉～～
果然係簡而精！

某日又响屋企玩衝力射球，仲大聲嗌：
嫲嫲！你唔好眨眼呀！跟住落嚟會有精彩既入球，就係。。。。
笠射！同埋烏龍球！
Wakaka！烏龍球都叫精彩既入波？

爸爸既中學同學响英國番嚟，仲專程帶咗件波衫畀皓皓，真係多謝晒呀！

又去踢波。。。。。

今次有軒軒表哥仔陪踢～～

而家比較鍾意痴住表哥玩，始終成個屋企裏面，表哥同佢既年紀最接近，最啱玩～～

送畀媽咪既復活節卡。。。。
第一次寫自己個名。。。。。到宜家，佢已經識寫晒自己成個名喇！
爸爸媽咪見皓皓K2先開始學啲簡單既中文字，真係估唔到佢會咁快識寫自己個名～

某日出街等巴士既時候影既，拎住KITTY，係咪好女仔呢？

又嚟羽毛球日，不過今次唔係同哈哈哥哥打，係懿晴姐姐～～

3月27號，去咗數碼港個PLAYROOM玩～～

好耐冇同皓皓嚟玩啦，呢日見冇嘢好做，又唔想同佢踢波，所以就嚟呢度喇～～
（註：陪皓皓踢波，真係好鬼勞動架！）

夜晚去咗太古行吓，食埋DINNER至番屋企～～
元氣集團既丼丼屋（DONDONYA），估唔到，啲料幾新鮮喎。。。。