關西食玩買之旅2013~~Day 1(part 2)^^美食大放送@黑潮市場

5月15日(星期三)


Day 1：關西空港→貴志→黑潮市場→Rinku Premium Outlet→難波→道頓堀酒店


Day 2(part 2)：勁鍾意食海鮮魚生既爸爸媽咪，嚟到和歌山，當然要嚟黑潮市場啦！

黑潮市場位於Marina City，Marina City係一個人工島，島上除咗有黑潮呢個海鮮市場外，仲有酒店、黑潮溫泉、海釣公園同埋主題公園Porto Europa，算係和歌山市既一大名勝！

要數西日本最大最正既海鮮市場，當然係南紀白濱既とれとれTore Tore市場！

不過白濱太遠喇，如果去白濱玩，就應該要响嗰度租一晚酒店住，否則車錢同時間都會蝕晒～～

可惜既係，我哋未plan行程，就一早book晒三晚大阪市酒店，咁唯有放棄唔去白濱囉！

不過唔緊要，下次啦！一定有機會既～～

上回講到離開貴志駅，我哋搭貴志川線番JR和歌山駅。响車站門口，好容易就會搵到去黑潮市場個巴士站。。。。
初初都驚唔識睇和歌山既巴士線，但原來指示好清楚好易睇，
你只要搵到43系巴士，見到MARINA CITYマリーナ・シーティ字樣就上車啦，總站落，半個鐘到～～

呢個魚市場雖然唔係好大，不過各類鮮味魚生刺身應有盡有。。。。。

我哋行過一檔鋪頭，見到啲花竹蝦好新鮮，鮑魚好大隻，即刻忍唔住要出手。。。。
即買即擋，好鬼鮮味，盛惠2500yen～～
不過爸爸同媽咪都覺得鮑魚刺身質感比較硬，我哋都係鍾意食煮熟既鮑魚多啲，hehe！

 

呢度每日有三場吞拿魚解體表演～～



皓皓由上巴士開始瞓咗覺，去到市場都仲未醒。。。。
我哋食完花竹蝦鮑魚，諗住等埋皓皓先再食嘢，所以就睇咗呢個show先～～

三扒兩撥，就將咁大條吞拿魚解開。。。。
好鍾意食吞拿魚既爸爸，見到呢個解剖場面，其實都覺得有少少反胃～～
古聖賢人講：君子遠庖廚，真係非常有道理！



睇完解體秀，我哋就開始揀嘢食喇～～
唔。。。。。海膽吞拿魚茸飯係爸爸媽咪至愛，點少得？



買兩pack sushi畀皓皓食。。。。
睇見啲牡丹蝦同拖羅，真係流晒口水～～
不過仲未開餐，因為我哋仲未買完。。。。。。



再去買啲海鮮，搞嘜？？？？

因為呢度有個免費BBQ區，畀人即買即燒，夠晒風味！
佢哋仲提供晒調味料，食具。。。真係好周到呀！



嘢食非常新鮮，燒出嚟真係好好味好好味～～



BBQ區係响海邊既，呢餐我哋一面睇海，一面享受陣陣海風，一面嘆新鮮味美既食物，
兩個字：正！！！爽！！！

連埋最初食既刺身，呢餐用咗9000yen左右，爸爸話算係超值～～

呢度係BBQ區外既風光～～

食完嘢，再响市場同埋啲商鋪度逛吓。。。。。

皓皓嚟到日本都要扭蛋，呢隻扭蛋係佢响香港儲開既。。。。。
其實如果唔係啲yen跌咗，呢邊扭蛋係貴過香港架！

呢度仲有個生果村，好多生果買，和歌山出名係柑同紀州梅，
不過，5月份唔係柑既季節，加上我哋仲有下一個行程，要趕巴士，
(巴士一個鐘先得一班？唔知有冇睇錯呢？)
所以冇入去行喇！

 

皓皓身後就係Marina City既主題公園Porto Europa～～
呢座充滿歐洲風情既主情公園，入面有仿法國、意大利、西班牙等等既街景市貌，
亦有好多遊樂設施。不過。。。。。我哋嚟緊兩日都安排咗好多樂園畀皓皓玩，
所以呢個Porto Europa呢，就唔入喇！


享受完豐富美味既一餐，滿足地踏上巴士，繼續我哋既旅程！下回見～～


Day 1～～待續