北海道聖誕飄雪の旅~DAY 3(part 2):熊出沒@登別棕熊牧場

12月24日(星期日)

Day 3：Hotel Gracery check out→札幌中央批發市場→登別石水亭check in→Marine Nixe→棕熊牧場→溫泉街→石水亭


上一篇講我哋响Marine Park Nixe買咗Theme Park Ticket，個套票包咗三個主題公園，除咗Nixe，仲有。。。。熊牧場～～
睇資料講，當年為咗保護＆放牧8隻蝦夷棕熊，就响位於海拔560公尺的四方嶺(俗稱熊山)山頂開設咗全世界第一座既熊牧場～～



咁。。。。。就等我哋帶大家去一睹'熊'姿啦！






下晝三點幾嚟到熊牧場，搭空中纜車上山～～
後面架纜車咁搞鬼既？吊晒一條條類似鹹魚既物體。。。。。



搭過幾次纜車既皓皓，今次坐就顯得好淡定，一啲都唔驚咁喎。。。。。

仲笑得好開心～～

纜車徐徐上升，沿途欣賞畫一般既風光，好寫意呀！



好快就上到山喇。。。。
身後就係世界上唯一既「棕熊博物館」，館裏面陳列咗一啲標本，
仲有好多關於棕熊既習性＆生態既資料。可惜我哋冇注意時間，到我哋餵完熊折返，博物館已經close咗～～
早知入去睇咗先啦！





到此一遊照～～

睇棕熊表演~~

Wow！好多棕熊呀。。。。。
對皓皓嚟講，呢度亦係最好玩既地方。。。。因為爸爸媽咪買咗包飼料畀佢餵熊！



咪睇佢哋身形龐大，好似好笨拙咁。。。。。
其實佢哋接嘢食既時候，身手不知幾靈敏，仲會飛撲落地。。。。

又識得拱手作揖，揮手搖擺咁引遊客注意，等遊客將嘢食拋過去佢哋度。。。。
簡直好似人扮既一樣，WAKAKA！

睇到棕熊求食既模樣，又詼諧又可愛～～
又睇到皓皓拋飼料畀棕熊個樣，又開心又緊張，但係唔知點解。。。。。
嗰一刻媽咪心裏面竟然有啲啲悲涼既感覺～～

媽咪叫爸爸抱起皓皓影張相，爸爸話唔敢行咁埋，驚失手跌咗皓皓落去喎。。。。
啋啋啋！亂咁up！人哋個圍欄好高啫，冇你講得咁’牙煙’係咪呀？

除咗睇棕熊，呢度仲有'跑鴨'，仲仲有得落注添～～
我哋冇畀錢落注，不過就圍內自己估，輸咗既要請贏咗既飲嘢。。。。
跟住我哋成班人响開跑後嗌到聲沙力竭，笑到碌地咁滯～～
哈哈，成班人去旅行自有另一種樂趣～～

行到五點左右，天開始黑lu。。。。
我哋再周圍影吓相，然後就搭番纜車落山～～

皓皓既棕熊體驗之旅亦要結束喇～～

跟住我哋諗住行埋地獄谷，但係天氣真係好凍，
我哋未行到入去，已經覺得寒意難耐，最後我哋決定折返，行吓溫泉街就算。。。。

做嘜皓皓咁既樣？凍？當然唔係啦！
隻曳豬又扭計囉！

 

咁啱睇到溫泉街巡禮～～閻羅王變臉！

响商店街買咗啲手信就返酒店喇～～

 

今晚住和洋式溫泉旅館。。。。

 

皓皓就最鍾意喇！因為地方大，可以响地下碌嚟碌去～～

响房裏面hea咗一陣就換浴衣去食晚餐喇～～



今晚我哋食懷石料理。。。。



每人有一隻毛蟹，yum yum～～




皓皓既兒童餐都好有份量，冇可能食得晒既呢！

 

包晒成間房，一路食一路吹水嘆梅酒，真係人生一大享受！

食完飯，爸爸佢哋去咗浸溫泉，媽咪就陪皓皓响房度玩～～



玩到咁上下又食宵夜～～




旅館既職員幫我哋鋪咗tatami，响香港未試過打地鋪，皓皓覺得好好玩。。。。。
後尾我哋索性鋪多張，成家人都唔瞓床，一齊瞓我哋第一次既榻榻米！


Day 3～～完