北海道聖誕飄雪の旅~DAY 2(part 1):二条市場+時計台留影

12月23日(星期日)

Day 2：酒店→二条市場→時計台→白之戀人館→三井outlet→蟹將軍→酒店


Day 2，我哋既自駕遊正式開始。。。。一朝早，爸爸同Bear Bear契爺佢哋去攞車，然後番酒店車我哋出去。不過攞得車嚟，都已經九點幾喇～～
今日全日行札幌，時間看似好充裕，但係齋响札幌已經有唔少景點，加上呢啲地方既close time都比較早，所以我哋唯有揀幾個最鍾意既地方去啦！

＠Hotel Gracery門口～～
皓皓著咗雪鞋，踩入啲雪堆度都冇有怕！



第一站：醫肚先啦！
嚟到北海道既三大市場之一：二条市場～～

本本旅遊書都有介紹呢間丼茶屋（どんぶり茶屋），我哋當然唔會錯過啦！

可能時間都唔早，已經過咗人流最旺既時段，所以我哋等咗一陣就有位喇～～

呢個旅程，兩個小朋友一時就好friend，一時就嘜都鬥一餐；
仲鍾意互相向對方阿媽篤灰，好似哈哈哥哥，就成日同我講：
玲ee，皓皓佢仲打機唔食嘢呀！
真係畀兩個豆丁激死又笑死～～

主角出場。。。。。人氣推介，賣相極之吸引既特色丸鮮丼～～
五款唔同食材，全部新鮮味美。。。。

價錢方面就。。。。同旅遊書所講相差好遠囉。。。。啲書既資料真係唔update架！
一個早餐嚟計，呢set嘢都頗貴，不過，我哋呢個柴娃娃旅行團團友，一早已經聲明：
要食得盡興，有大食大。。。。最多，番到HK節衣縮食囉，wakaka！

食完早餐，行去一條馬路之隔既狸小路逛咗一陣。。。。。

每次路邊有厚厚既積雪，哈哈哥哥例必興奮！仲會玩到瞓晒身。。。。
相比之下，皓皓玩得冇咁放！通常佢feel到自己隻手有啲僵，就會自動自覺唔玩～～

不過佢就愛上咗畀爸爸抱住然後雙腳插落雪嗰度，會笑到卡卡聲～～

逛咗陣狸小路，我哋就嚟到札幌既地標，亦係北海道既文化遺產之一：時計台～～

外觀好似一座教堂，一座鐘樓～～

但其實佢歷史悠久，建於1878年，當時係「舊札幌農學校演武場」，
札幌農學校，即北海道大學既前身。。。。

影咗幾張相，望一望側邊，咁多人既？
原來側邊有一座站立台，專係畀人企上去影相。。。。
唔通。。。。呢個角度影出嚟係最靚既？？

鐘樓真係會響架，佢既鐘聲仲被選為｢日本之音風景百選｣之一添。。。。
不過我哋影完相就趕去下一個景點，無緣聽到佢既鐘聲喇～～

其實時計台真係無甚特別，不過話晒咁有代表性，都要到此一遊既。。。。

遊完時計台，我哋就驅車去下一個目的的，亦係札幌市中媽咪最想去既地方：
白之戀人館。。。。。下回再續～～


Day 2～～待續