Happy Birthday to our beloved son！

3月30日(星期三)

          

皓皓bb：

你今日3歲喇！好耐之前媽咪已經講過，你大個仔喇，要改口唔好再嗌皓皓bb或阿b！但係媽咪實在改唔到口呀，又或者係唔捨得改，請容許媽咪繼續咁叫你！

點解時間會過得咁快？三年前既今日，媽咪攤响梳化一路嘆豆腐花一路睇電視，突然穿羊水，爸爸媽咪好似倒瀉籮蟹，裙甩褲甩咁趕去醫院...........當日既情景仍然歷歷在目，眨吓眼，咁就3年！

呢一年，你長大咗好多，懂事咗好多，好快你就會番幼稚園，學到好多知識同技能，亦意味住你需要倚賴爸爸媽咪既時間都會越黎越少。你知道嗎？睇住你進步成長，真係好開心好開心，但係媽咪另一方面真係好唔捨得你長大！當然，呢啲都只不過係傻氣話～～要放手的，始終要放手！

媽咪真係好感謝上天，將你帶到爸爸媽咪身邊，俾咁多既歡樂我哋。真架！媽咪雖然成日嬉嬉哈哈，但係有時都幾多愁善感，尤其是近呢一年，好似有好多唔如意既事發生，間中都不禁會諗：人生存為嘜？成日要營營役役又為嘜？？？係皓皓你，你令到媽咪人生既目標變得清晰明確！一諗到你，就會覺得幾辛苦都係值得既～～

最後，爸爸媽咪祝你永遠健康快樂，平平安安！Love U forever！

 

上星期日(即係28號)，媽咪提前幫皓皓搞咗個小型birthday party～～

媽咪唔識整嘢食，所以都係嗌啲外賣就算！

皓皓食相全面睇～～

皓皓鍾意車，所以專登託人造一個車仔蛋糕！

蛋糕好靚好得意，thanks blog 友Natalie～

仔仔3歲生日快樂！

唱生日歌&吹蠟燭～～

拆禮物～～

舅父真知皓皓心意，送個呔盤搖控車俾佢，

睇佢扭呔盤扭得幾興奮！

 

皓皓，出年你會有好多同學仔喇，

到時媽咪先响你至愛既麥當當攪生日會好唔好？

濕地公園郊遊日

終於追番晒啲blog，可以鬆口氣喇！點解媽咪突然會的起心肝追番晒啲blog？因為聽日就係皓皓三歲生日喇，媽咪唔想皓皓b生日嗰篇日誌都過晒氣，所以連寫幾日．．．寫到氣咳～～

3月26日(星期六)

啱啱過咗既禮拜六過得好充實，媽咪同皓皓、表哥表姐、舅父姨媽佢哋一行９人去咗濕地公園郊遊．．．．雖然呢度冇嘜嘢玩兼唔係太多嘢睇（職員話潮退會多嘢睇啲），但係四個小朋友依然玩得異常開心。咁又係既，呢度地方咁大，佢哋四個都鍾意喪跑，淨係有得跑黎跑去佢哋已經超興奮！

我哋搭西鐵去到天水圍再轉輕鐵～～

皓皓第一次搭輕鐵－－

成個大鄉里咁～～

最鍾意'嘟'八達通既皓皓見到呢啲卡機好興奮！

行去濕地公園途中～～

都未去到目的地，佢哋四個已經著咗～～喪high！

皓皓你扮可愛教主？伸晒脷咁．．．．

場外有一大片草地加一個迷宮，佢哋non-stop地跑跑跑，

見到都覺得攰．．．

叫咗幾十次先可以嗌停晒佢哋，終於可以入場喇！

先响室內既地方參觀～～

好多動既既資料睇～～

初初見條鱷魚唔識郁，仲以為係假既添！

睇咗好耐先觀察到佢呼吸既時候有微微既顫動。

皓皓見條魚識唱歌跳舞，呆晒！

媽咪問皓皓睇到啲嘜？佢話睇唔到．．．．

緊係啦，教極佢都唔識將對眼放响睇嘢嗰個位置度～～

狂踩地下隨機出現既光圈～～

睇麥兜短片～～

黎到貝貝之家～～

睇完全唔郁既貝貝．．．．

軒軒表哥幫皓皓度高～～哈哈，啱啱好夠1米！

响啲空隙度'裝'媽咪，好可愛！

呢條浮橋識左右搖擺，行完有少少暈船浪既感覺。

當然佢哋又覺得好好玩～～

地方真係好大，我哋都未行完，已經夠鐘閉館喇！

睇吓佢哋，本來正正經經企响度影相，

點知影影吓跣晒落地！

有紀念品買，不過唔啱我哋。

臨走响草地最後衝刺玩一轉，影到皓皓狂奔落斜路既姿態！

呢日皓皓同媽咪講：呢度好好玩呀！我哋下次係咪再黎呀？

Haha！傻豬仔，真係咁好玩咩？

不過你鍾意，下次就等埋爸爸再黎啦！