3月13日(星期日)
今次又係講open day呀，不過就唔係媽咪公司open day，而係九巴公司攪既；表姐之前响九巴公司做過，佢特別留意九巴攪既活動，而佢又攞到幾張當日既入場券，所以呢日就帶皓皓、心心表姐去玩吓喇．．
我哋响大圍轉馬鐵，黎到第一城站．．．．
出閘後見一班細路仔圍住隻貓爬高爬低，我哋都湊吓熱鬧，
俾皓皓坐上去影張相先～～
坐接駁巴士黎到九巴車廠，就見到好多巴士排晒响度．．．
呢款巴士唔知係邊個年代既呢？
見到警察電單車，即刻想坐上去．．．．
但係工作人員話只係俾影唔俾坐，怕醜既皓皓即時嚇到走開～～
警察車～～皓皓都好like！
仲話要响車尾影一張相添！
排隊渣小型巴士～～
皓皓開始扭眼瞓，所以有啲唔耐煩！
終於排到喇！yeah！
小型巴士有4架，但係冇得揀款，
排到我哋，啱啱就坐最典型既呢款巴士。
皓皓全日最開心就係呢刻．．．．
睇吓佢幾起勁！仲大聲嗌：轉大彎～～
夠鐘！輪到下一個！皓皓即時喪喊！
因為太鍾意渣巴士，又加上眼瞓，所以氹極都唔收聲。
唯有再排多次～～
今次排既時候同皓皓講定道理，
話坐埋呢一次，坐完唔准喊．．．而皓皓都應承．．．
今次輪到呢個cute啲既巴士款～～
兩表姐弟做嘜？咁忙既？？
啲巴士仔又真係好得意既，難怪咁受歡迎．．．
今次坐完，皓皓真係遵守諾言無喊無扭計～～
媽咪真係要讚吓你至得！
坐完巴士，見個個攤位都排晒長龍，
皓皓又眼瞓，所以就走喇！
九巴開放日後記
話說呢日媽咪真係黑仔，本身條腰已經痛到飛起，仲無啦啦响追接駁巴士嗰陣跌親！跌既時候仲要半個身跌咗出馬路，膝頭損咗，同埋幾樣衰吓．．．
皓皓當時見到整個情景，但係無出聲。夜晚，佢見到媽咪損咗既膝頭，就問：媽咪你係咪跌親呀？你有無事呀？仲痛唔痛呀？
嗰一刻，真係覺得好sweet，
同時又覺得，自己個仔原來不經不覺已長大好多，懂事好多．．．．呢個月尾，佢就三歲喇！
不過好笑既係，到瞓覺既時候，皓皓又問媽咪同一個問題，但字眼就唔同咗。佢問媽咪：你係咪跌咗出馬路呀？
再第二日，又變咗字眼，問：媽咪，你係咪'飛'咗出馬路呀？
真係俾佢笑死！都唔知响邊豎學番黎既？？
沒有留言:
張貼留言