聖誕聯歡會+聖誕特輯2011part2~~朗豪坊

12月10日(星期六)

呢日係幼稚園舉辦既聖誕聯歡會，地點响學校對面既浸信會。媽咪見聯歡會都有啲攤位玩，所以都帶皓皓黎捧吓場～～

去到之後，老師就叫我哋先到禮堂睇表演，原來係Sunny哥哥表演魔術兼傳道，完咗之後，校長就上台話Sunny哥哥表演完，就輪到我哋啲小朋友表演喇！
實在太意外，本來淨係諗住黎玩攤位，點知突然間話要上台表演。。。。

由高班開始，跟住低班，跟住幼班。。。。高班小朋友上咗台，媽咪同皓皓講：就快輪到你上台喇！只見皓皓面色都變晒，扁晒咀，媽咪即刻安慰佢，話俾佢知唔係得佢一個上台，全部同學仔都會上架。。。。。講完仲衰，眼都紅埋。。。。。

到校長開咪叫，請幼班既小朋友上台既時候，皓皓捉實媽咪隻手唔肯出，班主任聶老師咁啱見到，就埋黎拖皓皓出去；老師拖住，皓皓唔敢say no，就係咁，佢就好委屈咁企咗上台喇，haha～～

企咗上台，媽咪見皓皓啲眼淚流咗出黎，佢不斷用手抹眼淚，個樣好可憐。。。。
不過好神奇，當音樂響起。。。。。。

皓皓就即刻自動波扭動身體＆做動作，跟住節奏咁唱：快樂笑笑，快樂笑笑，每個小孩快樂笑。。。。
但係皓皓你個樣一啲都唔快樂喎，喊到眼都腫埋～～

表演完，就開始去玩攤位。。。。

坐低食小食，皓皓即刻拆禮物～～
份禮物係响禮堂表演完嗰陣派既。。。。。

將袋入面既小玩意逐樣逐樣攞出黎show俾媽咪睇～～

好驚喜！！竟然有個閃燈既彈彈波～～
皓皓自細就好鍾意扭彈彈波～～

玩攤位嬴咗好多糖糖，心情勁靚～～

玩砌圖～～

整雪人或者聖誕老人～～

皓皓好似好認真咁～～

先睇導師整既示範作，好靚喎～～

再睇皓皓整嗰隻。。。。。
皓皓整既雪人，好似就黎要俾條頸巾纏死咁。。。。

大特寫皓皓同心心表姐既完成作～～～

12月11日(星期日)

之前爸爸媽咪行過朗豪坊，已經裝到佢哋今年既聖誕佈置，同上年一樣，又係媽咪鍾意既Hello Kitty；呢日黎婆婆屋企食飯，見中間有啲空檔時間，就帶皓皓去搵Hello Kitty喇。。。。。

都幾多人，每一隻kitty都有人排隊～～

好彩皓皓都合作，每一隻都乖乖地走埋去影相～～

不過都有啲操普通話既人唔排隊，一見有人行開，就夾硬抱個細路仔坐入去影，唉。。。。。

差唔多每一隻都影晒。。。。。

媽咪最鍾意就係呢隻渣飛機kitty，好sharp～～

～～聖誕特輯2011part2完～～

Mami's B day +聖誕特輯2011 part 1～～山頂＆尖東

12月4日(星期日)

上年媽咪生日，好記得皓皓要去in幼稚園，in完就去食buffet，過得平淡但開心；今年？都係咁上下啦！老套啲咁講，只要一家人响埋一齊，去邊度慶祝都係咁開心！由11月開始，爸爸已經不斷問媽咪想要嘜嘢生日禮物，其實媽咪真係無嘜特別嘢想要。。。。反而媽咪好有興趣想知道，如果媽咪同皓皓講話要生日禮物，佢會點樣答。。。。。

於是有一日，媽咪同皓皓講：媽咪就快生日喇喎，你送嘜嘢俾媽咪呀？
皓皓竟然答：我送個臭屁俾你，哈哈哈哈哈！(講完自己响度勁笑)
媽咪聽完，都忍唔住狂笑。。。。估唔到皓皓會咁樣答，wakaka～～

生日前一晚，爸爸買咗個蛋糕俾媽咪，皓皓一見蛋糕，已經急不及待話要切～～
皓皓眼角位置唔知點解損咗，爸爸話可能搭校車嗰陣瞌眼瞓撞親喎。。。。

同爸爸一齊唱生日歌俾媽咪聽～～～

12月4號，爸爸提議上山頂食birthday lunch～～

山頂廣場既聖誕佈置。。。。。

沾吓招財貓既財氣先,haha~~

叫極都唔笑,cool爆。。。。

要同佢玩先影到佢笑既相～～
 

驚個蠟像，要爸爸一齊行過去～～
 

唔肯摸唔肯行埋啲，真係細膽豬～～

影咗一陣相就去食lunch，見呢間天一價錢ok，就食呢間啦！

仲有景睇，幾好吖！



有媽咪鍾意食既翅～～

點心同炒飯都ok，幾好食～～

食飽就响度玩，又瞓底，又爬過隔離枱～～

扭計要食雪糕～～



每次去都好多人，今次終於搭到纜車啦！

上完山頂，就返屋企俾皓皓瞓個晏晝覺，然後再出尖東影燈飾～～

好似好多年冇去過尖東影相喇～～

呢晚黎尖東影相，都只係順便。。。。。因為我哋book咗响日航食buffet～～

食物唔算太正。。。。。

呢個迷你佛跳牆就幾ok，媽咪食咗４碗～～

又俾機會皓皓吹吓蠟燭。。。。。

吹完又點。。。。。皓皓話要祈禱喎，haha～～

desert time～～^0^

今年生日，媽咪响facebook度同爸爸皓皓講咗一段話，响呢度都想引錄番出黎：
多謝皓皓爸爸，你專登為媽咪既生日攞假（我知你要星期日攞假唔係太好）；
多謝爸爸、皓皓你哋兩仔爺為媽咪送上蛋糕、生日歌（雖然你哋唱得唔係咁合拍）；
多謝爸爸你既安排，雖然無甚特別，但已經令媽咪好溫暖、好滿足⋯⋯
不過媽咪更加想感謝上天——讓你哋兩父子走進我既生命，令我平凡既生命從此變得不一樣~~~

同場加映~~
12月1日幼稚園觀課日

呢日係學校既觀課日，之前爸爸媽咪都擔心皓皓一見到我哋就會喊，
但係咁難得既機會睇佢上堂，又冇理由唔去架。。。。
結果。。。。如我哋所料，皓皓明明好地地好專心咁聽老師講嘢，
點知一見到我哋，就面色一變，
又未至於離位衝過黎，不過就唔再望老師，唔再聽故事，
淨係眼甘甘望住我哋，含住泡眼淚，楚楚可憐。。。。
聽完故事，分組上外籍老師既課，家長可以企番响自己仔女側邊，
爸爸媽咪一走近，皓皓卒之忍唔住。。。。要爆喇！
又係得皓皓一個喊。。。。。
Miss Frankie同媽咪講，話皓皓平時好乖，唔知點解今日會咁，
又叫媽咪坐埋响佢側邊一齊上堂。。。。
上完英文堂就出去玩～～～扮去公園野餐。。。。
皓皓喊到眼都腫咗啲啲。。。。
皓皓，希望下次再觀課，你唔會再喊啦！