皓皓正式番學喇~~

9月1日(星期四)

番咗4日適應班既皓皓，情況比爸爸媽咪想像中好好多，老師話佢喊既時間一日比一日少，仲話佢見到爸爸媽咪就好嗲，但其實一見唔到，就好快回復正常。。。。聽到老師咁講，爸爸媽咪當堂放鬆晒。但到9月1號，又有一樣嘢擔心～～～就係搭校車喇！好彩呢日媽咪得老闆恩准放一日假，其實開咗學，媽咪真係好難攞假 。。。。

之前皓皓知道要搭一模一樣（＂一模一樣＂係皓皓對校車既稱號，個名係佢自己作既，或者係因為佢見到架架褓母車既外形都差唔多啩～～），已經喊住話要媽咪一齊搭，所以我哋真係好擔心，好擔心。。。。擔心俾佢纏住上唔到車，又擔心監粗要佢上車，佢會喊到死去活來，唉。。。。。。

爸爸話驚皓皓見媽咪响度會仲難纏，所以叫媽咪匿埋一邊。。。。。
等校車期間，皓皓已經開始扭計，一時話唔上車，一時話急shu shu，
冇幾耐就發難大喊。。。。爸爸唯有叫埋媽咪一齊等，睇吓可唔可以夾手夾腳挾佢上車～～

當爸爸媽咪萬般憂心既時候，褓母車黎喇……車一停低，褓母ee就用飛虎隊般既矯捷身手跳落車，拋出一句「好喇，你要返學喇」，就迅雷不及掩耳地一手抱咗皓皓上車……爸爸媽咪呆一呆。。。。黎唔切講byebye，只對住掩上既車門嗌咗句「媽咪放學黎接你」，校車就絕塵而去！
haha。。。誓估唔到，令我哋咁擔心既事情竟然俾呢個飛虎隊ee咁戲劇化地攪掂咗！同媽咪心目中既劇情相差好遠囉！

皓皓上咗車，爸爸媽咪就去學校門口等。。。。
校車遲咗十幾分鐘，即係話，本來短短二十分鐘既車程，而家變咗個幾鐘。。。。
唉！唔知皓皓頭先喊咗幾耐呢？
車黎到後，爸爸媽咪為免節外生枝，就匿埋一二角裝佢，只見褓母ee同校車隊既負責ee一齊拖皓皓落車～～
就咁睇皓皓好似俾佢哋挾落車咁，攪笑！

校車隊既負責ee拖皓皓入學校既時候，竟然好唔識趣咁叫皓皓：
你睇吓！爸爸媽咪响嗰度呀！
嚇到爸爸同媽咪即刻縮入條柱度。。。好彩皓皓呆呆滯滯咁睇唔到我哋咋！
如果唔係都幾煩。。。。。
啲小朋友入晒學校，媽咪就走去問呀飛虎隊ee皓皓喊咗幾耐。。。。
飛虎隊ee話佢喊咗幾個字，最後喊到攰瞓著咗～～～～攪到媽咪不知幾肉赤，唉！

難得媽咪放假，緊係要湊埋放學啦！所以我哋同咗老師講話放學唔坐校車。。。。
媽咪接皓皓既時候望入課室，見到個個小朋友都坐到好豪邁，東張西望，又伏响張枱度咁，
唯獨是皓皓一本正經，仍然按老師既指示：雙手放响膝頭哥，坐直。。。。。
完全無諗過老師既威力大成咁，haha～～
班主任又叫我哋唔駛擔心，話皓皓好乖，落車之後入課室冇喊過。。。哈！
真係還得神落～～～
仲有，皓皓每日放學番屋企都好開心咁講番學校既嘢，又唱歌啦，又祈禱啦，又扮老師既言行啦。。。
皓皓，你真係大個仔喇！媽咪真係好開心好開心，睇住你不斷成長不斷進步，雖然。。。。
媽咪講過n咁多次，媽咪真係好唔捨得你長大～～～～～～


同場加映~~~~~

９月９號，同嫲嫲提早慶中秋，我哋去咗北京樓做節，
爸爸嗌咗成隻北京填鴨，嫲嫲唔多食，皓皓剩係食包唔食肉，
啲鴨又勁膩，結果食剩好多，好嘥呀～～

９月１０號星期六，去奧海城揾公公婆婆一齊食飯～～

 

好多懷舊店鋪既擺設，幾得意～～

皓皓渣住杯凍O Tea，haha～～

每間鋪頭都有個印章，皓皓好開心，可以cup印仔～～