話咁快就禮拜六喇，亦即係話，仲有兩日，媽咪就放完大假lu！
呢個假期，冇嘜特別攪作，只係有時同公公婆婆、芬姨食吓飯，行吓街，其餘大部分時間都係留响屋企，hea爆．．．．
雖然冇咩節目，但係日日都可以陪住阿b，媽咪覺得好開心，真正感受到～～平淡是福
7月27日(星期一)
前一晚Fion ee俾咗包蝦條阿b，呢朝阿b一見到就lur媽咪拆開．．．．
媽咪攞淨幾條，俾阿b成包渣住食，阿b勁開心！
7月29日(星期三)
呢日媽咪同我去佐敦搵芬姨食lunch。。。。
又係sushi，點解媽咪食極都食唔厭？
媽咪鍾意食生嘢，好彩佢都專登嗌碟熟既俾我食．．．．
跟住响婆婆屋企玩，等芬姨同爸爸放工一齊食晚飯。。
夜晚我哋去咗西營盤食泰國嘢，點解個背景咁奇怪？
因為間鋪太細唔夠位，要响隔離鋪士多搭張枱食
雖然屈質咗啲，但係啲嘢食唔錯架！爸爸媽咪最鍾意食生蝦刺身。
7月30日(星期四)
朝朝6點幾7點起身，一定要媽咪陪佢出廳玩，唔肯留响房．．．．
又會例牌扭嘢食，媽咪會俾粒魚肝油阿b．．．．
阿b就會好滿足．．．．
跟住又會踩吓單車．．．．
而家想學人哋伸隻腳仔去前面個腳踏度，不過仲未夠腳長。
踩踩吓同媽咪揮手，好風騷！
等爸爸放工之後出咗銅鑼灣行街街！
時代出面有好多米奇既佈置．．．．
阿b認得米奇，表現得好興奮！
心心表姐，點解米奇隻手手會變到咁大既？
咦？唔單止隻手變大．．．．
連對腳都變得好大．．．．
我同心心表姐每人霸一隻！
櫈上都有好多米奇樣。。。
仲有幾隻大米奇俾人影相，鍾意米奇既人就啱晒喇！
7月31日(星期五)
爸爸鍾意儲bearbrick，阿b都好鍾意玩bearbrick．．．．
哎呀！唔應該話玩，應該講係虐待啲bearbrick。。
你哋睇吓啲bearbrick，全部斷晒手，真可憐！
後記～～阿b成長開心記錄
上星期某朝早，聽到阿b笑，望一望，對眼hip埋，原來佢發夢，究竟阿b夢見啲嘜咁開心呢？
呢個星期又有一晚，三更半夜，無端聽到阿b响度'he he hai hai'咁抖大氣，原來佢發夢都响度模倣緊廣告。。。。呢！嗰個葡萄適廣告（希望冇記錯），有個女仔跳跳吓舞跪低，然後扯大氣，跟住講：好想，好想繼續跳，但係個身體唔聽話．．．．
佢學緊人扯大氣，媽咪就黎笑屎喇！
呢個禮拜有一朝早，阿b又攞媽咪部 i-phone玩，玩玩吓又擺落口咬同lam，媽咪不以為意，因為佢成日都係咁，只係以為佢牙仔痕，但原來唔係．．．．
呢朝，阿b lam 完部 iphone，然後指住電話後面講：APPLE！媽咪恍然大悟～～
係電話個logo呀！
繼bird 之後，阿b第二個識講既英文就係：APPLE．．．．
雖然只係小事兩三樁，學識講嘢亦只係好自然既事，但係對於媽咪黎講，呢啲都變成值得回味又回味既得意事，所以話～～
開心，原來就係咁簡單！
