７月９日（星期四）
酒店→築地→秋葉原→上野→酒店→成田機場
今日係旅程既最後一日喇，因為兩點鐘就要坐機場巴士，時間唔係太多，所以今日只係去秋葉原買game同埋去上野買吓手信就算啦！不過因為响 day 2 去築地食唔到至愛既壽司大既緣故，爸爸心有不甘，所以．．．．
今日我哋再去過，爸爸滿以為响七點半前去到築地就會冇咁多人，點知．．．．
條人龍比星期二見到嗰條有過之而無不及
今次輪到媽咪問爸爸排唔排，爸爸話為咗滿足媽咪既慾望，排就排啦！嘩！聽講媽咪一早表咗態話湊住阿b唔想排成咁，唔知係邊個要滿足邊個既慾望呢？
排咗差唔多成粒鐘，條龍都冇嘜郁過，但係排咗成粒鐘先至話放棄唔排？咁樣更加唔甘心啦．．．．氹咗阿b粒幾鐘，佢先至肯瞓，跟住放落bb車．．．．但係天意弄人，當媽咪諗住終於可以俾阿b瞓番覺好既時候，條人龍突然之間入得好快，眨吓眼就快就輪到我哋，架bb車係入唔到呢間只係啱啱好容納到 12 個座位既鋪頭，於是乎又要抱番起阿b，就係咁，阿b又醒咗喇．．．．
阿b一見到有架電單車泊咗响隔離鋪門口，係都要坐．．．．
爸爸話電單車嗰車主啱啱入咗間鋪食早餐，應該冇咁快出黎，於是乎就滿足吓佢既慾望啦，話晒今日爸爸媽咪為咗滿足自己既食慾而要佢辛苦咗成朝．．．．
後尾個人渣走架電單車，阿b就用啲好依戀既眼神目送架車離開．．．．
終於入去坐低喇，除咗爸爸媽咪鬆一口氣，可以坐低抖一抖之外，我諗阿b都鬆一口氣，原因係先前排隊既時候，成十幾人既目光都集中晒响佢身上，又不斷撩佢，阿b就表現得好忸怩，逃避佢哋視線之餘，仲成日示意叫我哋抱走佢，嗰一刻我完完全全感受到咩嘢叫做「窘」，我覺得阿b好攪笑．．．．
壽司師傅撩阿b，阿b又識做地係咁同人揮手，所以又成功地呃咗人哋一碟蛋食；之但係，阿師傅呀師傅，點解你送碟蛋而唔送多舊海膽？
師傅好熱情，係都要幫我哋影張全家福，我哋話唔駛，佢以為我哋覺得唔好意思，係咁遞隻手問我哋攞相機．．．．
之後去秋葉原買game，爸爸話隻game香港日本都一早斷晒貨，點知又俾佢搵到喎！跟住去上野買手信，食碗拉麵，然後就番酒店搭機場巴士 lu ！
成田機場留影．．．．
每一次離開日本，我哋都會作最後衝刺，响機場食多餐壽司，今次都唔例外。
每次都係食呢間，都唔錯既．．．．
拜拜喇，日本！
阿b既戰利品（媽咪淨係掛住買嘢俾阿b，自己反而買得好少）．．．．
雖然話細路仔大得快，會好嘥，不過見到啲衫褲平幾多吓，又忍唔住手喎！唉！
三人行後記：
辛苦？預咗架啦！但係老實講，真係比想像中好好多－－阿b唔算太扭計，又耐唔耐肯坐吓bb車，最開心就係估唔到佢去包包超人館會咁興奮囉！睇到佢玩得咁投入，簡直有不枉此行既感覺，就算車程再遠都抵既！
之前係blog度寫有朋友講阿b咁細個，唔會有記憶；但係唔係喎，尋日阿b睇到响道樂度影嗰啲相，好肉緊咁指住啲相嗌 'mum mum' 喎！咁即係話，起碼佢記得隻蟹呃！阿b真係超級攪笑又超級餵食！
爸爸媽咪既願望：如果可以既話，我哋好想每年都同阿b去一次旅行，等佢見識多啲嘢，一家人留多啲美好既回憶！
沒有留言:
張貼留言