７月７日（星期二）
酒店→築地→南青山→原宿→酒店→新宿→酒店
今日無話特別要早起身，諗住阿b幾時瞓醒就幾時起行，結果阿b六點左右（日本時間）就起咗身，點知我哋me me 麼麼，都攪到七點多啲至出門．．．．
臨出門之前响酒店房影番張相先！呢間酒店景就冇，但勝在夠方便，好近JR站。
八點左右去到築地，我哋既至愛壽司大已經大排長龍。其實都預咗架喇，因為次次都係咁。爸爸問排唔排，以前兩個人排兩粒鐘緊係冇所謂，而家要湊住阿b．．．．
於是我哋轉呔，去咗食壽司清．．．．
我哋每人嗌咗一個set，盛惠7000幾円。
後面整壽司既師傅好鍾意阿b，成日撩佢講嘢．．．．
仲送咗碟蛋蛋俾佢食！
餵食既阿b嘜都要爭住食．．．．
你哋睇吓佢飲麵豉湯飲到成塊面烘咗入個碗度！
呢度價錢同壽司大差唔多，但係嘢食始終差少少！
食完壽司清，經過一間好正既食海膽飯既鋪，又忍唔住每人隊咗一碗。痴咗線，早餐食到咁大
不過真係好掛住呢碗飯，啲海膽超多、超甜，平時响香港食一間好貴既日本料理都食唔到咁既海膽，2000円咋！抵食！
呢度嗰啲姐姐同嬸嬸又好鍾意阿b，係咁教佢舉起隻手仔講一個類似 'si' 既的發音，都唔知佢哋 'up' 啲嘜，淨係聽到佢讚阿b kawaii，後尾個嬸嬸仲抱走阿b，我哋又唔好意思拒絕，唯有係咁吼住．．．．呢隻衰豬bb，竟然生保人都跟，好彩出咗鋪頭門口都識嗌媽媽、媽媽．．．．
之後响南青山同原宿shopping，所以冇嘜影相．．．．
＠ Original Fake
估唔到呢度位衣著潮爆、個樣好後生既男sale竟然有個同阿b差唔多大既女，我哋吹咗幾句，之後我讚佢個樣好young，佢仲掩飾唔到佢既興奮添！
＠ Comme des GARCONS
呢個袋仔係個男sale送俾阿b，等佢有得學大人咁秤住個袋．．．．
＠ Baby Milo
阿b响呢個蕉池玩得超開心！
平日冇嘜人，阿b可以玩晒成個池，勁爽！
阿b好攪笑，係咁攞隻蕉黎搣皮，不斷嗌mum mum．．．．
爸爸整鬼阿b，諗住推佢瞓落個池到，影佢攤開手腳既相．．．．
結果攪到阿b喊晒口咁搵媽媽！
＠ Baby Gap
呢度淨係買咗兩條褲仔，因為阿ｂ實在買咗太多嘢喇！
途經表參道既時候，又要排隊，又要轉嗰個類似指南針既物體，究竟攪嘜東東？
原來免費派嘢飲，轉指南針決定你要邊一隻味道，真係攪鬼！
Shopping完，因為抽住太多嘢，決定番酒店擺低，順便歇一歇！
之後再出番新宿搵嘢食，因為早餐勁得滯，結果冇食lunch，所以到七點幾，已經覺得好肚餓！
去到新宿，決定响道樂食蟹宴，自從我哋响大阪食完，就愛上咗佢；估唔到連阿b都食到停唔到口，連枱上啲蟹肉碎都執晒黎食，啲侍應姐姐應該多謝阿b，佢哋慳番唔少工夫，hahaha．．．．
食飯既時候，先發覺我哋因為覓食心切，連相機都冇帶，又冇得影相．．．．
食完蟹，响新宿行吓藥房、100円店，再食咗碗好正既拉麵，去埋百果園買生果，然後就番酒店lu！
沒有留言:
張貼留言