三人行,日本遊~~day 3

７月８日（星期三）

酒店→Anpanman Children's Museum→西松屋→Bayside Marina Factory Outlets→新宿→酒店

今日第一個行程係特登為阿b而設既，就係去包包超人博物館，所以今日亦係影相影得最多既一日．．．．

　　　

尋日同前日買既新衫新褲，已急不及待套晒响阿b身上．．．．

　　　

　　　型唔型先？

　　　

呢個行程最煩就係～～阿b每次見到汽水機，都好似發咗狂咁，係都要你帶佢過去，然後好似部機欠咗佢咁係咁怕，不斷講 'mum mum'．．．．

但係要記住，日本周圍都係汽水機，所以阿b呢個行為不斷不斷地重複．．．．

　　　

趁佢唔為意擺咗支益力多响個兜度俾佢執，佢即刻眼睛發亮．．．．

坐响部機隔離個女人望足全程，唔知佢係覺得阿b得意定覺得我哋白痴，希望係前者啦！

　　　

　

　　　成個鐘車程，終於黎到喇！

　　　

    第一時間醫肚先啦！

 

  嘩！好多包包超人呀！

　

   阿b對所有嘢都好有興趣．．．．

　　　

　　　等食．．．．

　

　

我哋既早餐～～牛扖飯＋海鮮意粉，响無期望既情況底下，又覺得啲嘢食超水準喎，不過價錢略貴。

　

　阿b食到 'lam lam' 脷！

　　

　　食完嘢就買入場券入博物館．．．．

　

　呢個係博物館既正門。

睇唔睇到左右兩幅相最大分別响邊？（除咗阿b個表情之外）

答案：就係棵樹嗰度個包包超人喇！佢會趷上趷落架！

　

呢啲係 locker 黎架！

阿b响呢度已經玩到唔想行，但係．．．其實．．．我哋仲未入場架！

　

　部 lift 都整到咁靚，問你服未？

　

　第三層最矚目睇怕都係呢堆公仔喇！

　

　呢度簡直係必影既景啦！

　

　　　

　　

　　　

　　　阿b真係極度鍾意一切識得轉既物體．．．．

　

　你哋睇焗麵包機入面個包～～有包包超人個樣架！

　

　

　同啲動物公仔影張相先！

　

　

　

　睇車車呀、馬馬呀响度轉黎轉去，睇到入晒神．．．．

　

　一有小朋友行埋黎就分咗神．．．

　　　

　　　

　

　　　

　　　

　　　呢度啲擺設真係好靚，影相就最啱！

　

　呢度令阿b驚為天人呀！呢三舊究竟係啲嘜？

　　　

就係媒氣爐喇！你哋睇阿b完完全全霸佔晒三個爐，隔離個姐姐好無奈！

　

仲要一扭掣就有啲紅色奏紙飛黎飛去响度扮火，咁好玩，阿b邊捨得走？結果我哋夾硬抱走佢，佢就好似俾人拐帶咁喪喊！

   

    好彩有第二樣嘢吸引到阿b，所以佢好快就收聲．．．．

　

　例如有渣車車啦．．．．

　

　'sir' 滑梯啦．．．．

　

　仲有好多．．．．

　

　好多．．．．

　

　好多既包包超人玩具啦．．．．

　

　

　同埋一大班既哥哥、姐姐一齊玩，所以阿b玩到好興奮、好投入！

　

　最後玩埋呢個過三關．．．．

　

　呢度實在有太多嘢啱阿b玩喇！

　　　

　　　好大幅既包包超人油畫！

　　　

　　　呢度仲有好多商鋪，連 salon 都有！

　

　想像唔到bakery裏面賣既麵包可以精緻到咁．．．．

黎到地面既商鋪，阿b因為玩得太喪既緣故，終於頂唔順瞓著咗，所以我哋都快快趣趣買啲日用品俾阿b，然後就離開喇！跟住我哋去到附近既西松屋掃咗一堆細路仔衫，就起程去outlet喇！

去到outlet，阿b唔係扭計就係瞓覺，所以我哋一張相都冇影過！呢個outlet實在令我哋好失望，冇嘜嘢啱買，不期然令我哋好掛住輕井澤個outlet．．．．不過都好，慳番啲錢，同埋當行吓囉！最後我哋只係買咗4樣嘢就走喇！

行完outlet就出番新宿食晚飯，出到去已經八點幾喇！我哋食既嘢同尋晚一模一樣（我哋鍾意食就係咁架喇，食唔厭既）．．．．

　

　就係去道樂拆蟹。。。

　

　呢度啲螃蟹超級巨型．．．．

　

　哈哈，正呀！

　

　阿b對住兩隻張牙舞爪既蟹鉗，個樣好似有啲驚嚇喎！

　

　其實個餐仲有刺身、燒蟹等等，不過大家都趕住拆蟹，唔得閒影相喇！

　　　

呢度有位嬸嬸識講少少中文架，佢話阿b ' 得意 ' ，講得好清楚，跟住送咗頂蟹帽俾阿b。

　　　

　　　好啦！你識做時我識做，你讚我時我就幫你賣吓廣告啦！

　　　

食完蟹宴，同尋晚一樣，我哋再每人食咗碗拉麵，呢度好擠迫架，我哋仲要抱住阿b，拉住個喼走入黎，但係為咗滿足食慾，冇計啦！

食飽飽，番酒店嘆埋盒巨峰提子，今日既行程圓滿結束喇！