第一次做花仔，巧緊張呀～～

11月20日(星期日)

回顧2011年11月份最大既事，莫過於Bear Bear契爺既Big Day喇，呢一日，亦都係皓皓人生中第一次做花仔！

其實，最初Bear Bear契爺搵皓皓做花仔，媽咪已經拒絕咗。。。。爸爸同Bear Bear契爺係好兄弟，緊係唔想托佢手踭，之但係，以皓皓既性格脾氣，點做花仔呀？皓皓又怕醜，又痴身，對住咁多陌生人，仲要爸爸媽咪唔跟身，真係想像唔到佢會點？？？

媽咪驚佢唔肯拖住花女行，驚佢喊住撲番過爸爸媽咪度，驚佢攪串人哋個party，契爺大日子，如果攪到咁，邊好意思呀？？

不過，Bear Bear契爺＆未來契媽話真係好想皓皓做花仔，話皓皓係不二之選。。。。。既然係咁，唯有頂硬上啦！

登登登登。。。。。。



就係咁，就造就咗呢對金童玉女喇，hahaha～～～

咪睇皓皓好似好淡定咁，其實爸爸媽咪之前brief咗佢好耐～～
同佢講契爺結婚，如果扭計會好肉酸，全部人望住。。。。。等佢知扭計會好樣衰！
又叫佢拖住妹妹，話妹妹唔識行嗰條路，要睇實佢，唔好俾佢走甩。。。。。俾佢有啲英雄感！

仲同佢講，行完之後俾10粒糖糖佢。。。。實行利誘佢！
用盡方法。。。。總算順利完成花仔既任務，hehehe！

呢日爸爸要做兄弟，媽咪俾皓皓瞓完晏晝覺先出門～～
因為媽咪知道皓皓一眼瞓會發爛渣，好難攪～～
Bear Bear契爺都知皓皓click手，所以朝早同晏晝都唔敢勞煩佢，淨係要叫夜晚到酒樓做花仔～～

黎到酒樓，見咁多人撩佢講嘢，已經面有難色；俾人熱情咁摸兩摸，仲喊起上黎。。。。
爸爸媽咪唔想俾皓皓做花仔，咪就係呢個原因囉～～

要食吓蝦片定驚～～

爸爸係咁同皓皓玩，等佢熱足身先～～

 

爸爸做兄弟，皓皓做花仔，兩仔爺一齊著老西，真係冇嘜幾可～～～

皓皓祝bear bear 契爺同契媽百年好合，永結同心。。。。。

 

恭喜晒一對新人～～

 

好耐冇見仲凱哥哥喇，有少少陌生。。。。。

媽咪攞部ipad出黎，即刻拉近晒兩個小朋友既距離，haha～～

對住花女妹妹，皓皓好似有啲怕醜。。。。

 

一齊玩吓先啦！

反而花女妹妹好主動喎，夾硬捉住皓皓隻手去摸吓啲花。。。。

就黎開始喇。。。。。花女妹妹好輕鬆，郁身郁勢，皓皓就好明顯有啲緊張同不安。。。。

見到皓皓咁，媽咪又同佢講：記住拖實妹妹呀，唔好俾妹妹周圍走呀～～
好彩用呢招分散佢注意力都幾有效～～

 

兩對花仔花女準備就緒，開始行喇。。。。

始終兩個都比較細，所以都係由兩位爸爸响側邊傍實穩陣啲～～～
花仔花女掛住撒花瓣，企咗响度唔識郁。。。。
好在有兩個爸爸做提埸～～～


同場加映～～

 

唔知邊一日，過咗軒軒表哥仔屋企既會所玩～～

21號，出街食飯。。。。皓皓好鍾意食茄汁意粉，呢碟拿破崙意粉，佢自己食咗大半碟～～

26號朝早，去海怡食早餐，皓皓一聽到過海怡食早餐就開心，因為通常食完就去商場個冒險樂園玩～～
皓皓而家去冒險樂園最鍾意碌ling，射籃球，拋彩虹，仲有呢個。。。。。



跪上櫈仔同爸爸對決～～～
同爸爸玩冇咁興奮。。。。。雖然爸爸會特登俾皓皓射入，等佢開心吓，但係佢做得好假囉！
連皓皓都睇得出佢故意輸。。。。。
媽咪就唔同呢，媽咪做得迫真，皓皓射入咗會好high～～

等爸爸放工之後就去咗行尖沙咀。。。。

睇到呢張相，就諗起婆婆成日講既說話：唔見人高見衫短。。。。
真係喎，日日望住皓皓，又唔覺佢高咗，但係見到套衫褲就知喇～～
條褲吊晒腳，件衫呢，當年09年皓皓第一次去日本嗰陣買既，買嗰陣係oversize，而家已經啱啱好喇。。。
慶幸嗰陣買大兩個碼，著足咁多年，件衫千幾蚊先至回番本咋，haha～～～
(當年媽咪嫌件衫有啲貴，係爸爸一睇到milo同孖寶兄弟crossover，對眼就發晒光咁話一定要買～～)

响海港城影吓相，跟住去反斗城，
應承咗皓皓會買棵迷你聖誕樹俾佢。。。。。。大既真係冇嘜位擺喇～～



番屋企一齊掛吊飾，整完皓皓要攬住棵樹影相，超攪笑！

追blog追到年廿九，先至寫完十一月，haha。。。。繼續努力！
响呢度同大家拜個早年先～～～
祝各位响龍年身體健康，事事如意，日日笑口常開！