Open Day

3月5日(星期六)

今日爸爸放假，媽咪就要番工；不過只係番個半鐘，加上今日係open day，有啲攤位可以俾皓皓玩吓，於是就帶埋皓皓去，而爸爸就响德福食吓早餐hea吓咁等我哋．．．．

媽咪要看檔，皓皓都唔知做嘜好，唯有玩吓iphone～～

周圍攪攪震～～

好多哥哥姐姐撩皓皓傾計同玩，不過皓皓怕醜到暈，唔鬼騷人．．

冇嘜嘢係皓皓感興趣既，反而一個印仔令到佢唔捨得走～～

所以媽咪應承第日買一個俾佢～～

呢位哥哥係媽咪既同事，皓皓成朝早都唔睬人，

點知哥哥買罐可樂俾佢，佢竟然肯錫錫！

唉！皓皓真係現實！

臨走既時候玩後面既攤位，呢個攤位超難，

要將三個波拋入三個指定顏色既窿窿先嬴到大獎。

啲哥哥好好人，俾皓皓行入去'擺'啲波波入窿，

結果我哋嬴咗大獎，yeah！

大獎係大蕉一梳～～重到皓皓都拎唔起

當完值，join番爸爸，去德福同皓皓坐車仔．．．．

呢兩架車仔，皓皓到宜家都好掛住，

一睇到相就講跑車呀、消防車呀咁．．．

跟住去尖沙咀行吓同食lunch～～

Haha，又係壽司廣，悶唔悶？

不過最近日本發生咁大件事，睇黎之後都有一段時間唔食得～～

唉！冇得去日本玩冇得食日本嘢都事少，

但係啲日本國民就好慘！希望佢哋可以盡快度過呢個難關。