關西食玩買之旅2013~~Day 1(part 3)^^YuKids@Rinku Premium Outlet + かに道楽

5月15日(星期三)

Day 1：關西空港→貴志→黑潮市場→Rinku Premium Outlet→難波→道頓堀酒店

Day 1(part 3)：行outlets，基本已經成為爸爸媽咪每次去日本旅行既指定動作；即使outlets內啱我哋既brand其實好少，但唔行又好似唔安樂咁，haha～～
行過咁多outlets，暫時覺得北海道既三井Outlet Park最好行最啱我哋胃口，啲款又比較新；其次係九州烏栖outlets都唔錯，因為有Bape嘛！至於Rinku Premium Outlet ，我哋只會行吓TC,Beams,Nike咁，預咗收穫唔會太多。。。。

呢個Rinku Premium Outlet 响關西空港附近，好多人都會安排响第一日或者最後一日去，咁會比較順路。我哋第一日一早落咗和歌山，照計應該玩完返難波，最後一日先去outlet，咁就唔駛走回頭路同埋嘥多一程車既時間＆車錢。不過。。。。。最後我哋都係揀呢日去，原因一：我哋買咗pass，呢程車唔駛錢；二：最後一日有啲行程plan咗，如果又要預時間行outlet好似好趕；三：Day 1好似冇嘜地方畀皓皓玩，而outlet隔離既Seacle裏面有間YuKids，啱晒皓皓。。。。



一畀完＄＄入去，皓皓就好似久旱逢甘露咁。。。。癲咗～～
(500yen一個鐘，幾抵玩～)

皓皓超級鍾意玩呢座滑梯～～～

上到頂有個透明既彈床，可以望到地下。。。。
(媽咪由下影上，好彩皓皓係男仔，冇走光)

 

最初呢隻儍豬仔勁驚(果然名符其實係一隻鵪鶉)，
試彈一下，冇事喎。。。。。跟住開始放開懷抱喪跳～～

除咗透明彈床，亦鍾意條滑梯夠'跣'，可以'sir'得好快～～

呢張彈床就軟淋淋，舒服～～

問皓皓記唔記得以前都响呢度玩過。。。。。
佢個樣好迷惘，haha～～

以前玩波波池，好驚其他大哥哥玩得喪會整親皓皓，
而家調番轉，好驚皓皓太癲會整親人，
所以媽咪要响側邊監督住，成日提醒住佢。。。。。

玩完YuKids，响隔離西松屋買吓嘢，跟住爸爸媽咪就開始shopping～～
一如所料，我哋只係响TC買到幾件衫，另外爸爸响Nike買咗對鞋。
好彩我哋有去information center攞coupon，原來買Nike滿10000yen有8折 ～

行到七點零鐘，諗住番難波先食dinner，不過唔知係咪體力虛耗過度，
嗰刻真係好鬼肚餓，所以去food court食碗拉麵頂住肚先～～

 

皓皓本來已經瞓著，但我哋搞番醒佢叫佢食烏冬，
睇吓佢個樣。。。。幾迷幻！

食飽飽，起程返難波喇～～
皓皓一上車就瞓，九點左右返到難波，佢都仲未瞓醒。。。。
我哋先去酒店check in，然後先叫醒皓皓出去食晚飯～～



かに道楽係爸爸媽咪每次嚟大阪都必定會幫襯既食肆～～

皆因我哋都超鍾意食蟹～

媽咪大愛～蟹刺身＆蟹膏，yum yum yum！

每道菜都用蟹製成，精緻得嚟又好鮮甜～～

皓皓like蒸蛋。。。。。

仲有sushi ～

食完，侍應姐姐仲送咗枝印有蟹樣既棒棒糖畀皓皓，thx u～～

一家人食到捧住個肚離開，好滿足！

食完已經差唔多11點。。。。
食到咁飽，點都要周圍行吓～～
沿住道頓堀條街行有好多夾公仔鋪，
夜晚呢啲鋪唔畀小朋友入，但爸爸媽咪真係好手痕。。。。
以前未帶住皓皓嚟日本，爸爸媽咪係嗰啲夜晚唔夾公仔唔安樂既人～～
於是我哋响門口＆近門口啲機玩，希望唔好畀人趕啦！
誰知職員哥哥冇趕不特止，仲幫我哋將個公仔放出啲，
擺响一個較易夾到既位置。。。。多謝晒！(大家見到隻公仔？已處於就跌就跌狀態，haha～)



皓皓好緊張。。。。。。。



Yeah～～全家响度大叫！失禮晒！(不過職員哥哥都响度叫，hehe。。。)



皓皓明明好鍾意pink色，但佢竟然揀咗隻白色草泥馬，奇怪。。。。
莫非佢覺得白色先似喜羊羊？



再下一城，夾多個米奇公仔。。。。。
(也是要多得職員哥哥，將米奇放响一個'適當'既位置，haha～)



夾完公仔，再行24小時營業既鋪頭。。。好多嘢買～～
呢度仲可以遊船河睇夜景，不過我哋以前試過，今次唔再坐喇～



買完嘢，番酒店瞓～～
(張相係第二朝响酒店門口補影。。。道頓堀酒店)
(酒店係旅行社職員介紹，出乎意料之外，幾ok喎～～)


第一日行程結束。。。。。
呢日搭完凌晨機就直踩去玩，仲要成十二點先番酒店休息，
真係超。。超。。。超攰，但好開心，事關啲時間好見駛，
好似玩咗好耐都未到夜晚咁，正！
玩咗一整日，皓皓只係响啲搭車時間小睡咗兩轉，都不得不讚佢一句：堅！



Day 1～～完