皓皓bb生活點滴: 皓皓5歲生日慶祝篇～賞櫻花探米奇

3月30日(星期六)

3.30，皓皓正日生日，最初諗住過馬交，仲plan咗個畀皓皓由朝玩到晚既行程，但聽人講復活節假期嗰邊迫爆人，所以最終放棄。。。。。

唔去澳門，去邊好呢？媽咪就即刻諗到：長洲啦！

why？全因想彌補吓一個沒有兌現的'櫻花承諾'！

話說前兩年，媽咪同爸爸講過，如果皓皓生日撞正喺復活假既話，就會帶皓皓去日本過一個'生日賞櫻之旅'。。。。咁今年皓皓生日真係撞啱復活假喎，但最終，諗過度過，都係唔去。。。。。

原因1，當然係價錢啦。。。。問過package既價錢，都幾貴！我哋十二月北海道之旅先至元氣大傷，都係。。。。停一停，諗一諗先～～

原因2，亦係最主要既原因。。。。媽咪今年既大假編排同以往唔同咗～～～～媽咪响學校工作，跟學校假，平時根本攞唔到假，所以焗住每次都要响旺季(聖誕新年，復活暑假)出遊，捱貴機票；但係今年，媽咪被借調去第二個部門一年，換言之，今年攞假比較自由。。。。。既然係咁，無理由唔响淡季去而要復活假去，無端端洗多一大筆架嘛！

就係咁。。。。媽咪對皓皓既'櫻花承諾'冇實踐到，其實都有少少唔開心～～

入番正題。。。。點解去長洲？相信好多人都知，長洲都有幾棵櫻花樹～～

皓皓生日去長洲，全因為媽咪呢個櫻花情意結。。。。haha，夠無聊吧？

去完長洲，夜晚我哋就去咗迪迪尼搵米奇米妮陪皓皓過生日！

好！即刻去相，睇吓我哋既生日行蹤啦～～

嗰朝瞓醒先至meme麼麼出發。。。。。
到埗後落大雨，所以去張記嘆碗魚蛋粉先，順便避避雨～～

食完粉，行去關公廟嗰邊睇櫻花。。。。。

話係話三月尾開花，但媽咪睇人哋啲blog，見到二月份啲櫻花已經完全綻放，
所以都估計呢個時間會謝得七七八八。。。。。

果然如媽咪所料，廟前幾棵櫻花疏疏落落，所剩無幾～～

最'燦爛'要算眼前呢一棵喇。。。。。
所以當日有幾個龍友都對準呢棵櫻花閃呀閃。。。。。

媽咪手渣傻瓜機，但都唔執輸，狂影～～

近鏡。。。。。。
凋零殆盡既櫻花，自有一份淒美～～

可以想像全盛期時，都應該幾靚既～～
當然。。。。同日本嗰啲就冇得比啦～～

關公廟～～

附近一戶人家。。。。。
佢哋都幾幸福喎，企响露台就可以賞櫻，幾有feel呀～～

睇完櫻花聊慰心靈後，我哋就行番去碼頭一帶喇～～

沿路既鋪頭仔～～

曬蝦乾～～

落番碼頭附近食lunch～～

食完lunch，皓皓話想踩單車，見停咗雨，就租一個鐘玩吓啦～～

仲話想自己踩一架細單車～～
唔。。。。下次先啦～～

長洲名物～～超級無敵巨魚蛋。。。。
但唔係太好食囉！

踩單車沿途見到條觀賞用既龍舟～～

玩到三點零，我哋就離開長洲。。。。。。

皓皓，呢次遊長洲，我哋姑且'望櫻止渴'啦。。。。終歸有一日，爸爸媽咪會同你去日本賞櫻，應承你！

完咗上半場既長洲賞櫻，嚟到生日行蹤既下半場：會合芬姨同心心表姐，入迧迪尼酒店食b-day buffet～～

由於我哋響皓皓生日前幾日先決定取消澳門之旅，所以好遲先至book迪迪尼翠樂庭既buffet，好彩都book到～～

山長水又遠走入迪迪尼食餐buffet，無他既。。。只係諗住有米奇陪皓皓切蛋糕唱生日歌，畀啲生日驚喜佢啫～～

仲有少少時間，我哋去咗東涌個outlet打咗個白鴿轉，但係咁都買到嘢。。。。
心心表姐買咗對波鞋，皓皓就買咗對鞋同一件恤衫仔。呢！就係身上呢件喇！
不過話時話，個outlet迫滿自由含同胞，入到去已經好有壓迫感，所以我哋行咗廿零分鐘就頂唔順要閃！

我哋book咗第二節buffet，去到仲有時間剩，所以去啲shop買吓嘢～～

好不容易，終於等到入場時間。。。。。。
啲嘢食同佈置都充滿復活feel！

皓皓好like食buffet，因為佢鍾意自己攞嘢食～～

嘩！發達！勁多糖同朱古力，仲有薯條！
講真！平時點樣戒嚴都好，食buffet好難話禁佢食呢樣食嗰樣既，更何況呢日係佢生日？
算啦！畀佢放縱吓啦！

呢度啲嘢食唔算好好食，不過人哋個賣點又唔係食物質素。。。。

而係可以同迪迪尼人物影相嘛！

睇吓皓皓幾開心！

尤其是見到米妮⋯⋯

媽咪book位時已經落埋order訂咗個生日蛋糕～～
去到時，職員就問定我哋想切蛋糕既時間。。。。。

個蛋糕要三百蚊，真係幾貴。。。。。
不過幫襯佢哋既蛋糕，就可以由米奇捧住個蛋糕走嚟皓皓面前，諗住咁樣皓皓會超級驚喜啦！
點知。。。。。。見唔見到皓皓有喊過既痕跡呀？
事緣佢食飽飽之後，就攞部ipad出嚟玩篤波，篤到如火如荼既時候，我哋見米奇正行緊過嚟，就好緊湊咁叫皓皓收機。。。。。
嗰刻不明所以既皓皓，淨係好想篤埋鋪波，但見我哋制止喎，咪喪喊囉！