Ho Ho in Osaka 2011~~ Day 3^^堀江南船場shopping day

7月1日(星期五)

Day 3

今日係７.１，响爸爸媽咪plan行程既時候，呢日完全唔駛諗，因為呢度啲鋪頭７.１開始大減價，所以今日係我哋既全力shopping日，呢個亦都係爸爸媽咪每年都要七月頭黎日本既原因。。。。

今日，我哋預咗行到腳仔軟架喇～～

啲鋪頭十點開，我哋九點幾先施施然出門。。。。

唉！竟然落雨呀！不期然諗起上年去東京，

响shopping既時候落狗屎既狼狽情況。。。

無計啦！我哋入咗呢間餐廳嘆番個早餐先，

希望食完之後就停雨啦！

食完早餐，行咗一陣果然就停雨，真係好喇！

爸爸媽咪先去堀江掃貨，第一站諗住去undercover，點知執咗。。

咁就去Hysteric Mini先啦！好靚呀啲嘢，不過冇減價喎！

問sale哥哥，佢竟然話８月至可能做減價喎。。。

鋪頭既佈置好靚，仲專登有一達地方俾小朋友坐响度睇卡通～～

haha！播緊包包超人呀！可惜皓皓唔識聽日文。。。

皓皓好想買呢頂單車頭盔，不過當然冇買啦，

一來唔啱戴，二來千幾蚊一頂頭盔實在太貴，

買多件外套好過啦！

買完皓皓既嘢就主力買爸爸媽咪既嘢喇，

掛住買嘢，所以相片欠奉。。。。

應承過皓皓會再帶佢黎堀江公園玩，

皓皓，你年半前都响呢個公園玩過，記唔記得呀？

可惜今日落過雨，滑梯有啲泥濘。。。。

又較平日多蚊，所以玩一陣就走人喇！

搏殺到點幾鐘，已經大出血喇！實在太多嘢要揪，點行落去呀？

唯有番酒店一轉，擺低啲戰利品再出過去。。。

由酒店再出發，首先要醫醫肚先～～

食完壽司皓皓至起身，唯有陪佢再食麥當當。。。

又要禁凍嘢飲。。。。

食完嘢，再行南船場同心齋橋。。。

＠Sanrio，响後面部機禁咗包爆谷～～好香，不過唔好食！

雖然我哋酒店响心齊橋附近，不過今日至有時間行Sanrio，

呢度係媽咪每次到大阪都要黎朝聖既地方～～

心齊橋留影～～

呢間Yogurtland係全自助式既乳酪店。。

自己禁唔同味道既乳酪，同埋自己揀配料～～

跟住就去磅重俾錢。我哋揀咗藍莓乳酪，

配料方面，媽咪就揀咗藍莓水果，皓皓就揀咗軟糖。

點解姐姐咁耐都唔找錢既？？

唔～～yummy yummy！

    

夜晚，响道頓堀見到無線拍嘢，無幾耐仲撞到洪天明(戴帽者)，

同埋苗喬偉一家人，我哋都估：係咪拍旅遊特輯呢？

果然，番香港就睇到廣告預告獎門人曾志偉既旅遊特輯。。

我哋第二朝又响酒店大堂見到苗喬偉佢哋，原來住同一間酒店～～

話說呢晚本來打算食若狹家，不過皓皓好攪笑，

見到拉麵店出面既自助售票機，

就拉爸爸媽咪過去話要入錢。。。

結果當然順皓皓意，我哋食四天王。。。。

睇吓皓皓，對呢度既拉麵讚不絕口～～

狼吞虎嚥，hahaha。。。

呢個旅程last一晚响道頓堀搵食，

我哋買咗一堆手信番酒店。。。

有冇留意皓皓件衫有嘜唔同咗？

就係痴滿晒貼紙！張貼紙媽咪買俾詩詩表姐架嘛，

佢係都要拆開，將全張貼紙痴晒上件衫度，俾佢激死！

番到酒店沖完涼，我哋又開餐喇～～

宵夜：河豚＆帶子刺身＋sushi＋士多啤梨＋超甜蜜瓜^_^

旅行真係要咁食法至過癮！

皓皓宵夜都食咗四件壽司飯，勁！

聽日last一日旅程喇，雖然得半日，但係我哋都要作最後衝刺。

去邊？下集話你知！

 

～～Day 3 完～～