皓皓升K2 & 心心表姐生日篇

話咁快就一年lu，今年皓皓升K2喇，又大個仔咗（感慨）～～


今年唔駛上適應班，只係响9月1日開學前，有一日要番學校攞書＆書包。。。。。媽咪八月尾好多會要開，攞唔到假，所以由爸爸同嫲嫲湊皓皓去學校，爸爸番嚟報告：皓皓最LIKE既女同學調咗去上晝班，而下晝班就多咗好多位插班生～～

見唔到佢最鍾意既女同學思衡，爸爸話皓皓有啲失落；另外見到咁多個陌生面孔，佢好似有啲怯，係咁拉住爸爸隻手唔想放，仲面有難色～～
讀咗一年幼稚園，仍然係一隻細膽既老鼠仔～～



K1既書包係粉籃色，K2就係黃色～～


呢個自製相架＆班相係皓皓响K1學期結束前拎番黎既，嗰陣仲係六月。。。。
有時皓皓見到呢張班相，就會問媽咪：我暑期之後係咪要升K2呀？
問完之後就會忍唔住喊，唔知佢係唔捨得K1既生活，定係驚面對K2呢？



皓皓既性格內向又慢熱，佢應該用咗唔少時間先可以同啲同學仔熟絡，所以。。。。。
媽咪估佢係驚面對K2既未知之況，例如話驚啲同學仔唔同晒咁啦！
（呢張相係响學校既網頁裏面搵到既，响K1咁多活動相片中，幾經艱辛先搵到一張有皓皓份～～）
（有啲失望。。。。媽咪好想要番皓皓响學校活動既相，但係响派番黎既K1成長冊裏面，啲相少之有少。。。）

9月1號開學日，媽咪攞唔到假，爸爸話皓皓朝早表現得有啲忐忑不安，其實都正常既，放咗成兩個月假，都要俾啲時間佢調節番個心態；加上，皓皓根本對升K2有啲恐懼（媽咪覺得）。。。。好彩既係，校車叔叔同EE冇轉人，咁皓皓先有番啲安全感～～


到而家番咗兩個月學，一切so far so good啦！
皓皓由最初放學番嚟淨係掛住食掛住玩唔做功課，到而家。。。。雖然都未係好積極，番到屋企都係食咗先玩咗先，但係據嫲嫲講，每日播天氣報告既時間一到，佢就會自動攞啲功課出嚟做架喇；同埋每一日，佢都會攞本英文書出嚟讀吓。。。。媽咪要求唔高，見到皓皓有呢個進步已經好開心～～

K1啲功課都係油顏色呀，連吓線呀咁，K2要開始寫字喇。。。。
見到皓皓好吃力寫字個樣，唔知點解，媽咪真係好想皓皓變番bb，
好想佢唔駛咁快承受讀書既壓力，又或者係自己都唔想咁快要面對督促皓皓讀書既生涯啦！
媽咪唔想皓皓讀得太辛苦，但係又唔想皓皓成為一個不學無術既人，唉。。。。真係難！
希望媽咪响'鞭策'同'縱容'之間，能夠取其中庸，拿揑得恰到好處啦！

講完皓皓幼稚園既情況，又繼續講番九月中既嘢喇～～

9月14日(星期五)

16號係心心表姐生日，呢日我哋提前同佢慶祝～～

爸爸媽咪之前已經送咗生日禮物俾表姐，不過媽咪都想俾多份驚喜佢，
所以揀咗份神秘禮物呢日送俾佢。。。。。

媽咪唔記得影相。。。。。係一件和服黎架！
心心表姐超鍾意呀～～

仲有心心表姐鍾意食既海鮮，yummy～～

9月15日(星期六)

星期六又繼續慶祝，不過就唔係出街，係响我哋屋企～～

表姐又有禮物收，本應好happy，不過佢啱啱俾芬e鬧完，所以冇晒表情～～

表姐，你都冇mood吹蠟燭架啦！等我皓皓幫你啦，呼～～～～～

9月16日(星期日)

呢日只係去咗婆婆屋企食飯，冇特別地方去。。。。。
爸爸媽咪貪得意買咗個超巨版合味道番屋企，haha～～

9月17日(星期一)

爸爸有個朋友响美國番咗黎，兼夾有朋友生日，所以呢日成班人去咗鴨脷洲食飯聚一聚～～

又可以同哈哈哥哥見面喇～～～

哈哈哥哥真係超多表情，好可愛～～