皓皓bb生活點滴: 暑期班小總結

旅行結束，只係休息咗一日，媽咪又要重返現實，繼續面對煩人既工作，繼續拼搏，繼續忙碌。。。。。

黎到八月中，皓皓既暑期班都去到尾聲，係時候做番個結案陳詞～～
媽咪最初幫皓皓報暑期班係想佢習慣面對唔同既人，唔好咁怕醜，咁內向；不過，媽咪既如意算盤，好明顯，係打唔響既～～

總括黎講，皓皓都幾抗拒上英文啦，體適能啦，應該話，要佢對住佢唔識既老師同小朋友，佢係千萬個唔願意，爸爸媽咪又氹又鼓勵又威迫，佢先至肯行入課室；去到後期，仲喊住話唔上堂要走，連外籍老師都冇佢符，唯有嗌媽咪入去陪佢一齊上堂。。。。。

講開個英文班，第一堂係一個黑人外籍MISS教，第二堂開始就轉個鬼佬SIR。話說皓皓對黑人係極之抗拒＆10級害怕，譬如响街度見到有賓賓，佢離九丈遠已經要媽咪抱起佢，又或者猛咁扯媽咪行快啲避開佢，如果再聽到佢哋講賓話或者英文，皓皓既驚恐又會再升級。。。。媽咪已經同佢解釋咗好多次，大家只係國籍唔同，語言唔同，冇咩值得驚～～

之不過。。。。'驚'呢家嘢係冇得理性分析原因既，好似媽咪驚鬼，咁就算其他人同我講嘜嘢'平生不作虧心事，夜半敲門也不驚'，我冇做虧心事，但都係驚架啦！Haha。。。。越扯越遠，我其實係想講，唔知皓皓係咪第一堂俾個黑人外籍MISS嚇一嚇，搞到佢勁唔鍾意上英文堂呢？

根據媽咪依稀既記憶，皓皓有三次係喊到反艇，扭得太勁，最終爸爸媽咪唔想佢影響到其他同學，所以冇上到；而其餘課堂，就算佢肯入課室，媽咪見佢都唔願意同其他小朋友打交道。。。。。睇黎，佢呢種咁cool，cool得黎又好鵪鶉既性格真係幾難改變，希望佢再大啲會好啲啦！

報咗4個暑期班，皓皓最鍾意都算係畫班喇，除咗係皓皓本身幾like畫畫之外，有嫲嫲陪佢一齊上應該都係其中一個原因。。。。。。話說嫲嫲唔捨得個孫仔喊，每一次都走埋入課室陪太子畫畫，所以皓皓一啲都唔抗拒學畫畫囉！

不過超攪笑既係，皓皓响畫班畫番黎既畫好靚。。。。。。

好似呢幅蝸牛，係上最後一堂畫班既作品～～
畫得幾ok吖。。。。

但係冇咗老師既指導，啲畫功就忽然大跌。。。。

近期傑作。。。。。。。
佢話呢幅係一家人喎

。。。。。好恐怖呀，全部都係香腸人！
都係嗰句，老師真係掂！

又叉開少少講先，其實皓皓係對住陌生人先係咁斯文咁靜焗，响屋企，佢係一隻開籠雀，一隻紥紥跳既馬騮，係一個超級破壞王。。。。

每日放工返到屋企，間屋好似戰場，而家啲小朋友好醒架，知道邊個'恰'得邊個唔'恰'得，所以呢，嫲嫲係叫唔到佢執玩具架，次次都係爸爸媽咪番黎，佢先至肯郁手收拾吓；佢除左番學，基本上係唔識停既，難為嫲嫲日日陪佢做劇烈運動，唔係踢波就打籃球，唔打籃球就篤波，再唔係要嫲嫲陪佢跳舞，或者要嫲嫲'獵'一件武器同佢比武，咁樣玩法，都咪話唔攰，但係冇計喎，嫲嫲鍚到佢燶，根本唔忍心拒絕佢既要求，雖然爸爸媽咪已經勸咗佢好多次：唔好就晒佢～～

至於皓皓既說話能力，更加不能小覷，尤其是駁咀～～

事例一：
有次嫲嫲同佢踢波，踢踢吓想去厠所，皓皓玩到興起唔想停，就叫嫲嫲唔好去住。。。。
嫲嫲：邊有人唔俾人去厠所架？
皓皓：咁我哋比緊賽嘛。。。。你有冇見過電視嗰啲人(佢係指踢緊比賽既足球員)踢踢吓去厠所吖？
Wakaka。。。。真係笑死！

事例二：
有次爸爸見到屋企呢個戰場，就叫皓皓執玩具，點知叫咗兩次佢都唔郁。。。。
著咗火既爸爸：皓皓，叫咗你九次你都唔執玩具，我掉你啲玩具架喇吓！（爸爸咆哮中）
唔識死既皓皓：你叫咗我兩次之嘛！都冇叫咗九次。。。。你叫九次我就執架喇！
Haha，竟然敢單挑爸爸，爸爸當然唔會放過佢啦。。。。後事如何，不詳！不過媽咪真係～～忍唔住笑囉！

朋友呀，老師呀，成日都話皓皓好乖。。。。查實，假像黎架！仲有，佢對住陌生人唔講嘢就真係幾'擇洗'，尤其是，出年就係小一面試，唉～～