九州樂滿fun之旅2012~~後記

暑假旅行後又開始忙碌既生活，拖到而家。。。終於寫完整個遊記～～

Ho Ho in Kyushu 9/8/2012-14/8/2012



今次係爸爸媽咪同皓皓第五次去旅行，感覺上。。。。呢次係最滿意既一次～～

其一，爸爸媽咪大大話話去過十幾次日本，但今次係第一次踏足九州，淨係講新鮮感，已經令呢次旅行加咗好多分～

其二，媽咪今次真係花咗唔少時間諗行程check資料，最後成個旅程咁順利，冇搭錯車行錯路（雖然都有問過路），嗰份滿足感真係好大～


其三，相信大家都估到，係因為爸爸媽咪見到皓皓玩得好開心好開心。。。。。爸爸媽咪快樂既泉源，絕對係皓皓；見到佢開心，已經足夠～


皓皓的快樂回憶

好記得第一次帶皓皓去旅行，當時皓皓只係一歲多啲，唔少朋友都覺得我哋攞苦黎辛～～佢又未識玩，去完又唔會有記憶。。。。所以都善意提議我哋擺低皓皓俾嫲嫲湊，唔好帶埋佢去～～

不過媽咪就覺得皓皓唔會記得唔緊要，因為呢啲係屬於我哋三個人既記憶，三個人既快樂片段，只要爸爸媽咪記住，間中又可以回味吓，咁咪得囉；的而且確，之前幾次日本旅行，皓皓係冇嘜印象，而家問番佢，佢都會一臉惘然。。。。。不過今次，我相信皓皓會記得，而且印象好深刻添。。。。。。

點解媽咪會咁肯定？話說。。。。。。

自從皓皓愛上喜羊羊之後，每晚瞓覺，佢都會叫媽咪講喜羊羊故事，其中一個故事叫快樂的回憶。故事如下～～



有一日，羊羊老師要求羊羊們作文。。。。。。



當羊羊們苦惱寫啲嘜既時候，羊羊老師咁樣解釋。。。。。。。


'回憶'兩個字，對一個小朋友黎講都幾抽象，媽咪上年同皓皓講呢個故事既時候，嘗試簡單解釋完再加個實例俾佢，佢好似明啲唔明啲咁。。。。。。
直到呢兩個月講呢個故事，媽咪講到咩叫'快樂的回憶'既時候。。。。。

皓皓會搶住答：即係話以前發生過既事情，而家諗番都會覺得好開心，咪叫做快樂的回憶囉。。。。好似爸爸媽咪同我去日本旅行，我騎馬馬，玩水水，渣車車，我覺得好開心～～

每一次當媽咪聽到皓皓咁講，唔知點解，都會覺得好感動好滿足。。。。。
以前從來都唔明，點解父母可以樣樣以仔女行先，開心與否都完全俾仔女牽引。。。。。而家，媽咪真係確確切切領略到箇中真諦～～

皓皓，爸爸媽咪真係好希望留俾你好多美好既童年回憶，媽咪亦都好努力咁用文字記低呢啲點點滴滴，等你大個仔之後，我哋一齊去重拾呢啲回憶，好唔好？


戰利品篇 

原本以為，去九州旅行，出血既程度會大大降低，因為諗住買既嘢點都唔會夠東京多，點知唔係呀。。。。。原來九州既殺傷力都好驚人，俾大家睇吓'鋸'到我一頸血既兇手先～～

爸爸媽咪既。。。。。。相比起皓皓，爸爸媽咪既收獲算少喇！

一堆嘢食。。。。。呢次旅行令爸爸愛上咗梅酒，佢竟`然搬咗兩枝番HK，暈～～



一堆精品加手信。。。。最大既得益人，當然係心心表姐啦！
件one piece x hello kitty衫同右上角既one piece x hello kitty袋，就係送俾心心表姐架喇～～

大贏家皓皓既戰利品～～



當然唔少得一大堆玩具啦！佢真係日日都要買。。。。。
睇怕真係去旅行佢先可以day day有新玩具咁放肆，唔怪之得佢話想住多幾日啦！hahaha～～

小結

今次旅行真係非常好彩，因為媽咪有個同事去完九州冇耐，但係佢就好黑仔，咁啱遇著九州落暴雨，水浸得厲害；佢去阿蘇嗰日，唔單止冇得上火山，火車仲停駛，佢差啲走唔到添！後尾知道有巴士離開，但係就唔係去佢原先訂既目的地，佢唯有臨時改行程，而嗰日一整日就浪費咗。。。。。

未去九州前，媽咪都勁驚會遇到惡劣天氣，又驚有颱風，係就慘喇！幸運地，我哋呢六日旅程雖然都有落雨，但係對我哋冇大影響；而番黎HK冇耐，聽講嗰邊又落暴雨又打風，真係上天眷顧呢！

九州地大物博，我哋今次只係集中响博多同大分兩個地方玩，長崎熊本鹿兒島。。。。全部冇涉獵，希望等皓皓大啲，我哋可以再訪九州啦！



九州之旅～～完