九州樂滿fun之旅2012~~Day 5(part 2)：第25回關門海峽花火大會

8月13日(星期一)

Day 5：博多→烏栖outlets(Tosu)→門司港(Mojiko)→中洲屋台→博多
Part 2：第25回關門海峽花火大會

第五日原本既行程係，朝早黎門司港，下晝去outlets；不過出發前check火車班次時，知道每年8月13號，門司港都會舉行花火大會。咁難得咁都撞正，當然要黎湊熱鬧啦！於是媽咪就將行程稍為對調，改為晏晝先黎門司港，咁就可以逗留到夜晚，欣賞埋煙花先走喇！

呢個花火大會係九州最為矚目既三大花火大會之一，所謂關門海峽，就係九州最北部既福岡縣門司區(門)，同埋本州最南部山口縣既下關市(關)，中間既一個海域，所以呢晚放煙花，本州嗰邊都睇到架，同埋因為佢橫跨兩岸，可觀性甚高！

而我哋一家，就未試過一齊响現場睇煙花，所以呢。。。。。都幾期待架！

攞定張火車時刻表，睇吓夜晚走嗰陣既火車班次先～～

一踏出門司港火車站，已經見到好多檔攤～～

呢兩張相係我哋入鐵道記念館之前影既，當時只係兩點鐘左右，人潮未開始多。。。。。

有啲檔攤都仲未擺好個陣。。。。。。
皓皓好似好有興趣咁wor～～

參觀完鐵道記念館出黎，多咗好多人喇。。。。。
我哋都唔得閒周圍逛逛，因為。。。。。我哋仲未食lunch，個肚餓到打晒鼓～～



响海峽Plaza入面覓食～～
最後入咗一間旅遊書介紹既食店元祖瓦そばたかせ～～

呢間店其中一樣出名既係食河豚刺身。。。。。
俾呢個爸爸激死，上年去大阪食河豚刺身食到甲型肝炎都冇有識死，仲話要試wor～～

媽咪其實唔想爸爸食，但佢好想再試。。。。。。
好彩。。。。。原來8月份冇河豚食呀，鬆一口氣～～
最後，嗌咗個刺身定食俾皓皓（皓皓睇中咗碗飯同埋蒸蛋）～～



爸爸就嗌咗個饅魚飯～～
個樣都幾掂，不過媽咪唔係幾好饅魚～～

媽咪就試呢度個招牌菜～～唔記得咗叫嘜鬼嘢名喇！
將綠茶麵呀，牛肉蛋絲呀放上瓦板上燒，賣相都ok吸引～～

皓皓：影完未呀，媽咪？。。。。得未啫？。。。。。食得未呀？

 

影咁耐架。。。。唔鬼理你喇！你有你繼續影，我食嘢先喇！
呢度整體嘢食都好好味，不過價錢偏貴囉！



食完呢個唔知叫lunch定下午茶，爸爸媽咪就周圍睇吓嘢，皓皓填飽個肚，飯氣攻心，開始恰眼瞓～～
其實呢日天氣清涼，又對住咁靚既景，媽咪都有啲想坐低瞓吓覺～～

人潮漸多，响海峽Plaza裏面想行吓啲鋪都有啲難度，所以我哋行出戶外地方，連呢度著名既香蕉人都冇去搵喇～～

行到黎門司既出名景點：Blue Wing Moj i音樂吊橋～～
佢係一條步行者專用既索道，橋身會打開，以前係for船舶駛過，而家雖然冇呢個需要，但條橋每日都會响音樂既伴隨下打開六次，每次大概20分鐘就合番埋，
好可惜，我哋黎到已經錯過咗最後一次响開橋時段，冇得睇添！

睇旅遊網站啲相，條橋打開之後係咁既，據講橋身張開後好似藍色既翅膀，所以命名Blue Wing ～～
又據講條吊橋象徵戀人既結合，所以成為戀人聖地，情侶攜手走過，可以永遠都咁恩愛～～

咁有意思，我哋一家人都要响上面走走～～
去到橋既另一端，wow！呢邊仲多檔攤仲多人。。。。。

已經有好多人鋪晒地蓆霸定個靚位～～



我哋冇諗住咁早霸位，爸爸媽咪研究過，呢度咁空曠，基本上坐邊度都睇得清楚既～～
所以我哋去掃吓街先，呢度大部分檔攤都係賣嘢食，粟米，串燒，炸雞，廣島燒，魷魚，刨冰。。。。。。
簡直花多眼亂～～

連生青瓜都有。。。。。

雖然配搭有啲奇怪，但外形好可愛既。。。。。朱古力香蕉～～

除咗食既，都有好多係俾小朋友玩既檔攤，全部都佈置得好吸引～～
媽咪好想俾皓皓玩，可惜佢瞓咗～～

整條街都係檔攤，好似行極都行唔完咁。。。。。

行到差唔多七點，係時候叫醒皓皓。。。。。
皓皓俾我哋摷醒唔多like，爸爸同佢去玩都搞唔掂～～
釣咗個福袋俾佢都仲扭計，直至。。。。。。。

 

爸爸買個吹氣紅武士俾佢，佢先至開心番晒～～



haha。。。。好似兩兄弟咁～～

7:50，花火大會正式開始：一個個璀璨煙花响半空綻放，皓皓睇到目瞪口呆～～

從未試過現場近距離睇煙花，真係好靚～～

不過有人開始唔耐煩喇，猛咁問睇完未，又話啲煙花砰砰聲，佢好驚咁話喎。。。。。

見爸爸媽咪仲坐响度唔郁，個樣好嬲呀～～
其實爸爸媽咪都冇諗過會睇晒50分鐘，因為肯定會迫爆人，
加上皓皓扭計，所以我哋睇咗廿零三十分鐘就走喇～～

之不過，你識早走避人潮，人哋都識既啫。。。。
所以，我哋走嗰陣架車都爆滿；去到小倉轉車嗰陣，仲排晒長龍添～～
呢次不得不讚吓自己喇，因為媽咪一早book咗指定席既車票，
如果唔係，由小倉去博多要企足一粒鐘，都咪話唔甘！

番到博多，我哋冇番酒店，而係轉地鐵去中洲川端，因為我哋第一晚响天神冇食到屋台，
呢日係九州之旅最後一晚，點都要黎試一試～～



不過我哋搵唔到旅遊書裏面講既最熱鬧既屋台一帶，只係搵到公園附近零星既檔攤～～

 

見到一檔食拉麵既就坐底幫襯，因為已經11點幾，我哋驚趕唔切搭最後一班地鐵番酒店～～

雖然味道麵質湯底比唔上一蘭呀，一風堂呀，但係响屋台食就多咗一份風味～～
而且檔主都好nice，唔怪得之啲人話响屋台可以感受到濃厚既人情味啦！

呢日旅程好開心，滿足到皓皓（渣小火車），滿足到爸爸（outlets shopping），又滿足到媽咪（媽咪其實想現場睇煙花好耐架喇，不過從來冇諗過會响日本睇囉！加上見到咁大排場既檔攤，個感覺好得意！）太perfect喇～～

聽日就係旅程last day，真係好唔捨得。。。。。日日都吃喝玩樂既放縱生活呀，wakaka！

Day 5～～完