熱爆summer fun：暑假第一第二擊～～同陽光玩遊戲

弊弊弊！今次認真係嚴重脫期喇～～
原因？咪就係呢幾個禮拜媽咪放大假囉！有小朋友既人都知道，放假。。。分分鐘係忙過番工，事關要日日陪阿仔玩陪阿仔搵節目，真係攰到七彩！
加上前排細姨婆，姨丈公，ViVi表姑姐佢哋由比利時番咗香港，難得每年至見一次，媽咪差不多每晚都要同姨丈公佢哋麻雀耍樂，所以。。。。。
唉！唯有努力追追追～～

6月30日(星期日）

未正式放暑假，不過個個小朋友都考晒試，個個既學校都係活動周，基本上，大家既心情同真正放暑假冇嘜分別，haha！
話時話，呢個暑假唔係落兩，就係熱到癲，好想日日匿响屋企嘆冷氣瞓吓覺！不過。。。暑假嘛。。。。又點可以冇戶外活動呢？雖然媽咪怕曬怕熱怕黑(曬黑)，但係為咗陪皓皓玩，冇計。。。都要焗住同陽光玩遊戲～～

暑假第一擊－－我哋成村人殺入長洲踩單車，一班人柴娃娃，好開心呀！

可能痴住七一假期啦，呢日超多人入長洲，班班船都勁full～～

好彩豪華位都仲有掟坐～～

出一出甲板影相，即刻熱到大汗疊細汗。。。。。

都係坐番入去涼冷氣好啲。。。。。

到喇。。。。艘艘船都掛上國旗區旗～～

到埗，醫肚先！成棚人食飯，最好就係飲茶～～
Bo Bo表姐上open rice，見到呢間香雪海都幾多好評。。。。。
不過媽咪食後覺得好一般～～

蓄勢待發～～租單車～～

Bo Bo表姐話鍾意我呢把'大襟姐扇'喎。。。。

今次皓皓又要求自己踩一架單車。。。呢度啲單車路都幾闊，ok。。。應承佢～～



真係熱到爆，踩一陣要抖一陣。。。。



同埋要飲吓凍飲食吓雪條消暑～～

踩咗個幾兩個鐘單車，點知佢哋仲意猶未盡，要求去沙灘玩。。。。

 

天呀！熱到想死！好想跳落水。。。。
奈何全世界都冇帶泳衣泳褲～

玩完沙，大家盡興離開；回程仲買晒零食上船，好似開P咁，皓皓就最開心啦！
不過呢日開心過後既後遺症：一個二個曬到紅過隻燒豬，仲甩晒皮，勁痛！
皓皓對手要渣呔盤，曬足兩個鐘，黑咗好多呀！



7月7日(星期日）


繼續暑假第二擊：淺水灣玩沙嬉水！不過今次，就得芬姨同心心表姐陪我哋一家人去～～

呢日同上個禮拜响長洲嗰次一樣咁曬，不過今次換晒衫褲玩，
又有太陽遮，舒服啲。。。。。



細個好驚沙既皓皓，而家不知幾鍾意～～

雖然得表姐陪玩，但依舊玩得好開心～～

好曬，好彩有少少涼風～～

 皓皓好驚海浪架，以前行近啲都成身震。。。。呢日幾經鼓勵，終於肯戰戰兢兢咁走落水～～

最後爸爸抱住，成個人浸晒落去。。。。
yeah！呢次算係皓皓既第一次下(海)水禮～～

玩到中午，烈日當空，係時候沖身走喇。。。。。
沖完身，响公園玩一陣，再過觀音像嗰邊逛逛，我哋就番歸喇～～
雖然只係玩咗半晝，但係已經攰到傻咗～～


7月8號，皓皓暑假正式開始，嘩。。。。有排玩呀！！！