又係時候紀錄吓皓皓既生長&學習情況～～
上次睇醫生既時候度高＆磅重：高80cm；重30磅，不過我睇佢呢兩個禮拜應該又高咗。扯高咗，個人好似瘦咗啲．．．．牙仔方面，自從1歲3月出第1隻牙，到而家差唔多1年，只係有12隻牙，前面8隻；大牙4隻，算唔算慢呢？
性格方面，個樣極度與性格不符，齋睇樣可以呃晒其他人，出親街都俾人激讚，話佢好乖、好斯文、好靜、好聽話．．．你哋睇吓佢個樣，橫睇豎睇都唔似反斗型，但係實際就．．．．
媽咪已經冇氣解釋，啲人以為媽咪禮貌上都要係咁咦彈吓個仔，但係查實佢响屋企真係好曳，又硬頸，受軟唔受硬（有時軟都唔受），專「恰」嫲嫲，如要求嫲嫲帶佢入廚房玩、攞電飯煲落地玩、入廁所玩水．．．．．
又鍾意同你唱反調，你用緊電腦佢係要熄總掣；你執屋佢幫你逐樣逐樣玩具倒番出黎，鬧佢啦，佢話：sorry，mami！點知唔駛1秒，佢又倒啲玩具出黎，最抵死係佢望住你用啲挑釁既語氣講：我又要倒！！嘔血喇，就黎！
食嘢方面，最鍾意就係食啲冇益既嘢，如腸仔（見上圖）、魚蛋、薯條、糖等等，又嘜鬼嘢飲料都鍾意，如可樂、檸檬茶、奶茶等；好彩，都肯食有益既嘢，如菜呀、紅蘿蔔呀、魚呀、水果呀．．．．仍然食好多粥仔同飲好多奶，反而大人飯、粉呀就食得唔多，所以仍然要煲粥仔俾佢食～～
睇吓阿b隻手渣住啲嘜？
呢日去便利店買嘢，阿b'臘'咗三條腸仔叫媽咪俾錢，
可想而知佢既愛'腸'程度．．．
講嘢方面都算係咁，好多意思都識表達，不過都係嗰句：衰在對住陌生人把口撬極都唔開．．．．．最近又鍾意講埋啲好無聊但又好攪笑既說話，呢啲說話多數係响佢個同樣係極度無聊既爸爸度學番黎既，例如～～
我接接唔到囉！（其實係想講：我接受唔到囉！）～～
頂媽咪 / 爸爸 / 嫲嫲唔順（因為爸爸成日講'頂你唔順'，佢識得自己代入唔同既名囉）～～
離晒譜！～～
葉問爸爸！（睇怕無嘜人明呢句既意思
，因為係無聊爸爸自創既！佢強行將葉問呢個名詞變作動詞咁用，成日對住阿b講：我葉問你！意思即係用詠春既招式「黐手」黎打阿b（當然只係細細力打），咁阿b咪有樣學樣咁講「葉問爸爸」，講既時候亦都用佢既小手使出佢既「黐手」招式黎打爸爸。雖然爸爸有教壞細路之嫌，但係真係好好好好笑．．．．．
五月二十九日（星期六）
呢日媽咪冇同阿b出街，只係落商場食下午茶。
阿b好叻叻，而家踩單車踩得好快，仲識轉彎。。
去到商場，即刻棄車去彈波波同夾公仔。
要學媽咪咁叉住隻雞翼食。。。。
好似食得好滋味咁。。。
究竟食緊嘜？？
之唔係pizza囉～～
食到好兇狠喎。。。
個pizza邊好硬好難咬，睇吓佢，
食到反晒白眼添
卒之都係放棄咗～～
食飽飽，有氣有力，要落地推車車。。。
近排ok有得買既包包超人玩具，
搵咗好多間都搵唔齊４款，
呢日响商場間ok竟然買得齊。。
４款合埋好似個遊樂場咁，都幾得意！
沒有留言:
張貼留言