三兄弟聚頭

十一月二十日(星期六)

呢日爸爸冇假放，朝早，媽咪單拖帶皓皓去大坑既一間幼稚園參觀兼報名，呢度環境好好，遊樂設施多，皓皓玩得超開心，結果幾經艱辛，媽咪先至氹到皓皓離開學校。

夜晚，爸爸媽咪就約咗一班契爺拆大閘蟹兼打邊爐，仲凱哥哥同哈哈哥哥都有黎呀，佢哋三兄弟好耐冇見lu，呢晚真係難得聚頭呀！不過皓皓性格慢熱大家都知，佢差唔多要成粒鐘先warm up完，先肯同兩個哥哥玩埋一堆．．．．

朝早十一點左右黎到幼稚園，都幾多人．．．

遞完報名表，首先參觀吓課室～～

呢個呔盤簡直係皓皓既'飛佛'～～

佢玩到唔捨得走。。

雖然鍾意玩，但係都肯講道理，知道後面有小朋友排隊等，

玩一陣就讓俾下一個，跟住自己又再排過，

就係咁，玩兩玩，再排；玩兩玩，再排。。。

結果齋响呢架'車'仔上都dum咗好多時間～～

最後媽咪話去遊樂場玩，佢先至肯離開架'車'仔～～

屋仔係皓皓另一個鍾意既玩意～～

單係開窗、閂窗，已經夠佢玩半日。。

媽咪喝令皓皓停一停，坐低飲啖水～～

跟住玩sir滑梯～～

近排開始夠膽學其他小朋友咁，捉實條柄做掛爐鴨，

fing兩fing先至sir落黎～～

滑梯側邊有條鐵鍊俾小朋友爬上去，

老鼠仔皓皓終於可以靠自己爬到頂，

唔駛媽咪扶，叻叻！

當然媽咪都有啲唔放心，亦步亦趨，

所以跟到超攰！

行平衡木～～

媽咪話：皓皓，試吓自己行呃！

結果皓皓即時踎低搵嘢扶，驚死得佢咩！

皓皓大個仔喇，呢隻微型滑梯就快sir唔到lu！

玩完，氹到皓皓洗手諗住走啦，點知．．．．

佢實在太掛住呢架'車'喇！

又拉媽咪過去排隊．．．

卒之媽咪話同佢去食嘢，佢至肯走！

出到校門就打的落銅鑼灣，媽咪個肚打晒鼓，

好想食sushi，又好想食榮記車仔麵，點算好？

最後媽咪俾皓皓話事，問咗佢三次，

佢都好肯定咁答：壽司！

其實媽咪問三次咁多，係咪想皓皓答'食粉粉'，

然之後去食榮記呢？媽咪自己都唔知！

結果當然跟從皓皓意願，我哋兩母子去咗千兩撐枱腳．．．．

你哋睇皓皓幾嘆！又壽司，又炖蛋～～

唔好睇佢好似好乖好正經咁食，其實佢周身郁，

整跌咗三次筷子，幾樣衰！

食飽飽，去皇室堡玩具反斗城玩～～

而家真係超鍾意玩車，

日日响屋企都要嫲嫲同佢玩渣車、泊車。

每晚放工，房裏面都有４架車泊咗响度，

（單車、電動車、一架bb時玩開既車仔，仲有購物車仔）

攪到行都冇位行，激屎！

睇心心表姐玩睇得多，連滑板車都唔放過．．．

不過姿勢幾靚喎，似模似樣～～

最後就捧住呢部搖控車唔肯放．．．

結果當然係買咗啦！

番屋企瞓一陣覺叉叉電，等爸爸放工，

就上輝契爺屋企食蟹兼打邊爐．．．

咪睇皓皓對住哈哈哥哥好熱情咁，

其實佢攬住媽咪成粒鐘先開始肯同人玩～～

佢哋三兄弟好耐冇聚頭喇！影幅合照先啦！

仲凱哥哥出年升小學喇，拍埋佢哋兩個度好似好大個咁～

大人打邊爐食蟹，細路都唔係少嘢食架！

ee呀、哥哥呀買咗勁多嘢食請小朋友食．．．

同哈哈哥哥差７個月，始終啱玩啲．．．

同皓皓好投緣既老鼠哥哥～～

皓皓：請骷髏頭堡賜我力量．．．．

哈哈：喂！呢啲係珍寶珠黎架．．．

就咁舉起冇用架！要食至有力量架嘛！

yeah！終於成功氹到班大人拆開俾我哋食喇！cheers！

皓皓你駛唔駛咁興奮呀？？

食飽飽，發現新大陸．．．．

有水玩呀，皓皓至愛～～

姐姐仲攞隻蟹仔玩具俾皓皓玩噴水添！

哈！你哋班大人响枱上面拆蟹，

我响下面夠有蟹仔玩啦！