Disneyland 日

4月22日(星期五)

皓皓越大個仔就越多要求，例如每次睇到disneyland既廣告，見我對眼唔係望住電視既時候，就會夾硬推我塊面對正電視，然後問：係咪帶我去呀？

見皓皓咁想去，又見對上一次去已經係一年前既事（皓皓兩歲生日），所以就等埋心心表姐放復活節假，一齊入去玩一日喇～～

復活假期，都預咗會超多人。

黎到後，又發覺比想像中好喎。。。

有個超級車迷皓皓响度，又點會錯過呢啲可以渣呔盤既機會呢？

先同皓皓坐觀光巴士入到夢想世界落車。。。。

皓皓話驚，唔玩小飛象。。。。所以只係坐响呢隻佈景度影張相～～

黎到小小世界，都有半刻猶疑過玩唔玩好。。。。

因為皓皓之前試過玩到喊。。。

不過諗住皓皓而家大個仔啲，應該會冇咁驚，

加上諗住有心心表傍住會好好多，所以都入咗去玩。。。

果然冇喊，不過又唔算好雀躍～～

買完水諗住去玩小熊維尼。。。。

不過見到小木偶喎，當然要排隊影相啦！

終於輪到我哋。。。影張大合照先～～

玩完小熊維尼，啱啱好夠時間霸位睇巡遊～～

等緊。。。。。呢個情景，

不期然令媽咪諗起皓皓對上一次睇巡遊係响東京迪士尼，

嗰次佢真係high到呢，又拍手又大叫。。。

今次真係差好遠。。。。唔通上次响夜晚，氣氛真係好啲？

事實上，嗰次睇夜晚又真係靚好多～～

皓皓最期待一刻～～玩馳車天地！

話說响呢架佈景車影相既時候，皓皓已經講明陣間要坐紅色車。

不過實際上根本無得揀顏色，輪到邊架就要上邊架，

媽咪都擔心緊陣間坐唔到紅色車，皓皓會好唔開心。。。

不過好彩。。。咁多顏色既車，都咁啱輪到紅色！

今次爸爸專登坐隔離線，去到中段偶然會同皓皓架車相遇，

皓皓興奮到不得了！！

之後當然玩埋巴斯光年。。。

雖然入面黑蚊蚊皓皓有啲驚，不過有得射槍，都ok！

全日最high，睇怕都係呢度喇。。。。

唔好話小朋友先鍾意玩水，爸爸媽咪都陪皓皓玩到濕晒。。。

皓皓仲要走埋啲出水既位置到，結果衫褲鞋襪都濕晒～～

好在媽咪早有準備，不過就帶漏對鞋～～

卒之爸爸要攞對鞋入洗手間用乾手機風乾對鞋，

先俾番皓皓著～～

最後行埋啲shop，買咗少少嘢就走喇！

今次皓皓買咗隻反斗車王手錶，一支巴斯水槍，

心心表姐就買咗隻維尼手偶～～

今次又冇睇煙花，下次再黎，一定要睇埋先走～～