新春篇part2~~醒獅賀歲+試玩新playroom

1月24日(星期二)年初二

每年初二，軒軒表哥仔住既屋苑都會請醒獅隊番黎，响會所門口前既空地舞獅賀歲；上年媽咪已經想帶皓皓去湊吓熱鬧，不過時間太早喇，要9點幾出到九龍，所以最後冇去到！今年，一樣唔願咁早起身，不過同皓皓講話睇舞獅，佢好似好有興趣咁～～～
阿仔話想睇，無理由掃佢興架！唯有瞓少陣，校鬧鐘晨早起身飛的出九龍啦！

 

去到屋苑已經差唔多開始，啲位都俾人坐晒，只可以企後排睇，不過都睇得好清楚。。。。

唯一辛苦啲係皓皓唔夠高，要全程抱住佢睇囉！
皓皓睇到兩條舞獅跳上木樁，就驚嘆：嘩！條紅色好勁呀！
點解淨係讚條紅色獅唔讚條綠色獅？
一來條紅色跳得高啲，二來。。。。皓皓不嬲都鍾意紅色架嘛，hehe～～～

仲有財神爺出黎派金幣朱古力。。。。。

兩老表連張大揮春都可以玩一餐。。。。

正正經經影番張相先啦！

會所入面擺咗個攤位遊戲。。。。。
皓皓，你茅呀！企咗响紅線前面拋～～～

出番會所，見到兩條舞獅放咗响地下，即刻俾皓皓過去摸吓佢鍾意既紅色獅～～

爸爸係都要抱皓皓企上啲木樁度，仲笑晒口。。。。。

阿仔驚到腳仔都震埋喇，哈哈！

見到個大鼓，又好有興趣，過去打兩吓先。。。。。

之後諗住去公園玩，點知落雨喎。。。。玩唔夠一陣就要走人喇！

唔知係咪大家都覺得未夠盡興呢？食完嘢，我哋又移師去黃埔既冒險樂園玩～～



呢度既波波池有幾層高，真係好大！之但係。。。。
佢哋就玩得開心喇，難為爸爸跟佢哋跟到氣咳。。。。。

呢日皓皓真係玩到盡呀，除咗玩踫踫車，仲玩埋海盜船。。。。
媽咪諗住細膽豬皓皓一定會好驚添，點知佢又玩到笑晒口喎，估佢唔到呀～～

 

每次黎都會坐小火車，爸爸又要陪坐，辛苦晒～～
坐完小火車，媽咪見到blog友宇正mami呀，不過當時唔係太肯定，諗住望清楚啲既時候，
宇正mami就已經走咗喇，真係可惜，見唔到宇正bb真人添！

呢架車都拋得幾犀利架，爸爸話嘜都要俾皓皓試吓喎，就係咁。。。。又上咗去玩喇～～

 

一開車，皓皓嚇到成個樣呆咗。。。。
轉咗一個圈左右，開始識笑～～～
呢個爸爸，我諗佢唔駛好耐，會拉埋阿仔玩迪迪尼既太空山，
就好似當年既心心表姐，一夠高度就俾爸爸拖咗入去玩，結果嚇到鼻哥窿都冇肉～～～

我哋响冒險樂園玩到4點幾，真係攰到爆。。。。。
之後番屋企瞓一陣，就去嫲嫲度食飯喇！



1月25日(星期三)年初三

前排搭車既時候見大角咀開咗一間新既playroom，當時爸爸應承心心表姐有時間會帶佢黎玩；呢日初三見無嘜嘢做，就去look一look，睇吓地方大唔大，多唔多嘢玩～～

我哋先去奧海城個food court醫肚～～

playroom地方唔算大，擺咗三座大型滑梯，都足夠小朋友玩到樂而忘返。不過。。。。。
啲滑梯又高又直，細膽豬皓皓根本唔敢玩，唯有勞煩爸爸抱住'sir'。
爸爸尋日勞役咗成日，今日又要爬上爬落，真係慘過返工呀！

爸爸攰，皓皓驚，唯有玩呢座短滑梯算喇！

不過呢座滑梯真係似俾bb仔玩多啲囉！

咁樣設計真係有啲唔妥，一係就咁刺激，一係就咁小兒科。。。。
最慘係，除咗滑梯，其他設施太少。。。。。



其實仲有一樣幾好玩既攀石～～
媽咪問皓皓玩唔玩，皓皓話玩；點知，差唔多排到既時候皓皓竟然縮沙。。。。。
媽咪再幾經遊說，皓皓終於肯玩，yeah！
睇張相係咪覺得皓皓爬到好高咁呢？



其實，係媽咪專登'低抄'所造成既假象。。。。
又其實，皓皓只係爬咗１級，距離地面只有咁多多。。。。

但係佢已經腳仔軟，不斷話驚驚。。。。

好似俾人點咗穴咁，郁都唔夠膽郁，wakaka。。。。
sorry皓皓，媽咪唔應該笑你，不過你個樣真係好鬼爆笑～～～

試玩完新playroom，始終覺得，西寶城嗰個多嘢玩啲，同埋啱皓皓玩多啲~~