九州樂滿fun之旅2012~~Day 2(part 2):Harmony Land

8月10日(星期五)

Day 2( part 2)：Harmony Land

離開九州自然動物公園，我哋向下一站進發：Harmony Land～～
我哋既目標係响三點前去到，咁就有兩個零鐘玩，應該夠喇卦！

响別府駅搭十幾分鐘火車，黎到杵築。。。。。。

今次旅行，影火車成為皓皓其中一個指定動作～～

响杵築站有接駁巴士到Harmony Land，不過啲巴士班次真係疏得離譜，好彩呢段路程好短，
我哋坐咗呢個trip裏面既第一次的士，如果冇記錯坐咗1200yen～～
入場券响香港縱橫遊買定，每張平800yen，可以補貼來回的士錢，hehe～～

去到Harmony Land果然未夠三點，yeah！
爭取時間，即刻衝入場，連門口位都唔記得影，OMG！

朋友成日講笑話係媽咪鍾意Hello Kitty，就迫皓皓都鍾意埋一份。。。。。
實則係，皓皓堅係鍾意Hello Kitty，亦好鍾意粉紅色～～

所以呢期。。。。。佢勁like Melody！
入場冇幾耐就見到Melody，皓皓好興奮咁衝埋去拖住Melody，超攪笑！

坐Hello Kitty遊園小火車～～

火車頭～～

再戰boat ride。。。。。點解咁講？
事緣去東京hello kitty land嗰次坐boat ride，皓皓驚到喪喊～～

事隔兩年，大個仔咗咁多，應該唔喊喇卦～～

入面啲場景好靚。。。。。

今次玩完係笑住跑出黎，冇喊喇～～



超級可愛～～

不過冇諗過皓皓會揀呢隻公仔～～

玩踫踫車～～

不過踫踫車係個pass唔包既，要另外俾錢，200yen一次～～
玩咗兩次，氹皓皓去玩第二樣～～

跟住玩皓皓近期好鍾意既咖啡杯～～

其實爸爸媽咪都驚轉到頭暈，不過為咗陪皓皓，冇計～～

超靚既幸福摩天輪，畏高既媽咪唔敢坐。。。。。
不過見到摩天輪下玩得好開心既皓皓，媽咪感到好幸福～～

周圍噴出冰涼既水氣。。。。。

皓皓high 爆～～

呢啲又係自費既遊戲～～

唔經唔覺，已經玩到4點幾～～

近

留番啲時間玩我哋既至愛～～抽獎！
喪癲！抽咗6次！好在啲禮物都好靚～～

仲要留番啲時間shopping買嘢～～
好多海賊王 x hello kitty呀！忍唔住買咗一件衫同一個袋俾心心表姐。。。。。
皓皓就揀咗一個hello kitty喼，要講多一次～～
係。。佢。。自。。己。。揀。。架！

臨走，見到主角hello kitty～～

Bye Bye喇，hello kitty！唔知幾時先再見～～



搭番的士去杵築駅，再搭番火車番別府～～
好興奮呀，今晚我哋會住成個trip裏面最貴既溫泉酒店。。。。。
唔知有冇想像中咁正呢？期待期待。。。。。

Day 2～～待續

九州樂滿fun之旅2012~~Day 2(part 1)：AFRICAN SAFARI

8月10日(星期五)

Day 2(part 1)：九州自然動物公園　AFRICAN SAFARI

呢日要超早起身，因為我哋要搭7:00am既SONIC EXPRESS由博多坐去別府，車程兩個幾鐘。酒店既早餐由6:30am開始，不過我哋唔想太趕，所以冇坐低慢慢食喇，只係攞個包邊行邊食。。。。

呢晚我哋會住別府，所以我哋要先check out，將行李喼寄存响酒店，只係執啲日用品入背囊就輕裝上路喇～～

今日第一個目的地就係九州自然動物公園，賣點係嘜？好多人都知，就係可以坐住架動物外型既Jungle bus 入園餵獅子大象長頸鹿．．．對於只係去過普通動物園既我哋黎講：超級期待呀～～

過條馬路就係JR站喇，勁方便！

去到月台先至係六點九(即係香港時間未夠六點呀)，真係冇嘜幾可會倒塔咁早起身！
難得阿仔被摷醒都冇扭計，十個讚！



响九州，就算你唔係火車迷，都會覺得欣賞唔同類型既火車係賞心悅目既事情！
呢架就係我哋要坐既Sonic express 特急ソニック3号！

裏面既座位好似米奇耳仔呀～～

9:22am到別府，超準時，同响網上check既時間一模一樣～～
落車，即刻去東口既information center買套票：3500yen一套（包來回巴士、動物園入場券、Jungle bus ＆ 飼料）！

跟住過西口嗰邊，一出就見到亀の井巴士站～～
响2番巴士站等，上41號往動物園方向既巴士，總站落，車程50分鐘～～

兩個幾鐘火車加成個鐘巴士，皓皓都唔肯瞓，有啲擔心佢會玩玩吓頂唔順～～

 

別府有溫泉之鄉之稱，果然到處都見煙氣騰騰．．．．．

嘩！終於到喇！見到隻假笨象已經有啲啲興奮添～～



搭巴士小知識：上車既時候攞張券，上面寫住你上車嗰個站既no.，
例如我哋响別府西口上車，no. 係8，到落車嗰陣，望住呢個牌，就知自己要俾幾多車費。
Wow～～要760yen呀！一啲都唔平！好彩個套票包埋來回巴士啫！

一入園就見到呢啲Jungle bus ，情緒立即再高漲dd，wakaka～～

媽咪响網上預約咗11點既Jungle bus ，時間預得好好（要讚吓自己先，hehe）～～

呢啲Jungle bus有好多造型架，不過我哋冇走去逐架影喇～～

我哋係坐呢架．．．．嘆埋杯雪糕就啱啱好夠鐘上車～～

上車先攞到一兜飼料，然後司機大叔向我哋講解守則，教我哋邊一啲飼料係餵邊一啲動物．．．．．
我哋都唔識聽日文，一家人响度on居居咁笑，大叔都留意到成車人得我哋唔係本地人，驚我哋唔明，
於是又好關照我哋，同我哋講解多次．．．．不過都係用日文，真係攪笑！
為咗回饋大叔既誠意，爸爸媽咪不斷點頭，示意．．．．．完全明喇！大叔，你可以慳番啖氣！

好！講完一大輪，終於出發．．．．．

興奮的皓皓～～

熊出沒．．．．好大隻呀！

有冇發現皓皓個樣有啲緊張？

當然喇～～～因為眼前係張開血盤大口既獅子呀！
一隻隻萬獸之王就近在咫尺，令到全車人情緒亢奮，we wa鬼叫聲此起彼落～～

餵完兩舊肉冇得再餵，獅子大哥冇嘢食，突然咆哮咗一聲，嚇到我哋呢．．．郁都唔夠膽郁！
大家睇吓皓皓對腳仔，越縮越上，就知佢有幾驚慄～～

駛離獅子區，走過黎既係馴良既羊咩咩～～

皓皓個樣當堂寬容番～～

大笨象，用個鼻攞嘢食，好攪笑～～

到皓皓既至愛動物出場喇～～giraffe呀！

長頸鹿原來鍾意食橙架喎．．．．．．
將舊橙擺响面前引佢過黎先～～

佢耷低個頭食喇．．．．．皓皓睇到勁勁勁開心！

仲即刻開心到吱吱喳喳，好多嘢講！

嗱！皓皓，睇清楚啲喇，你成日話，世界上最高既動物giraffe．．．．就係咁既樣喇～～

影番幅合照兼度吓高先～～

園裏面仲可以近距離睇到好多其他動物，真係大開眼界！
比起去南非睇動物，坐呢度既Jungle bus可能係小兒科；但對於我哋一家黎講，絕對算係超開心難忘既經歷！
雖然好多人話動物園細、Jungle bus一陣就坐完、入場費勁貴．．．．．不過爸爸媽咪就覺得，值囉！

坐完Jungle bus坐馬車。。。。。

坐馬車係皓皓要求既，不過當渣馬車個叔叔叫佢企响車頭位時，佢又有啲淆底～～

臨尾嗰段直路大叔指揮兩隻馬跑，雖然唔係坐响馬背，不過都幾爽～～

坐完馬車，俾皓皓試吓騎馬仔．．．．．
皓皓個頭大到呢．．．．要最大既size至啱戴～～

皓皓指定要坐白色馬仔，因為．．．．．佢至愛既紅武侍都曾經响啲劇集當中騎過白色馬！

細膽豬皓皓猛咁叫媽咪傍住佢，話要媽咪企响佢側邊一齊行喎．．．．．．
如果唔係見過紅武侍策騎，相信皓皓未必肯坐上馬背～～

行完一個沙圈，個樣輕鬆咗好多．．．．．

騎完落馬之後仲敢摸吓馬仔！
事後，皓皓同媽咪講，話覺得騎馬好好玩喎！

騎完馬入精品店逛，皓皓二話不說就攞咗隻giraffe手公仔同一個giraffe袋仔～～

又要同吓啲大giraffe公仔影相～～



穿過精品店就係餐廳，成朝早淨係食咗個包既我哋餓到打鼓．．．．．
响呢度都預咗啲嘢食唔得架喇，嗌咗個飯同炒麵，果然．．．．普通到冇得再普通，不過就唔算難食～～
皓皓個樣嬲爆爆，何解？因為佢未買夠囉！佢話仲想買禮物喎．．．．．

離開餐廳，仲有少少時間．．．．．本來想去餵吓袋鼠，不過聽講啲袋鼠唔驚人，會响你周圍喪跳，
睇怕皓皓都會驚，所以唔去喇！

改為餵馬仔～～

皓皓都係要爸爸捉住佢隻手至敢餵．．．．．

諗住去抱老虎仔影吓相，點知仲有成廿幾分鐘，下一節先至開始～～

我哋預計坐1點幾嗰班巴士，所以抱唔切老虎仔lu．．．．．．．
一個鐘先有一班車，無謂等下一班，阻延下一個行程；算啦，唯有離開動物園喇！



坐火車去下一個目的地，邊度？下回揭曉～～

呢架火車車廂入面好有藝術特色呀！

Day 2～～待續