九州樂滿fun之旅2012~~Day 1:天神

今年暑假旅行，日本仍然係我哋既不二之選。上年前年我哋都去咗大阪，所以一定唔會再去；原本諗住會去返東京，因為整整兩年冇去過東京，真係有啲掛住，加上東京買、玩、食，樣樣齊備又方便，再再加上熟悉行情，可以偷吓懶唔駛plan行程．．．．．．不過，到要決定嗰刻，爸爸媽咪又突然變卦，想去吓啲未去過既地方。左諗右諗，最終扑鎚～～去九州！

決定咗去九州，媽咪就忙喇！首先即刻搵朋友幫手hold Asia miles既機票（媽咪今年儲夠飛行里數換兩張來回機票，正！），因為去九州既直航機唔多，機位緊張；攞到機位，就即刻去旅行社買埋皓皓嗰張機票；然後揀酒店book房、plan行程，顧得旅行啲嘢又要完埋公司啲手尾，真係忙到踢晒腳。

Search資料嗰陣，又發覺好多地方都想去，三心兩意既媽咪淨係响行程取捨方面都煩惱咗好耐；諗行程之餘又要check火車班次，因為要去既地方車程遠，火車班次又唔密，搭唔切一班車又會影响下一個行程；仲有仲有，又擔心颱風暴兩，八月份係雨季風季，之前聽新聞就講阿蘇嗰邊嚴重水浸．．．．．．


出發之前係咁上網check天氣，睇到嗰幾日既天氣都ok，個心先至定啲！（媽咪覺得呢個trip攪到自己有少少神經質～～）

今次旅行名副其實係一次親子之旅，plan行程樣樣以皓皓為先，希望皓皓玩得盡情之餘又可以有個難忘既體驗．．．．．

好喇！羅氏一家九州樂滿fun之旅．．．．．開始！

8月9日(星期四)

Day 1：福岡空港→博多Comfort Hotel(Fukuoka)check in→天神→酒店

全日只得一班直航機飛福岡，11:20am起飛，我哋九點幾到機場，時間充裕，例牌食個早餐先到閘口等上機～～

旅行前戒嚴，冇得食糖同飲凍嘢；去旅行就俾佢解禁，一到候機處即刻要求攞包糖出黎食～～

覺得自己大個仔喇，係都要學大人咁自己拎住一張機票入閘．．．．．

今次坐細機，要坐車兜到去泊飛機既位置自己行樓梯上機～～

唔俾影相，不過媽咪都快手快腳影咗一幅～～



飛機真係好蚊型，得左右兩行，每排三個位。
今次一早上網劃咗位，所以坐得好前，真係好～～

預咗皓皓唔肯咁順攤瞓覺架喇，只望佢唔好扭計嘈住人．．．．．
好彩佢有啲細藝，畫吓畫，玩吓ipad，都冇嘜點扭。



航空公司送既禮物包～～

早餐都未落格，又上飛機餐喇，點食得落呀？
Haha，其他嘢可以唔食，但一定要啃咗杯雪糕，因為係媽咪至愛既Häagen-Dazs cookies & cream～～　

飛福岡機程短過去東京大阪，三個鐘左右已到埗～～



福岡空港裏面有座大山笠，响呢個位一出就有接駁巴士由國際線坐過去國內線～～
跟住响國內線有地鐵坐去博多、天神呢啲shopping地帶，好方便～～
我哋間酒店响博多，由空港坐去博多只係十幾分鐘車程，真係．．．．．
從未如此近過！
即使搭的士都係1200yen至1500yen，不過我哋諗住今日會再坐多兩程地鐵，
所以我哋買咗地鐵既一日乘車券，咁樣呢程當然係坐埋地鐵抵好多啦～～

酒店非常就腳，一出火車站過條馬路就係；到酒店，咋咋林擺低行李然後出去喇！
我哋既目的地係兩站之隔既天神－－各大shopping mall集中地，响八點收鋪前，我哋要去出血喇～～

一到天神站，先去地下街間hello kitty店朝聖．．．．．
雖然媽咪已經唔似得後生嗰陣瘋狂儲hello kitty，不過都唔捨得唔過黎望一望～～

買咗幾樣九州限定既hello kitty產品，跟住．．．．．



當然唔少得呢樣玩意啦！
爸爸媽咪超愛玩呢啲抽獎，500yen抽１次，估唔到皓皓都學晒我哋，一見到就要抽！
一抽就抽咗４次，成個旅程究竟玩咗幾多次？最後真係要結算吓至得．．．．．

由地下街穿上地面，經過商場地庫既super market，見到啲好精緻既蛋糕！
真係想慢慢行吓super market，不過我哋要趕住去搏殺呀，wakaka！

五點鬆啲黎到天神，仲有兩個零鐘時間shopping ，我哋鎖定目標，行Iwayata岩田屋，
因為岩田屋有我哋想買既brand！
估唔到淨係行呢個商場，已經殺到我哋一頸血，而皓皓，梗係唔會俾我哋齋買自己嘢啦！
佢揀咗副戰隊玩具，呢隻戰隊相信係日本呢邊播緊．．．．．
香港呢邊而家播既武侍戰隊，响嗰邊兩年幾前已經完咗，睇怕香港播呢輯戰隊既時候，呢副玩具連屍骸都冇lu！

可以變槍，可以變呔盤，算係戰隊系列產品裏面冇咁呃錢既一份玩具～～



血拼完畢，搵地方開餐喇～～

博多好食既拉麵店何其多，不過有名氣而當時又就腳既，非一風堂莫屬啦！

啲湯底好濃好香，yum yum 架呢！

皓皓不嬲都鐘意食拉麵，佢可以食到大半碗～～

 

番香港搵日都要去試吓一風堂，睇吓水準係咪差唔多先。。。。。

跟住行過去天神屋台一帶～～
屋台係博多既一大特色，即係日本既街邊大排檔。
啲嘢食好吸引呀，又串燒又炒麵，我哋想再食多一餐，奈何皓皓瞓著咗，唯有搵日先再黎試啦！



番到博多站已經11點幾，即刻走去兌換兩張北九州 JR pass同埋換定車票先。
北九州 5日JR pass超筍，我哋响香港買定仲有折，9000yen一張，5日任坐JR(山陽新幹線同落南部鹿兒島嗰啲除外)。
一程遠少少既JR，閒閒地都要2000幾yen，所以呢個pass真係非常超值！
我哋黎緊幾日都係坐JR為主，如果坐自由席既話，渣住個pass隨時就可以入閘；
不過因為有啲班次我哋要坐指定席，所以就要預先攞咗位先囉！

Day 1～～完