膏藥仔

呢個禮拜真係唔好過，好唔容易先捱到星期四。。

放完９日新年假，令原本已經好'痴'媽咪既皓皓bb變得更加貼身，平時肯跟既人，而家都為咗要痴住媽咪而唔俾人抱，所以媽咪叫皓皓做'膏藥仔'。。。

有一日媽咪撇甩皓皓b响婆婆屋企，跟住同爸爸落街買生果，點知冇耐就收到舅父電話，話皓皓喊晒口要搵媽咪，所以迫住要帶佢落樓話同佢一齊搵媽咪。。。。媽咪急步行去婆婆屋企樓下接番皓皓，佢一見媽咪就撲入媽咪懷抱，幽幽咁講：媽咪匿埋。。。。嗲到暈，攪到媽咪要即刻氹番佢。。。。

到呢個禮拜媽咪番工，仲慘！朝早皓皓b一起身，唔見媽咪瞓响旁邊，就喊住嗌：搵媽mi，我要媽mi；又唔俾媽咪換衫番工，隻手仔點都要拖住媽咪，唔俾媽咪出門口，連爸爸用佢最愛既提子糖氹佢甩開隻手仔，佢寧願唔要粒糖都唔肯放手。唉！媽咪就黎遲到喇！唯有監粗甩開佢隻手仔出門，結果皓皓喊到拆天。。。。聽住皓皓一句一句既'我要媽mi'咁步入電梯，個心真係好難受。。。。

放工番到屋企，皓皓仲會識講：掛住媽mi！你話呃！咁樣媽咪番工又有嘜理由唔成日心掛掛、囉囉攣呢？

皓皓食薯條得戚樣

番工時候超掛住皓皓b，唯有又用呢個方法，睇吓個blog呢啲咁開心既相望梅止渴啦！