同bb玩.....

呢排皓皓成日會講：同bb玩。。。。意思即係媽咪唔駛返工同佢出街玩。返完五日工，就黎患相思病喇，到星期六＆日，點都要同皓皓出吓街，即係皓皓話齋：同bb玩。。。。

二月二十七日（星期六）

去咗銅鑼灣食tea。。。

未有嘢食，攞啲餐具攪攪震。。。

狼吞虎嚥。。。。嘜皓皓你好肚餓咩？？

睇吓杯裏面仲有冇可樂。。。

干咗去！然後又lur住話：要可樂。。。

Time Square出面。。。。啲新年裝飾仲未拆。。。

呢個禮拜天氣暖番好多，爸爸已經急不及待要同阿b著短打。。。

阿b成日好不經意咁企得好型，hahaha！！！

嘩！好多波波！

吓？係燈籠？唔係波波。。。。

咁似樣，點識分啫？

聽日元宵，等我都應吓節猜吓燈謎先。。。

狂搶心心表姐杯雪糕食。。。

二月二十八日（星期日）

出街前响屋企玩到喪顛。。。

踩上玩Wii個腳踏到，跟住自己講：jump！

彈落地嗰吓，差啲成個'趴'街。。。

瞓醒晏覺，即刻飛的出去九龍，

會合正在參加麥當當生日會既軒軒表哥。。

你哋睇吓軒軒表哥望住個蛋糕望到入晒神。。

話說司機唔識路，兜咗好耐至去到，的士錢比平時多咗50幾蚊。

個司機竟然夠膽死收我個跳錶價，係咪有病呀？

我都未叫你賠番啲時間比我呀！

最後我pad低平時打的過九龍既錢就落車，踩佢都傻！

一場黎到，咁阿b當然唔執輸要食吓嘢啦！

口擔住一條，手渣住兩條。。

阿b，你驚冇得食咩？

食完嘢去公園玩一陣，

媽咪將爬高爬低、追住阿b既重任交咗俾心心表姐。

吹bubble。。。阿b見到呢枝bubble，就即刻講：懿晴！

因為呢枝bubble响日本買，

當時係懿晴姐姐陪佢一齊响萬博公園玩bubble。

所以阿b見物如見人，好自然咁就嗌咗姐姐個名出黎。

（都已經係一個月前既事，阿b又幾好記性喎！）

唔好睇佢好似玩得好開心咁。。。。

其實玩玩吓佢喊得好淒涼。。。

因為有個哥哥同佢爭拍bubble，

阿b唔夠人跑得快，唔夠人大力，動作又唔夠人狠。。

次次都俾呢位哥哥拍晒啲bubble。

阿b最終忍唔住，撲入媽咪懷中大喊，

哥哥一於少理，仍然追得興奮，拍得開懷。。

阿b唔知係咪心有不甘，竟然走過去叫心心表姐：

唔好吹！（好一個一拍兩散既心態！）

跟住阿b仲拉住媽咪，示意媽咪去第二度吹避開個哥哥。

雖然媽咪覺得應該大方啲，同其他小朋友一齊玩，

但係見阿b個樣咁可憐，又唔忍心佢冇得玩，

最後唯有轉移陣地算罷啦！