3月20日(星期六)
平時出街,媽咪通常都有爸爸或者芬姨傍住(除咗上playgroup同埋去婆婆度),因為要自己秤住個大袋同抱住皓皓bb,都幾係嘢架!你哋知啦,阿b懶到出汁,行唔夠幾步就要媽咪抱,佢又有番咁上下份量,咁樣抱,唔止手臂斷,腰都斷。。。。
朝早上最後一堂playgroup。。。。
呢次playgroup只有三堂~~
不過我哋又報咗下個禮拜開始既另一組。
皓皓可以繼續坐呢架佢好鍾意既車車。。。
今日既小手工~~蘋果沙槌
沙槌製作過程~~打開一個扭蛋,放啲豆豆入去,合番埋,
然後包奏紙,最後黏上眼、咀咀同埋耳仔。。
好好玩架,可以一面搖一面唱歌。。。
你哋睇我搖得幾起勁!只不過~~~
沙槌好可憐,唔駛1分鐘已經慘遭皓皓bb既毒手~~
媽咪救唔切佢。。。
冇法子啦,皓皓實在太掛住入面啲豆豆喇,
佢响學校已經想撕開佢攞啲豆豆出黎玩
上完playgroup送俾我哋既相同證書。
好鍾意呢句祝福~~
健康、快樂~~簡簡單單,就係媽咪既心願。
俾皓皓瞓一覺之後,已經三點幾,今日爸爸芬姨都要番工,心心表姐要去探爺爺嫲嫲,諗住响屋企攤抖吓就算。點知皓皓扭出街,又對住媽咪講:同bb玩!心軟既媽咪唯有換衫啦!決定單挑同皓皓出街玩。
去邊度好呢?咁啱媽咪睇到今期既飲食男女介紹車仔麵,一諗起銅鑼灣榮記就口水都流埋。好啦,一於出銅鑼灣啦!
維園花卉展~~原本都買飛入去,不過見咁多人,
即刻打退堂鼓啦!
影吓入口處既花都唔錯呃!
媽咪個傻婆,人哋個個渣住枝長鏡影呀影,
佢又攞個傻瓜機係咁影!
呢!見人哋個個影蜜蜂,佢又湊熱鬧。
仲沾沾自喜話,都唔錯咩!
兩隻蜜蜂都影得好清楚咁話喎!
你哋話佢係咪傻傻哋?
其實媽咪都唔算傻呃!阿b咪仲傻!
你哋睇吓佢做嘜?
佢走去'吹'啲蜜蜂呀!笑死人!
見阿b對啲花冇嘜興趣,走人lu!
去榮記食完車仔麵,
跟住我哋去咗皇室堡~~
啲復活蛋圍住晒,冇得影!
匿响塊板後面然後裝個頭出黎,古靈精怪!
我哋又去玩具反斗城玩咗一陣~~
皓皓睇到呢盒嘢,如發現新大陸般。。。。
係咁指住部機講:芬姨買、芬姨買。。。。
事緣芬姨前嗰排買咗呢部機送俾阿b,所以佢一見到部機,
就諗住同媽咪講。。。
玩到六點左右,我哋就起程出九龍同公公婆婆食晚飯。
今日既單挑行動既代價就係:條腰挺唔直咁滯。。。
不過見到皓皓玩得開心,得到既回報足以抵銷一切!
沒有留言:
張貼留言