呢一日，媽咪見屋企亂到一個令人不能接受既地步，終於的起心肝清一清佢。。。媽咪話我皓皓bb既玩具多到就黎冇位擺，所以有一啲我唔多玩既就唯有要捨棄。執下執下，媽咪發覺～～自從我九個月大買咗第一件包包超人玩具俾我開始，已經去到一個不可收拾既地步！將所有包包超人玩具擺晒出黎，原來。。
都幾咁壯觀吓喎！
之但係咁呀，媽咪．．．．
你唔好諗住以後唔再買呀！
雖然我好有信心你條購物癮唔可以一下子搣甩，
不過我都係提醒定你好啲
我人生中既第一件包包超人玩具～～
電話 ＆ 鼓仔。。
嗱，俾埋我九個月大既相大家重溫啦！
呢個波波池係我１歲多啲既時候，
爸爸知道我鍾意玩而堅持買俾我架！
講錯咗添！應該係話堅持要媽咪買俾我至啱！
迷你足球機～～入咗電有氣流添喎！
等我再大啲就可以向心心表姐挑機喇！
搖控車仔（右）＆ 對講機（左）～～
對講機仲有一舊，真係通到話，不過距離唔可以太遠。
話時話，另外一舊唔知去咗邊，搵極都搵唔到！
阿b未知對講機既有趣之處，只係將佢當作電話．．．
（右圖）呢個搖鈴係開始上playgroup之後買既。
因為每次上唱遊堂既時間，老師都會派一個俾我哋，
用黎打拍子，媽咪見我勁勁勁鍾意～～所以專登買俾我。
（阿b成日學老師將個搖鈴拍落隻大脾度，好得意！）
上年生日大伯送既生日禮物～～
阿b最鍾意開著個掣，由得佢自生自滅咁行同唱歌，
自己就走去玩第二樣玩具。
呢個算唔算怪癖呢？
最近買既～～爸爸叫佢做天馬流星拳
因為一拉弓，個拳頭會飛出黎。
阿b親身試範～～
最鍾意向住爸爸媽咪發射，跟住睇你作狀好痛苦既樣，
佢就哈哈笑。。。
哥爾夫球機～～仲有啲配件，但係已經玩到爛咗。。
呢件玩具好抵，响日本做半價既時候買。
因嘜事粗暴對待部扭蛋機？
因為要將啲波波同扭蛋倒晒出黎．．．
跟住擺番入去，自言自語地講：執麻雀．．．．
死啦，阿b有晒媽咪既真傳：勁鍾意玩麻雀
阿b好鍾意玩既發射器，但係最近玩爛咗．．．
諗住買番個一模一樣既，點知搵咗三間都搵唔到。
到而家都成日攞黎通屋推既購物車．．．．
'晒冷'時攞漏咗既水寫畫～～
最新既一件玩具～～吸塵機。
阿b成日攞真嗰架黎玩．．．．
所以媽咪一見到，就好自然諗都唔諗就買咗～～
雖然都明白細路仔唔需要咁多玩具，亦都唔應該响物質上太縱啲小朋友，不過啲玩具實在太可愛．．．．媽咪又永遠記得魯迅先生引述心理學既書講過：遊戲是兒童正當的行為，玩具是兒童的天使．．．．媽咪細個既時候，'天使'係奢侈品，咁而家能力許可既話，買多啲玩具俾阿b又何妨呢？最重要係，阿b鍾意媽咪陪佢玩玩具，玩具令到我哋既親子時間有更多既樂趣，咁都幾好呃！
沒有留言:
張貼留言