十月十日(星期日)
十月尾開始,睇怕媽咪都好唔得閒,唔係同皓皓報名,就係interview,仲有啲幼稚園會開放俾家長參觀。。。。今日屋企附近就有間幼稚園攪開放日,雖然媽咪冇打算報呢間幼稚園,不過反正有時間,就帶咗皓皓去玩喇~~
一入到學校,就見到有6、7架車仔泊咗响度~~
玩咗一陣,老師就叫我哋去聽故事,
皓皓好明顯唔想離開個車埸。。。
不過都肯聽話,入到課室,
皓皓超級緊張,全程捉住媽咪隻手,寸步不離~~
聽完故事,就去做小手工~~
入到呢個課室,心情明顯輕鬆好多...
皓皓做小手工越黎越熟手,
呢隻豬仔身上既顏色印同圖案,
大部分都係皓皓自己印上去同埋痴上去架!
做完小手工就扭媽咪同佢出番去踩車。。。
呢架車車皓皓吼咗好耐架喇,終於俾佢等到。。。
比起其他差唔多年齡既小朋友,
皓皓既踩車技術原來算幾好,
因為媽咪見好多小朋友都踩唔郁呢架車,
皓皓就控制自如~~向前向後、仲轉到彎。
又有個地方俾小朋友砌積木,都算多嘢玩~~
不過皓皓對大積木興趣不大,玩咗一陣就要走~~
另外呢一間課室,裏面擺既小玩意,
以訓練小朋友手指既靈活性為主。
皓皓响蛋糕上面插蠟燭,媽咪作狀要吹蠟燭,
皓皓緊張到伸出手阻止兼大叫:
媽咪唔好吹住!
終於插滿晒蠟燭~~
呼~~~呼~~~
唔俾媽咪吹,原因就係要留番俾自己吹!
老師教唱歌,皓皓懶到郁都唔郁一吓。。。
仲有啲造型衫俾小朋友著,
但係皓皓件件就唔肯著,
只肯求其褸住件老虎背心,連帽都唔戴。。。
玩釣魚~~
玩'筆'珠仔~~好難玩,珠仔會周圍走,
要迫粒珠仔去角落頭,仲要識就力至筆到,
媽咪教咗皓皓一兩次,佢就領略到箇中原理,
連老師都讚皓皓好叻叻!
媽咪同皓皓咁樣就玩咗兩粒鐘,
簡直好似番咗堂免費playgroup咁,抵呀!
-----------------
=================
-----------------
另外仲有啲平日影既相~~
每次去公公婆婆屋企例牌要玩既車。。。
軒軒表哥仔買咗副好攪鬼既眼鏡~~
最近買既雜誌~~送親子袋,好靚!
即刻叫皓皓黎一齊示範先~~
斜孭袋仔幾好,手揪嗰個就細咗啲。。。
第二朝去食早餐即刻話要孭,仲自己執嘢入袋~~
一路執仲要一路講:
我有好多嘢要帶落街,如果唔係。。。。
就冇嘢帶架喇!
大家明唔明皓皓想講嘜呢??
不過皓皓嘜都三分鐘熱度,呢日之後,
佢就唔再騷個袋仔喇,
所以媽咪將個袋仔送咗俾心心表姐用,
費事嘥咗佢啦!
Hysteric本雜誌貴唔貴呀?? 我覺得呢個款都幾靚呀!!!
回覆刪除[版主回覆10/30/2010 01:02:00]係呀,個袋仔好sharp~~
$200,都算合理個價錢。。。
希望皓皓入到間心儀幼稚園
回覆刪除[版主回覆10/30/2010 01:00:00]希望啦,不過今年入學既小朋友好多,競爭好大~~
男孩子對車硬係情有獨鍾
回覆刪除[版主回覆10/30/2010 00:59:00]係呀,越黎越鍾意玩車呀佢
間幼稚園咁多野玩,皓皓實係好想係度返學啦!今年報左幾多間呀?加油呀!!
回覆刪除[版主回覆11/14/2010 23:24:00]皓皓佢最鍾意平時番開親子遊戲班嗰間.....
我哋報咗7,8間,而家已經in 咗5間~~
係喎, 又到interview嘅時候喎, 有無好似我哋上年咁大包圍間間都報呀(香港讀書好變態, 細細已要為小朋友四圍去撲好的幼稚園, 目的是為著他們將來小學及中學鋪路, 甚至要為埋細佬、妹鋪路..., )? 你哋報咗幾多間呀? 而家出生率高, 記住報考多幾間到時先慢慢選擇呀, 加油....加油呀! 你哋係咪屬於中西區學校區呀? 祝皓皓b考到心儀學校呀, 為你們打氣, 加油啊!
回覆刪除[版主回覆11/14/2010 23:23:00]見你終於有時間打番blog,真係好,不過我諗你真係好忙~~
我主要報中西區同灣仔區(都報咗7,8間),大包圍就一定要啦,除咗因為多人爭,仲因為皓皓性格極度怕醜,响屋企把口'朗'過油,出到去見到陌生人就一句都唔講,我真係頭都痛.....
係呢,Bosco而家呢間讀得開唔開心呀?好想睇吓佢最近個樣....