失憶周末

九月二十五日(星期六)

今朝皓皓唔知攪嘜，竟然九點至起身（平時七點幾佢就醒，所以媽咪鬧鐘都唔校，諗住旨意皓皓叫醒自己），媽咪又唔知傻咗邊忽，竟然記錯咗時間，以為皓皓九點上堂（上咗咁多次都記錯），於是乎叫爸爸即刻幫手執嘢＆同皓皓換衫，自己就求其梳洗換衫，三個字就出門，上到的士，左諗右諗，先至醒起皓皓原來上九點半堂，打電話俾爸爸同佢講自己既烏龍嘢，點知爸爸好冷靜講：我知呀！我記得係九點半上堂呀。。。。吓！咁我頭先趕到裙甩褲甩你都唔出聲？？？

唉！媽咪發覺自己既記性越黎越差。。。。

番到學校，見到熊老師（皓皓上第二次親子遊戲班既老師），

媽咪竟然左諗右諗都記唔起老師個姓氏，超樣衰！

早咗到，俾皓皓玩一陣先入課室～～

入到課室，要俾個證老師貼一個貼紙，

點知媽咪又唔記得帶個證。

皓皓每一次玩玩具都只會揀砌 lego，唔玩第二樣。。。

唱遊時間～～老師先同小朋友逐個逐個打招呼。

玩遊戲～～扮渣車。。

不過呢個司機仔唔係好稱職。。。。

單手渣呔盤，仲吽吽豆豆咁。。。。

食茶點前祈禱～～皓皓仲未識雙手合十，仲唔肯瞇埋眼。

呢日既茶點係皓皓最鍾意既火腿通粉～～

唔～～～好好味！

聽老師講故事。。。

呆咗～～擘大個口得個窿！

又到其中一個皓皓好鍾意既環節～～做小手工！

問佢點漿糊點幾多？佢答：點少少！

玩體能活動：爬橋！

企响後面望住皓皓嗰位就係周老師，

媽咪覺得佢好錫皓皓～～

爬咗兩次橋，皓皓又抵受唔到'筆'豆豆既誘惑，

又衝咗過去玩～～

落堂前，老師嗌名，皓皓就行出去攞番件小手工同攞禮物。

皓皓見到禮物係食得既動物餅，即時笑逐顏開。

即刻要拆餅，小手工好可憐，俾佢遺棄在一旁～～

唔捨得走，仲要坐一陣呠呠車～～

上完堂，媽咪同皓皓去咗香港仔元氣撐枱腳～～

近排皓皓口味轉咗，以前唔食蒸蛋，而家好鍾意食～～

自己食晒一碗咁滯～～

下面呢啲係前兩日23號（追月日）既相，

順便post埋。。。

lunch time＠尖咀～～

入錢買郵票～～皓皓第一次接觸郵票，媽咪教佢郵票既作用，

兩日後問番佢，佢竟然仲記得：用黎寄信信！

＠冒險樂園

玩射籃～～但係因為個籃球太重，

皓皓唔係嘢嘢都夠力拋過欄杆，結果。。。

個波中欄杆反彈揼中自己個頭。。。

雖然阿仔喊得好可憐，但係媽咪真係覺得好好笑～～

同佢坐車仔先至笑番～～

番到屋企之後一齊整啫喱～～

皓皓一路攪一路講：'el'啫喱。。。

'el'係皓皓自己既獨創語言，即攪～～

某一次，皓皓將用飲管攪檸檬茶講成'el'檸檬茶，

呢日，佢又將攪啫喱粉講成'el'啫喱。。。

夜晚爸爸媽咪拆大閘蟹，為咗唔俾皓皓攪攪震，

令我哋食都食得唔安寧。。。。

我哋攞咗佢自己'el'既啫喱俾佢食。。。

睇吓佢！食得幾滋味！

全靠呢碗啫喱，爸爸媽咪至可以安安樂樂咁拆蟹！