月滿西九中秋夜

9月22日(星期三)

中秋佳節

人哋話：月到中秋份外明！但係今年中秋前夕，天氣差到無倫，天氣預報都講明我哋可以响中秋賞月既機會極微．．．．唉！媽咪仲諗住帶皓皓出去玩添，但係如果落雨，就真係邊度都唔駛去喇，認真掃興！一早打定輸數食完飯要匿响屋企度中秋，點知又有意外驚喜喎．．中秋夜，天氣好到不得了，冇落雨，涼風陣陣，仲見到圓圓既月亮高高掛添呀！真開心！

今年太婆、嫲嫲提早做節，所以响中秋正日，

媽咪可以返婆婆度食飯，So，媽咪好開心呀！

做完節，見冇落雨，於是即拉大隊黎到西九賞月玩燈籠！

呢度有個名為'月滿西九'既綵燈晚會，

啲綵燈雖然唔多，不過影出黎都幾靚～～

皓皓一見到蠟燭就渣住唔放，點解嘟晒咀？

因為枝蠟燭無火囉！

西九上空不時出現飛機＋直昇機，皓皓睇到好興奮！

心心表姐把握時機，帶埋架滑板車黎踩～～

皓皓對軒軒表哥呢個閃燈搖鼓好有興趣。。。

對自己個巴斯燈籠就。。。。

唔好話玩，直程望都唔望。。

呢排同軒軒表哥好啱key，成日玩埋一堆，好融洽咁～～

搵個位坐低砌吓熒光捧先～～

皓皓：心心表姐你砌緊嘜嘢呀？

心心：。。。。。。。。。。

哼！表姐掛住砌熒光捧唔騷我，等我做啲大動作引佢注意先～

哈哈！成功咗！心心表姐望我喇。。。。

唓！望一眼又繼續砌，都無解既～～

真係咁好玩咩？等我又試吓先～～

咦？點解皓皓玩玩吓熒光捧會踎响度郁都唔郁既？？

仲咁開心既呢？？

唔止添喎，仲嘟長晒咀仔，咩事呀？？

有咁大魔力。。。。之唔係蠟燭囉！

呢兩個碌柚皮係咪好有美感呢？婆婆整架！

皓皓試玩滑板車，仲學表姐咁放晒兩隻腳上去。。。

當然唔少得食吓嘢飲吓嘢。。。。

又同人玩乾杯～～

都係唔捨得啲蠟燭，又行番埋去看住。。。。

又不時痴痴咁望住啲蠟燭傻笑。。。。

終於忍唔住～～呼！吹熄啲蠟燭。。

渣住枝蠟燭奸笑～～想點？？

原來想學我哋咁點蠟燭。。。。

見佢好渴望想試，就俾佢點一次咁多啦！

中秋夜後記

今年中秋特別開心，一來可以返婆婆屋企做節食團圓飯；

二來就係天公造美，俾我哋可以一家人出去好開心咁玩一晚～～

你睇！見到晒月亮架！

呢份係上天賜俾我哋既中秋節大禮！

呢兩個碌柚皮，真係令媽咪好懷念呀！

小時候過中秋，婆婆會開碌柚，

將啲柚皮界開到好似花瓣咁，

然後俾我哋响裏面插蠟燭～～

婆婆仲會响柚皮上吉個窿，穿條繩，俾我哋响地上拉，

呢種玩法叫'遊沙碌'～～

一個岩岩蠶蠶既碌柚皮，點比得上花花碌碌既燈籠呃？

但係呢個簡簡單單既玩意，已令我哋玩得興奮莫名。

呢日婆婆知我哋會出去玩燈籠，專登留兩塊碌柚皮俾我哋，

等我哋可以重享'遊沙碌'既樂趣，

望住佢哋，真係勾起唔少回憶呀！

皓皓，媽咪都想你大個後會有好多美好既童年回憶。。。

記得上年中秋，媽咪知皓皓你鍾意玩蠟燭，

於是心裏面承諾今年中秋會為你預備一大盒，

呢日，見你玩蠟燭時一臉笑意同滿足，

相信响你既童年回憶冊當中，

會留低美好既一頁，對吧？