7月9日(星期六)
番黎香港之後既禮拜六,其實仲係好攰,不過都要帶皓皓出動,因為呢日係一個舊同學結婚既大日子,佢係媽咪中學時係死黨,媽咪同佢做足六年同窗,一齊度過好開心既中學生涯。諗起嗰陣時,我哋經常一齊扮病走堂去sick room,一齊玩代課老師,總之嘜都玩一餐。。。今日,大家都竟然做咗老師,調番轉頭俾啲細路激到生蝦咁跳。。。。呢啲係咪叫天理循環呢?
朝頭早去觀禮,夜晚去飲,本來都驚咁樣直踩皓皓會好攰,
不過為咗撐好友場,加上行禮地點响母校CU,
所以都帶埋皓皓黎~~
十一點開始,我哋十點半先响南區上的士,
好彩趕得切啫。。。。
新娘入場~~群眾起立。。。
皓皓見個個企起身,佢都即刻彈起,攪笑!
豬仔皓扮識睇程序表喎~~
之前同皓皓講好觀禮之後會帶佢去油麻地搵心心表姐玩,
結果佢每隔一段時間就問1次:
陣間係咪去油麻地呀?
媽咪猛咁'shu'皓皓,叫佢細聲啲,
佢就專登越問越大聲~~
又話好想快啲去搵心心表姐(開始有啲按捺不住)。
咁又係既,牧師講嘢講咗好耐,
媽咪都有啲頂唔順,何況皓皓?
雖然牧師講嘢有少許悶,不過能夠睇到兩個信仰相同、理念相同既人,
响耶和華既見證下許下與對方長相廝守既承諾,
其實都幾感動!亦深深感受到佢哋既幸福~~
牧師祝福完畢,等出去同新人影相。。。。
皓皓聽到影完相就走得,心情超靚~~
臨走前响Chaple門前留影~~
行落去火車站截的士,事關好少紅的會兜入中大校園~~
去奧海城會合芬姨&心心表姐佢哋食lunch,
見到變形金剛,皓皓即刻話要影~~
食完lunch去軒軒表哥仔屋企既會所玩~~
最近皓皓迷上玩呢隻game,不過仲未識發力狠推。。
响會所玩咗一陣,就去奧海城逛逛。。。。
奧海城三期開咗間自助式既乳酪店,
皓皓又話要自己'筆'配料~~
食完乳酪,就番婆婆屋企瞓陣覺。。。
因為夜晚仲要去逸東飲。。。。
朋友既仔仔唔多識中文,皓皓又唔識英文,
雖然全程冇嘜交流,不過兩個細路好似比賽咁,
食嘜都要鬥多鬥快,所以皓皓呢晚食既嘢幾乎係大人既份量~~
好彩皓皓瞓咗陣,媽咪先可以同舊同學吹水,食埋甜品飲埋糖水至走咋~
希望好朋友快啲生番個b,可以經常約埋出黎一齊玩就好喇!
皓皓好叻仔呀~~~出動成日都無乜扭計!!
回覆刪除[版主回覆08/20/2011 15:44:00]係呀,呢日佢都算待我不薄,全日都冇扭過計~~