8月11日(星期四)
呢日我哋又約咗標標舅父同軒軒表哥仔佢哋，今次係去沙灘玩。。。。上次去沙灘前，皓皓同媽咪講話自己敢落地踩沙，結果梗係得個講字啦！今次，皓皓事先又同媽咪講：我唔驚踩沙喇，我會自己落地行～～～
媽咪仲以為會同上次一樣，點知皓皓今次係講堅架
最初落地，媽咪睇到皓皓面有難色。。。。
但係佢竟然冇扭媽咪抱，好努力咁'乸'住口面向前行～～
皓皓，你今次冇講大話喇，講得出真係做得到，叻叻！
之前黎海灘，除咗筆沙沙，皓皓最鍾意就係倒水水。。。。
今次多咗一樣嘢玩，就係軒軒表哥帶黎既強力水槍～～
睇吓條水柱！幾勁！皓皓呢日以射人為樂，
媽咪舅父舅母，芬姨姨媽表哥表姐無一倖免。。。
吱完啲水落人哋個身度，佢就勁開心～～
朋友成日問得皓皓一個悶唔悶？點解唔生多個？
媽咪都驚皓皓悶架！所以一有時間就一定帶佢出婆婆度，
咁就有表哥表姐陪佢玩。。。。
皓皓同佢哋一齊又真係特別開心喎！
呢日唔算曬，但係都玩到塊面仔紅卜卜～～
仲影唔到你啲罪證？又用水槍吱表姐喇。。。。
軒軒表哥仔都唔放過。。。。
玩到六點幾就沖身諗住番屋企食飯。。。。
但係佢哋幾個好似意猶未盡，又要求玩公園～～
扯高咗既皓皓，顯得個身更加瘦，個頭仔就更加大～～
佢哋就玩得開心囉，難委媽咪响個公園度餵蚊，
玩咗一陣已經俾啲衰蚊咬咗６，７啖，痕死人喇！
同場加映～～
之前紀錄漏咗添！7月31號，皓皓第一次入戲院睇戲！皓皓人生中第一套睇既電影係～～反斗車王！媽咪本應預咗會嘥咗一張戲飛錢架喇，諗住皓皓一喊一扭，媽咪就同佢離場。。。。點知皓皓又好有耐性喎，竟然睇晒成套戲！算係咁啦！個劇情都幾深，幾歲既小朋友冇可能會睇得明，而皓皓只係嫌戴住副3D眼鏡成日跣落黎唔舒服，中途要求除咗佢，但就冇扭話要離場。。。。
睇片頭啲反斗奇兵，皓皓仲睇到哈哈大笑添～～皓皓第一次入戲院睇戲，成功！Yeah！
沒有留言:
張貼留言