模擬交通城活動日

4月17日(星期二)

呢日幼稚園攪活動，名為模擬交通城，仲邀請家長一齊到學校參加．．．．．．可惜，媽咪真係攞唔到假，唯有派爸爸一個人上陣！媽咪事前已經不斷叮囑爸爸要幫媽咪影多啲相，不過，闊佬懶理既爸爸始終都係冇帶相機去學校，只係用iphone求其影十幾相張俾媽咪交差就算，佢仲話自己影咗咁多相，算係咁啦！真係．．．．俾佢激屎！

同皓皓同組既女同學綽芝，係皓皓最like既女同學之一～～
上次觀課，佢兩個經常痴埋一齊，呢日活動日，佢哋又係全程痴住玩．．．．



皓皓對踩單車毫無興趣，但當老師問邊個想渣的士既時候，皓皓搶先舉手．．．．
原因好簡單．．．．單車响屋企日日有得踩，但係呢種車就唔係成日有得玩～～～



因嘜事笑到咁甜呢？

之唔係因為載住綽芝囉！
爸爸話皓皓載第二個同學仔嗰陣，兜一個圈就話到站叫人落車；
但載住綽芝既時候，就兜完一個圈又一個圈。。。。。
阿仔，你好大細超喎！





你睇佢兩個幾sweet，好攪笑！

不過唔可以全程霸住架的士既，要讓俾其他同學仔玩～～

所以皓皓去咗坐巴士。。。。
學校做戲做全套，坐巴士既同學頸上掛住八達通，
要嘟八達通先至可以上巴士架！

除咗渣車坐車，當然唔少得教吓一啲交通常識～～
例如睇紅綠燈呀，過斑馬線呀。。。。

仲有。。。。要守秩序排隊搭巴士。。。。。

巴士站有埋號碼牌架～～
自從呢日模擬交通城活動日後，皓皓出親街就係問：
5號巴士去邊架？40號巴士去邊架？70號。。。。。。。。
問到你人都癲！


同場加映～～四月份雜記

4月9號，媽咪放完復活節假開工日，不過holiday mood依然濃厚，加上皓皓未放完假，
所以放工之後番屋企再帶埋皓皓出銅鑼灣行街食飯。。。。

搭車途中，皓皓已經表態話想食sushi，咁。。。。就去板長食啦！

 

食完sushi去買鞋～～

皓皓上年對紅色crocs鞋就快唔啱著，而夏天皓皓又唔鍾意著波鞋。。。。

 

所以買一對新既俾佢。。。。

 

鞋上面係一對米奇米妮閃燈扣，皓皓對呢個新屎坑甚感興趣，
成晚不斷望住對閃燈扣，又大力咁踏地令到佢哋閃呀閃～～

 

跟住去皇室堡行吓。。。。

 

 

皇室堡做緊皮禮士糖宣傳，所以有好多巨型皮禮士糖擺設～～

响荷花度見到張車仔床，好得意！

4月20號，媽咪約咗同事去萬豪食宵夜buffet，放工後番屋企帶埋皓皓出去。。。。



宵夜buffet平一半，但係都有鮑魚仔食，正呀！媽咪食咗十幾隻～～






慢熱既皓皓，食到臨尾先至同哥哥姐姐們玩到興高采烈～～

 

4月22號星期日，去海怡食早餐，食完早餐去冒險樂園玩～～

呢個迷宮係最近至有既～～

除咗sir滑梯波波池之外。。。。

 

 

仲有皓皓最鍾意既車車～～

 

玩完迷宮，當然唔肯就咁罷休～～
射籃啦，碌ling啦，拋彩虹啦。。。。。玩個夠至捨得走。。。。

呢部叮噹渣車車唔知大家有冇玩過？要渣車攞到30個豆沙包至有一張獎勵卡～～～
其實媽咪真係覺得皓皓控制呔盤控制得好叻，佢攞到46個豆沙包。。。。

玩完冒險樂園就出九龍同公公慶祝生日～～

Happy Birthday to公公～～

 

同軒軒表哥孖住玩孖住食～～

4月26號，媽咪放假，難得可以湊皓皓返學放學～～

夜晚又去咗西環食萍姐，真係太好食喇啲生蝦，媽咪試過咁多間泰國菜，都係最鍾意呢間。。。。



近來愛上睇snooker比賽，仲愛上咗扮旁述。。。。
成日响度講：史粉史（查實係史提芬斯）唔入，留低個機會俾阿蘇利雲（即奧蘇利雲）。。。。
 之但係，電視播緊既其實係卡達對麥佳亞，真係俾佢笑死～～

 

播緊snooker比賽既時候，皓皓又會攞自己副桌球玩具出黎話要篤波。
仲會叫我扮旁述：媽咪，你幫我講分同埋講我打得好唔好。。。。
你哋話佢係咪超抵死呀？？hahaha～～～