復活假part3~~大浪西灣宿營記Day2

4月7日(星期六)

繼續我哋既宿營日誌．．．．．第一晚BBQ完咗之後，我哋就番房瞓覺，無錯，係冇沖涼，直接番房瞓覺，因為．．．．．我哋間房係冇熱水架！我哋一家三口連埋芬姨＆心心表姐係住細房，其他人住大房，大房係有熱水既，但係要攞咁多嘢過去輪沖涼，個沖涼房又細，唉！都係洗吓面抺吓身算喇！爸爸就有過去沖囉，因為佢落過海，浸過鹹水，唔沖佢話頂唔順～～～

其實黎之前真係完全冇諗過間房係咁惡劣架．．．．個地下係石屎地，好污糟，咁都算，仲要周圍都係小昆蟲小動物，死咗既有，生out out既都有，等媽咪結算吓先：生out out既有一條四腳蛇、一隻金絲貓(外貌似蜘蛛)、一隻啲腳非常長既不知名昆蟲、一隻勁大隻勁高速拍極都拍唔死又好鬼嘈既烏蠅；死咗响地下或者死咗都要痴住响牆度既昆蟲不下五隻．．．．．仲未計睇唔到嗰啲，其實都幾噁心！

大房嗰邊雖然有熱水，但係唔會好過我哋細房，因為佢哋間房係漏水既，地下成個水氹，仲要地方好擠迫．．．．．好彩既係，呢晚爸爸、媽咪同皓皓都瞓得著，只係．．．．心心表姐同芬姨瞓唔著覺啫！

瞓醒出去食早餐．．．．呢間茶座啲位對正個海，响呢度嘆茶其實都幾舒服既～～

發現地下有隻butterfly～～

又去海灘玩吓．．．．．呢日食埋晏晝我哋就要走，所以心心表姐要將尋日捉既蟹仔放生～～

個海都幾大浪．．．．

呢日冇落雨，冇咗咁凍，所以黎呢個湖度捉蟹仔魚毛．．．．．



所謂既湖，據喬契爺講，其實係潮漲時湧入黎既海水形成既～～

對佢哋班男人黎講，成個宿營最精彩既地方就係响呢度喇～～
呢．．．見唔見輝契爺著晒潛水衣？佢唔係潛水，而係．．．．．

定時定候，佢哋會坐呢隻橡皮艇出去深水既地方放蟹籠．．．．．



又定時定候出去收番啲蟹籠．．．．．
唔知點解，啲蟹會自己走入啲籠度．．．．
呢一轉捉到既蟹，有橋底辣蟹嗰啲咁大隻呀，勁！

Bear Bear 契爺契媽～～

Fion EE &喬契爺＆哈哈哥哥～～

玩完水，媽咪叫皓皓bye bye海灘喇！

番房沖腳同埋收拾行裝～～
見仲有少少時間，响間房玩陣啤牌．．．．．皓皓堅持話自己識玩，係要响豎攪攪震～～

有得食喇～～～呢度有成廿隻蟹，全靠佢哋好努力咁朝早又出去放蟹籠、收蟹籠，
夜晚又出去放蟹籠、收蟹籠，可以話隻隻皆辛苦架！

食完晏晝大家就開始回程喇。。。。。
黎既時候落斜多，回程既時候上斜多，所以回程行咗成個鐘～～～

呢個旅程，辛苦晒爸爸．．．．．
其一係來回兩程，皓皓一扭計就係爸爸抱(因為媽咪自己都頂唔順)，真係唔簡單架喎；
其二係呢次宿營有太多地方係我哋冇預計過既，例如要行山行咁耐啦、個營地冇嘜嘢啱皓皓玩啦、仲有嗰間親親小昆蟲既房啦．．．．．就係因為咁，媽咪同芬姨都係咁ee哦哦，係咁埋怨爸爸，話佢之前報流料，sorry ar 爸爸．．．．．
其實而家諗番，嗰條山路都唔係咁難行，沿路又有清風吹送，又有美景相伴，一家人行吓山，都幾健康吖！當然房間環境同埋零設施就真係唔太適合帶太細既小朋友一齊去，不過今次都不失為一個好好既體驗。Anyway，點都要講多次sorry，要爸爸你聽咗咁多'梵音'～～